កាលពី ថ្ងៃទី ១៨ ខែកក្កដា ក្រុមហ៊ុន Vietjet បានធ្វើប្រតិបត្តិការជើងហោះហើរអន្តរជាតិមួយ ដែលបាននាំពលរដ្ឋវៀតណាមចំនួន ២៤០ នាក់ ពីប្រទេសហ្វីលីពីន ត្រលប់មកវៀ់តណាមវិញ ប្រកបដោយសុវត្ថិភាព។ ជើងហោះហើរអន្តរជាតិនេះបានចាកចេញពីអាកាសយានដ្ឋានអន្តរជាតិ នីណូអាគីណូ (Ninoy Aquino) និងបានមកដល់អាកាសយានដ្ឋានអន្តរជាតិ ខាធថូ (Can Tho) នៅភាគខាងត្បូងប្រទេសវៀតណាម ដើម្បីអនុវត្តវិធានកាលការដាក់នៅដាច់ដោយឡែកពីគ្នា រយៈពេល ១៤ ថ្ងៃ។
កាលពីខែ កក្កដា ក្រុមហ៊ុន Vietjet ក៏បានធ្វើប្រតិបត្តិការហោះហើរ សម្រាប់ការធ្វើមាតុភូមិនិវត្តន៍ ចំនួន ៣ ខ្សែ ផ្សេងទៀតពីប្រទេសសិង្ហបុរី តៃវ៉ាន់ ស្រីលង្កា និង បង់ក្លាដែស។ ក្រុមហ៊ុនក៏រំពឹងថានឹងធ្វើប្រតិបត្តិការហោះហើរ ចំនួន ៤ ខ្សែទៀត ដើម្បីនាំពលរដ្ឋវៀតណាមបន្ថែមទៀត ពីប្រទេសហ្វីលីពីន រុស្ស៊ី ព្រុយណេ ឥណ្ឌូនេស៊ី និងមីយ៉ាន់ម៉ា នាពេលខាងមុខនេះ។
អ្នកដំណើរតាមជើងយន្តហោះ ក្នុងប្រតិបត្តិការធ្វើមាតុភូមិនិវត្តន៍ ត្រូវបានចាត់ថ្នាក់ជាក្រុមអាទិភាព ក្នុងនោះរួមមាន កុមារអាយុក្រោម ១៨ ឆ្នាំ មនុស្សចាស់ជរា ស្ត្រីមានគភ៌ អ្នកមានបញ្ហាសុខភាព ពលករដែលមានកិច្ចសន្យាការងារផុតសុពលភាព និងពលករគ្មានកន្លែងស្នាក់នៅ សិស្សគ្មានទីលំនៅដោយសារការបិទកន្លែងស្នាក់នៅ និងអ្នកជួបកាលៈទេសៈពិបាកផ្សេងៗទៀត។
អត្ថបទទាក់ទង
អ្នកធ្វើដំណើរវិលត្រឡប់មកប្រទេសវៀតណាមវិញ តាមជើងហោះហើររបស់ Vietjet។
Vietjet រំពឹងថានឹងនាំពលរដ្ឋវៀតណាមជិត ១ម៉ឺននាក់ ដែលកំពុងនៅក្រៅប្រទេស ឲ្យត្រឡប់មកវៀតណាមវិញ ត្រឹមចុងខែ កក្កដា ខាងមុខនេះ ប្រកបដោយសុវត្ថិភាព ដោយគោរពតាមគោលការណ៍ ចេញ-ចូល ឲ្យបានខ្ជាប់ខ្ជួន និងវិធានកាលការដាក់នៅដាច់ដោយឡែកពីគ្នា នៅពេលមកដល់។ ជើងហោះហើររបស់ក្រុមហ៊ុនអាកាសចរណ៍ Vietjet ទាំងអស់ត្រូវបានប្រតិបត្តិការស្របតាមស្តង់ដារអន្តរជាតិ និងធ្វើតាមអនុសាសន៍យ៉ាងតឹងរឹងបំផុត ពីមន្រ្តី អង្គការសុខភាពពិភពលោក (WHO) និងសមាគមដឹកជញ្ជូនតាមផ្លូវអាកាសអន្តរជាតិ (IATA) ដើម្បីធានាសុវត្ថិភាពដល់អ្នកដំណើរ និងក្រុមការងារអាកាសចរណ៍ ទាំងអស់ មុនពេល ក្នុងអំឡុងពេល និងក្រោយពេល ប្រតិបត្តិការហោះហើររបស់ខ្លួន។
ក្នុងដំណាក់កាលដំបូងនៃការផ្ទុះឡើងនៃវីរុសកូវីដ ១៩ ក្រុមហ៊ុន Vietjet បានផ្តើមយុទ្ធនាការ យ៉ាងឆាប់រហ័សមួយ ដើម្បីធ្វើមាតុភូមិនិវត្តន៍អ្នកដំណើរក្រៅប្រទេស ជាមួយនិងប្រតិបត្តិការជើងហោះហើរឥតគិតថ្លៃជាច្រើន និងជើងហោះហើរអាទិភាពតែមួយផ្លូវ ដើម្បីនាំពលរដ្ឋវៀតណាម និងជនបរទេសត្រឡប់មកផ្ទះរបស់ពួកគេវិញ។ អ្នកដំណើរ បុគ្គលិកលើយន្តហោះ បុគ្គលិកផ្នែកយានយន្ត និងបុគ្គលិកអាកាសចរណ៍យន្ដហោះ ទាំងអស់សុទ្ធតែមានសុវត្ថិភាព។
ក្រុមហ៊ុន Vietjet ក៏បានចូលរួមដឹកជញ្ជូនទំនិញសំខាន់ៗ រាប់ពាន់តោន រួមមាន ឧបករណ៍វេជ្ជសាស្ត្រ និងបានបរិច្ចាគម៉ាស់វេជ្ជសាស្ត្រជាង ២លាន ៥សែន ម៉ាស់ ដល់ប្រជាពលរដ្ឋ អង់គ្លេស បារាំង អាល្លឺម៉ង់ និង អាមេរិកផងដែរ ដើម្បីជួយដល់បណ្តាប្រទេសទាំងអស់នោះ ក្នុងការការពារ និងប្រយុទ្ធប្រឆាំងការរាតត្បាតជាសកលនៃជកូវីដ ១៩។
ផ្អែកលើលទ្ធផល នៃប្រតិបត្តិការហោះហើរ សម្រាប់ការធ្វើមាតុភូមិនិវត្តន៍ ក្រុមហ៊ុន Vietjet នឹងបន្តធ្វើការយ៉ាងជិតស្និទ្ធជាមួយអាជ្ញាធរ និងមន្រ្តីរដ្ឋាភិបាល ដើម្បីកែសម្រួលជើងហោះហើរឲ្យកាន់តែញឹកញាប់ សម្រាប់តាមស្ថានការណ៍ជាក់ស្ដែង ចូលរួមបង្កើនជើងហោះហើរសម្រាប់ការធ្វើមាតុភូមិនិវត្តន៍ និងជើងហោះហើរពាណិជ្ជកម្ម ដើម្បីនាំយកពលរដ្ឋវៀតណាមត្រលប់មកក្នុងប្រទេសវិញ។ បច្ចុប្បន្ន ក្រុមហ៊ុនអាកាសចរណ៍ ត្រៀមខ្លួនរួចរាល់ ដើម្បីបន្តប្រតិបត្តិការហោះហើរអន្តរជាតិឡើងវិញ ហើយកំពុងរង់ចាំការយល់ព្រមជាផ្លូវការពីរដ្ឋាភិបាល ៕
