តាមការរាយការណ៍ពីបណ្ដាញសារព័ត៌មានអន្តរជាតិធំៗបានឲ្យដឹងថា អគ្គនាយកទទួលបន្ទុកកិច្ចការអាមេរិក និងអឺរ៉ុបរបស់ប្រទេសឥណ្ឌូនេស៊ី លោក អាយ ហ្គីដ ងូរ៉ា ស្វាចាយ៉ា (I Gede Ngurah Swajaya) បានប្រាប់អ្នកសារព័ត៌មានកាលពីថ្ងៃចន្ទថា លោក អានតូនី ប្លីងឃីន រដ្ឋមន្ត្រីការប្រទេសអាមេរិក នឹងទស្សនកិច្ចនៅក្នុងទីក្រុងហ្សាកាតា នៅថ្ងៃទី ១៣-១៤ ខែធ្នូនេះ ហើយលោក គឺជាមន្ត្រីជាន់ខ្ពស់របស់អាមេរិកទី៣ហើយ ដែលនឹងធ្វើដំណើរមកកាន់តំបន់នេះ ក្នុងរយៈពេល២ខែមកនេះ។
ប្រភព័ត៌មានរ៉យទ័រ ក៏បានបញ្ជាក់ឲ្យដឹងថា បន្ទាប់ពីទស្សនកិច្ចចំនួន២ថ្ងៃនៅឥណ្ឌូនេស៊ី រដ្ឋមន្ត្រីការប្រទេសអាមេរិក ក៏នឹងបន្ដទស្សនកិច្ចនៅម៉ាឡេស៊ីរយៈពេលពីថ្ងៃទៀត ចាប់ពីថ្ងៃទី ១៤ដល់ថ្ងៃទី ១៥ខែធ្នូផងដែរ។
តើលោក អាន់តូនី ប្លីងឃីន នឹងជជែកអំពីអ្វីខ្លះនៅក្នុងដំណើរទស្សនកិច្ចរបស់លោកនៅប្រទេសទាំងពីរខាងលើនេះ?
បើតាមមន្ត្រីជាន់ខ្ពស់ឥណ្ឌូនេស៊ី លោករដ្ឋមន្ត្រីការបរទេសអាមេរិក នឹងពិភាក្សាអំពីបញ្ហាសុខាភិបាល ការវិនិយោគ និងហេដ្ឋារចនាសម្ព័ន្ធនៅក្នុងតំបន់ឥណ្ឌូប៉ាស៊ីហ្វិក ហើយលោកក៏នឹងចូលរួមនៅក្នុងវេទិកាប្រជាធិបតេយ្យបាលី តាមរយៈប្រព័ន្ធវីដេអូផងដែរ នៅថ្ងៃទី ០៩ ខែធ្នូ។
អត្ថបទគួរអាន
ទោះយ៉ាងណា គេនៅមិនទាន់ដឹងប្រាកដនៅឡើយទេថា តើលោក ប្លីងឃីន នឹងមានដំណើរទស្សនកិច្ចទៅកាន់ប្រទេសដទៃទៀត នៅក្នុងតំបន់អាស៊ីអាគ្នេយ៍ ដែរឬក៏អត់នោះ។
គួររំឭកថា នៅក្នុងកិច្ចប្រជុំជាមួយរដ្ឋមន្ត្រីការបរទេសអាស៊ីអាគ្នេយ៍នៅក្រៅមហាសន្និបាតអង្គការសហប្រជាជាតិក្នុងខែកញ្ញា លោក Blinken បាននិយាយថា ទីក្រុងវ៉ាស៊ីនតោននឹងបញ្ចេញយុទ្ធសាស្ត្រថ្មីកាន់តែទូលំទូលាយសម្រាប់តំបន់ឥណ្ឌូប៉ាស៊ីហ្វិក ដែលនឹងបង្កើត "លើទស្សនវិស័យរួមគ្នា ដោយសេរីបើកចំហ ជាមួយនឹងការតភ្ជាប់គ្នា ភាពធន់ និងសុវត្ថិភាពតំបន់។
សូមបញ្ជាក់ថា បើទោះបីជា សហរដ្ឋអាមេរិក និងប្រទេសចិន កំពុងតាមប្រជែងឥទ្ធិពលគ្នានៅលើឆាកអន្តរជាតិ រួមទាំងតំបន់អាស៊ីអាគ្នេយ៍ក៏ដោយ ប៉ុន្ដែ នាពេលកន្លងមក ភាគីទាំងពីរ បានចេញមុខមកបញ្ជាក់ហើយថា នឹងមិនតម្រូវឲ្យប្រទេសនៅក្នុងតំបន់ត្រូវតែជ្រើសរើសយកភាគីម្ខាងៗនោះទេ តែត្រូវធ្វើការចែករំលែកនូវចក្ខុវិស័យផ្អែកទៅតាមគោលការណ៍ «ប្រទេសធំៗនឹងមិនធ្វើបានប្រទេសទន់ខ្សោយជាងនោះទេ» ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
