តាមការអះអាងរបស់ក្រសួងការពារជាតិអាមេរិក នាវារបស់អាមេរិកទាំងពីរគ្រឿង ដែលបានចូលទៅកាន់តំបន់ជម្លោះនោះ គឺគ្រាន់តែជាការហ្វឹកហ្វឺនរបស់យោធាតែប៉ុណ្ណោះ និងដើម្បីពង្រឹកទំនុកចិត្តសម្ព័ន្ធរបស់ខ្លួន និងបង្ហាញពីការដំណោះស្រាយ ឆ្លើយតបទៅនឹងឥទ្ធិពលអាក្រក់។ នេះបើតាមការរាយការណ៍ដោយទីភ្នាក់ងារព័ត៌មានរ៉យទ័រ។
ជម្លោះដែនទឹក គឺជាចំណុចក្ដៅបំផុតមួយ នៃចំណុចក្ដៅជាច្រើនផ្សេងៗទៀតនៃភាពតានតឹងរវាងមហាយក្សអាមេរិក និងចិន ដែលកន្លងមកចិនបានទាមទារយកដែនទឹកដ៏ធំនៃតំបន់ជម្លោះសមុទ្រចិនខាងត្បូងនេះ ហើយចិនក៏បានសាងសង់មូលដ្ឋានយោធានៅលើកោះសិប្បនិម្មិតមួយនៅទីនោះផងដែរ។
មែនទែនទៅ នាវាកងទ័ពជើងទឹកអាមេរិក តែងតែធ្វើដំណើរឆ្វែលទៅជិតកោះទាំងអស់នោះ ដើម្បីប្រឆាំងនឹងការទាមទារអធិបតេយ្យភាពរបស់ចិននៅតំបន់ជម្លោះនោះ នឹងបានធ្វើឲ្យចិនខឹងសម្បារមិនតិចដងនោះដែរ។
អត្ថបទគួរអាន
យ៉ាងណាមិញ ក្រសួងការពារជាតិអាមេរិក បានលើកឡើងថា នាវាផ្ទុកយន្ដហោះចម្បាំងរបស់អាមេរិកធំៗចំនួន២គ្រឿង បានចាប់ផ្ដើមប្រតិបត្តិការរបស់ខ្លួននៅក្នុងសមុទ្រចិនខាងត្បូងតាំងពីថ្ងៃអាទិត្យមក។ ក្រុមនាវាផ្ទុកយន្ដហោះចម្បាំងទាំងនោះ នឹងធ្វើសមយុទ្ធ ក្នុងនោះរួមមាន ការប្រតិបត្តិការសង្គ្រាមប្រឆាំងនាវាមុជទឹកចម្បាំង ប្រតិបត្តិការសង្គ្រាមតាមយន្ដហោះចម្បាំង និងប្រតិបត្តិការរារាំងដែនសមុទ្រ ដើម្បីពង្រឹងការត្រៀមខ្លួនប្រយុទ្ធជាដើម។
ក្រសួងការពារជាតិអាមេរិក បានអះអាងទៀតថា ការហ្វឹកហ្វឺននេះ នឹងធ្វើឡើងស្របតាមច្បាប់អន្តរជាតិនៅក្នុងដែនទឹកអន្តរជាតិ ប៉ុន្ដែ អាមេរិកមិនបានផ្ដល់នូវព័ត៌មានលម្អិតពីរឿងនេះនោះទេ។
ក្រុមនាវាផ្ទុកយន្ដហោះចម្បាំងទាំងពីររបស់អាមេរិកនេះ ត្រូវបានគេរាយការណ៍ថា នៅថ្ងៃអាទិត្យបានធ្វើសមយុទ្ធជាមួយនឹងកងទ័ពជើងទឹកជប៉ុន នៅក្នុងដែនសមុទ្រហ្វីលីពីន និងនៅតំបន់ដែនទឹកនៅភាគខាងកើតកោះតៃវ៉ាន់ផងដែរ។
ព័ត៌មានអំពីប្រតិបត្តិការនាវាផ្ទុយកយន្ដហោះចម្បាំងរបស់អាមេរិកនេះគឺក៏ធ្វើឡើង ស្របពេលដែលកោះតៃវ៉ាន់បានរាយការណ៍ចុងក្រោយនេះថា មានការលុកលុយទ្រង់ទ្រាយធំពីសំណាក់កងទ័ពអាកាសរបស់ចិនចូលទៅក្នុងដែនអាកាស ដែលកៀកនឹងកោះ Pratas ដែលគ្រប់គ្រងដោយតៃវ៉ាន់ នៅភាគខាងជើងនៃសមុទ្រចិនខាងត្បូង។
ទោះយ៉ាងណា ប្រទេសចិននៅមិនទាន់ចេញមុខមកឆ្លើយតបភ្លាមៗនោះទេ ក្រោយមានព័ត៌មានអំពីការបញ្ជូននាវាផ្ទុកយន្ដហោះអាមេរិក ចូលទៅក្នុងតំបន់ជម្លោះសមុទ្រចិនខាងត្បូងនេះ ប៉ុន្ដែ កន្លងទៅថ្មីៗនេះ ចិនក៏បានព្រមានខ្លាំងៗទៅដល់នាវាចម្បាំងអាមេរិកឲ្យបើកចេញពីតំបន់សមុទ្រចិនខាងត្បូងម្ដងរួចហើយដែរ៕
None
