មែនទែនទៅ លោកអាន់តូនី ប្លីងខេន ត្រូវចេញពីប្រទេសម៉ាឡេស៊ីនៅថ្ងៃពុធ រួចបន្តជួបពិភាក្សាជាមួយភាគីថៃនៅថ្ងៃព្រហស្បតិ៍ មុនត្រឡប់ទៅសហរដ្ឋអាមេរិកវិញ។ ប៉ុន្តែបើតាមអ្នកនាំពាក្យក្រសួងការបរទេសអាមេរិក លោក នេត ព្រីន ឲ្យដឹងថា មានអ្នកដំណើរ តួនាទីជាអ្នកយកព័ត៌មានមួយរូបបានធ្វើតេស្តវិជ្ជមានកូវីដ១៩ នៅថ្ងៃពុធនៅទីក្រុងកូឡាឡាំពួ ប្រទេសម៉ាឡេស៊ី ជាហេតុធ្វើឲ្យលោក ប្លីងខេន មិនអាចបន្តដំណើរទៅប្រទេសថៃ ដោយប្រថុយប្រថានបានឡើយ។
យ៉ាងណាមិញ រដ្ឋមន្ត្រីការបរទេសអាមេរិក និងមន្ត្រីជាន់ខ្ពស់ឯទៀតមិនមានវិជ្ជមានកូវីដ១៩នោះទេ។ លោក ប្លីងខេន បានទូរសព្ទ័ទៅកាន់ភាគីថៃ ដោយសម្តែងការសោកស្តាយ ក្រោយពីទស្សនកិច្ចត្រូវបញ្ចប់ ខុសពីការគ្រោងទុកបែបនេះ។អត្ថបទគួរអាន
គួរជម្រាបថា នេះគឺជាដំណើរទស្សនកិច្ចលើកទីមួយហើយ សម្រាប់លោកប្លីងខេន នៅក្នុងតំបន់អាស៊ាន ក្នុងនាមជារដ្ឋមន្ត្រីការបរទេសអាមេរិក។ បើតាមគម្រោងលោកគួរត្រូវបានចំណាយពេលពីថ្ងៃទី០៩ ដល់ថ្ងៃទី១៧ ខែធ្នូ មកកាន់ប្រទេសចំនួន៣នៅតំបន់អាស៊ាន មានដូចជា ឥណ្ឌូនេស៊ី ម៉ាឡេស៊ី និងប្រទេសថៃ។
បេសសកម្មរបស់មន្ត្រីជាន់ខ្ពស់អាមេរិករូបនេះ ត្រូវបានគេមើលឃើញថាជាការព្យាយាមបង្កើនចំណងការទូតរវាងសហរដ្ឋអាមេរិក ជាមួយប្រទេសក្នុងតំបន់ ដើម្បីទប់ទល់នឹងឥទ្ធិពលរបស់ចិន ដែលកំពុងតែមានប្រៀបខ្លាំង។
គួរជម្រាបថា អំឡុងវត្តមាននៅឥណ្ឌូនេស៊ី និងម៉ាឡេស៊ី លោកអាន់តូនី ប្លីនខេន បានថ្លែងសារគន្លឹះសំខាន់ៗជាច្រើន។ ជាក់ស្តែង នៅឥណ្ឌូនេស៊ី លោកបានបង្ហើបឲ្យដឹងថា អាមេរិកនឹងបង្កើនវត្តមានទាំងសេដ្ឋកិច្ចនិងយោធា នៅក្នុងតំបន់ឥណ្ឌូប៉ាស៊ីហ្វិក ខណៈពេលស្ថិតនៅប្រទេសម៉ាឡេស៊ី លោកបាននិយាយថា សហរដ្ឋអាមេរិកកំពុងមើលទៅលើជំហានបន្ដទៀត ដើម្បីប្រឆាំងនឹងរបបយោធាភូមាផងដែរ៕None
