តម្លៃមាស និងប្រាក់កម្រើកឡើងបន្តិច តែអ្នកវិភាគថា ហាងឆេងនេះមិនមានចីរភាពនោះទេ
ហាងឆេងលោហធាតុមានតម្លៃពីរប្រភេទនៅលើទីផ្សារអន្តរជាតិ បានកម្រើកឡើងវិញបន្តិច បន្ទាប់ពីបានដាំក្បាលចុះយ៉ាងគំហុកនាពេលកន្លងទៅ។ ទោះជាយ៉ាងណា ក្រ…
បន្ទាប់ពីជំនួបរវាងរដ្ឋមន្ត្រីការបរទេសអាម៉េរិក លោក Marco Rubio និងរដ្ឋមន្ត្រីការបរទេសវៀតណាម លោក ឡេ ហ័យ ទ្រុង (Le Hoai Trung) នៅក្រៅកិច្ចប្រជុំកំពូលអាស៊ាន ក្នុងទីក្រុងម៉ានីល ប្រទេសហ្វីលីពីន ភាគីវៀតណាម បានទទូចសុំឱ្យសហរដ្ឋអាម៉េរិក បញ្ចប់ការស៊ើបអង្កេតពាណិជ្ជកម្ម និងទទួលស្គាល់កិច្ចខិតខំប្រឹងប្រែងរបស់វៀតណាម ក្នុងការកែលម្អទំនាក់ទំនងពាណិជ្ជកម្ម។ ទន្ទឹមនឹងនេះ ភាគីវៀតណាម ក៏បានបញ្ជាក់ជំហរថា ខ្លួនត្រៀមស្វាគមន៍ការវិនិយោគថ្មីៗពីក្រុមហ៊ុនអាម៉េរិក និងពង្រីកកិច្ចសហប្រតិបត្តិការសេដ្ឋកិច្ចបន្ថែមទៀត។
ទោះជាយ៉ាងណា វៀតណាមនៅតែស្ថិតក្រោមការស៊ើបអង្កេតពាណិជ្ជកម្មចំនួន៣របស់សហរដ្ឋអាម៉េរិកពាក់ព័ន្ធនឹងការចោទប្រកាន់ពីបទប្រកួតប្រជែងមិនស្មើភាព រំលោភកម្មសិទ្ធិបញ្ញា និងការប្រើប្រាស់ទំនិញ ដែលពាក់ព័ន្ធពលកម្មដោយបង្ខំ។ ស្របពេលនេះ ឱនភាពពាណិជ្ជកម្មរបស់សហរដ្ឋអាម៉េរិកជាមួយវៀតណាម បានកើនដល់ជាង៧៥ពាន់លានដុល្លារក្នុងឆមាសទី១ឆ្នាំ២០២៦ ដែលក្លាយជាសម្ពាធកាន់តែខ្លាំងលើទីក្រុងហាណូយ។
ទន្ទឹមនេះ រដ្ឋបាលលោក ដូណាល់ ត្រាំ ត្រូវបានរំពឹងថា នឹងប្រកាសពន្ធគយថ្មីលើការនាំចូលពីបណ្ដាប្រទេសជាដៃគូពាណិជ្ជកម្មប្រហែល៦០ប្រទេសនៅមុនថ្ងៃសុក្រ សប្ដាហ៍នេះ ដោយអត្រាពន្ធគយចាប់ផ្តើមពី១០% និងអាចខ្ពស់ជាងនេះសម្រាប់ប្រទេសមួយចំនួន។ លោក ដូណាល់ ត្រាំ បានអះអាងថា វិធានការនេះមានគោលបំណងការពារឧស្សាហកម្មអាម៉េរិក និងទាញការផលិតត្រលប់មកកាន់ទឹកដីសហរដ្ឋអាម៉េរិកវិញ។ ប៉ុន្តែក្រុមអ្នករិះគន់ព្រមានថា ពន្ធគយថ្មីអាចធ្វើឱ្យតម្លៃទំនិញកើនឡើង និងបង្កសម្ពាធថ្មីលើពាណិជ្ជកម្មពិភពលោក។
សម្រាប់វៀតណាមការសម្រេចចិត្តរបស់ទីក្រុងវ៉ាស៊ីនតោនលើកនេះ គឺជាចំណុចដ៏រសើប ព្រោះសហរដ្ឋអាម៉េរិក គឺជាទីផ្សារនាំចេញធំបំផុតរបស់វៀតណាម ហើយពន្ធថ្មីអាចប៉ះពាល់ដោយផ្ទាល់ដល់សេដ្ឋកិច្ច និងការនាំចេញរបស់ប្រទេសវៀតណាម៕
ដោយ: តែម សុខុម
