ចិន ជំរុញឱ្យអាម៉េរិក បញ្ឈប់ការពង្រីកការរឹតបន្តឹងការវិនិយោគក្នុងប្រទេសខ្លួន ព្រោះវាមានលក្ខណៈរើសអើង

សង្គ្រាមសេដ្ឋកិច្ច និងបច្ចេកវិទ្យារវាងចិន និងអាម៉េរិក កំពុងឡើងកម្ដៅជាថ្មីម្តងទៀត បន្ទាប់ពីស្ងប់ស្ងាត់មួយរយៈខ្លីក្រោយជំនួបកំពូលរវាងប្រធានាធិបតី ស៊ី ជីនពីង និងថ្នាក់ដឹកនាំអាម៉េរិក។ ទីភ្នាក់ងារព័ត៌មាន Reuters បានរាយការណ៍ថា មហាអំណាចទាំងពីរបានប្រឈមមុខដាក់គ្នាយ៉ាងក្តៅគគុកពាក់ព័ន្ធនឹងផែនការរបស់ទីក្រុងវ៉ាស៊ីនតោន ក្នុងការរឹតបន្តឹងការវិនិយោគលើវិស័យបច្ចេកវិទ្យាស្នូលនៅក្នុងប្រទេសចិន។ តើសារព្រមានតបតពីទីក្រុងប៉េកាំង មានទម្ងន់កម្រិតណា ហើយវិធានការថ្មីរបស់អាម៉េរិកអាចនឹងប៉ះពាល់ដល់ពាណិជ្ជកម្មពិភពលោកយ៉ាងដូចម្តេច?

ក្រសួងហិរញ្ញវត្ថុសហរដ្ឋអាម៉េរិក បានដាក់ចេញនូវសំណើបច្ចុប្បន្នភាពលើកម្មវិធីសន្តិសុខវិនិយោគក្រៅប្រទេស ដោយបានបន្ថែមបច្ចេកវិទ្យាជីវសាស្ត្រចូលទៅក្នុងបញ្ជីរឹតបន្តឹង និងពង្រីកវិសាលភាពគ្របដណ្តប់លើប្រព័ន្ធកុំព្យូទ័រដែលមានសមត្ថភាពដំណើរការខ្ពស់ ព្រមទាំងបច្ចេកវិទ្យាល្បឿនលឿនជាងសំឡេង។ ក្រសួងហិរញ្ញវត្ថុអាម៉េរិក បានគូសបញ្ជាក់ថា វិធានការតឹងរ៉ឹងទាំងនេះមានគោលដៅទប់ស្កាត់មិនឱ្យលំហូរដើមទុនរបស់វិនិយោគិនអាម៉េរិកជួយជ្រោមជ្រែងដល់ការអភិវឌ្ឍបច្ចេកវិទ្យាយុទ្ធសាស្ត្ររបស់គូប្រជែងបរទេស ដែលអាចគំរាមកំហែងដល់សន្តិសុខជាតិរបស់អាម៉េរិក នោះឡើយ។

ជាការឆ្លើយតប ក្រសួងពាណិជ្ជកម្មចិន បានចេញមុខជំរុញឱ្យសហរដ្ឋអាម៉េរិក បញ្ឈប់ជាបន្ទាន់នូវផែនការរឹតបន្តឹងការវិនិយោគនេះ ដោយចោទប្រកាន់ថា ច្បាប់ថ្មីលើបច្ចេកវិទ្យានេះមានចរិតលក្ខណៈរើសអើង និងកំពុងបំផ្លាញទំនាក់ទំនងពាណិជ្ជកម្មរវាងប្រទេសទាំងពីរយ៉ាងធ្ងន់ធ្ងរ។ ទីក្រុងប៉េកាំង បានប្រកាសជំហរជារួមថា ខ្លួនប្រឆាំងដាច់ខាតចំពោះសំណើរបស់អាម៉េរិក និងរក្សាសិទ្ធិអំណាចពេញលេញក្នុងការចាត់វិធានការតបតវិញ ទោះជាមិនទាន់ទម្លាយលម្អិតពីចំណាត់ការជាក់ស្តែងយ៉ាងណាក៏ដោយ។ លើសពីនេះ ចិនបានសង្កត់ធ្ងន់ថា ទង្វើរបស់ក្រុងវ៉ាស៊ីនតោន កំពុងធ្វើឱ្យប៉ះពាល់ដល់ស្ថិរភាពសេដ្ឋកិច្ចទ្វេភាគី និងផ្ទុយស្រឡះពីកិច្ចព្រមព្រៀងរួម ដែលប្រធានាធិបតីនៃប្រទេសទាំងពីរបានព្រមព្រៀងគ្នាក្នុងជំនួបកំពូលនាពេលកន្លងទៅ៕