អាម៉េរិក ដាក់ទណ្ឌកម្មក្រុមហ៊ុនឥណ្ឌា ចំនួន២ ដែលជាប់ពាក់ព័ន្ធនឹងគម្រោងថាមពលរបស់រុស្ស៊ី

សហរដ្ឋអាម៉េរិក បានដាក់ទណ្ឌកម្មលើក្រុមហ៊ុនឥណ្ឌាចំនួនពីរ គឺក្រុមហ៊ុន Gotik Shipping និងក្រុមហ៊ុន Plio Energy Cargo Shipping ដោយសារក្រុមហ៊ុនទាំងនេះ ត្រូវបានអាម៉េរិក ចោទថា មានការជាប់ពាក់ព័ន្ធនឹងគម្រោងឧស្ម័ន អាក់ទិក LNG-2 របស់ក្រុមហ៊ុនរុស្ស៊ី ណូវ៉ាទិក(NOVATEK)។

ក្រសួងរតនាគារសហរដ្ឋអាម៉េរិក បានអះអាងថា ក្រសួងបានបង្កកទ្រព្យសម្បត្តិរបស់ក្រុមហ៊ុនឥណ្ឌាទាំងពីរនេះ ព្រមទាំងហាមឃាត់មិនឱ្យធ្វើអាជីវកម្មណាមួយរវាងពលរដ្ឋ ឬស្ថាប័នអាម៉េរិក ជាមួយនឹងក្រុមហ៊ុនទាំងពីរនេះទៀតផង។ ប៉ុន្តែក្រសួងរតនាគារអាម៉េរិក ទុកពេលឱ្យក្រុមហ៊ុននេះធ្វើប្រតិបត្តិការមួយចំនួនជាមួយនឹងនាវាដឹកឧស្ម័នធម្មជាតិរាវ រហូតដល់ថ្ងៃទី៦ ខែវិច្ឆិកា ឆ្នាំ២០២៤ ដើម្បីធានាសុវត្ថិភាពរបស់នាវិក និងកប៉ាល់ដឹកឧស្ម័នទាំងពីរនេះ។

ការចាត់វិធានការនេះ គឺជាផ្នែកមួយនៃការខិតខំដ៏ទូលំទូលាយ ដើម្បីទប់ស្កាត់ការនាំចេញឧស្ម័នធម្មជាតិរាវពីរុស្ស៊ី ខណៈដែលសហអាម៉េរិក នៅតែបន្តរឹតបន្តឹងទណ្ឌកម្មប្រឆាំងនឹងសេដ្ឋកិច្ចរុស្ស៊ី។

ទន្ទឹមនឹងនេះ សហភាពអឺរ៉ុប ក៏គ្រោងនឹងដាក់កំហិតលើការដឹកជញ្ជូនឧស្ម័ន LNG របស់រុស្ស៊ីតាមរយៈកំពង់ផែរបស់ខ្លួនផងដែរ។ វិធានការទាំងនេះ ត្រូវបានគេរំពឹងថា នឹងចូលជាធរមាននៅឆ្នាំ២០២៥ ខាងមុខ ដែលវានឹងហាមឃាត់លើការវិនិយោគ ការផ្គត់ផ្គង់ទំនិញ និងសេវាកម្មចាំបាច់មួយចំនួន ដើម្បីបញ្ឈប់គម្រោង LNG នៅក្នុងប្រទេសរុស្ស៊ី ដូចជាគម្រោង Arctic LNG-2 និងគម្រោង Murmansk LNG ជាដើម៕

អត្ថបទ៖ សុខ មង្គល