ក្រុមហ៊ុនដឹកជញ្ជួនកំពុងចរចាជាមួយអតិថិជនរបស់ខ្លួនក្នុងការបង្កើនតម្លៃសេវាដឹកជញ្ជូន ៥% បន្ថែមទៀតដើម្បីជួយកាត់បន្ថយការចំណាយនៃថ្លៃប្រេងឥន្ធនៈដ៏ច្រើនលើសលុបរបស់ខ្លួន។
អាជីវកម្មវៀតណាមជាច្រើនកំពុងរងគ្រោះដោយសារការកើនឡើងនៃតម្លៃប្រេងឥន្ធនៈ ដែលគំរាមកំហែងដល់អតិផរណា នៅចំពេលសេដ្ឋកិច្ចទើបតែងើបឡើងវិញពីផលប៉ះពាល់នៃជំងឺរាតត្បាតកូវីដ ១៩ ដែលបានអូសបន្លាយមកមកអស់រយៈពេលជាងពីរឆ្នាំមកហើយនោះ។
នៅអំឡុងពេលស្ថានការពិភពលោកកំពុងស្ថិតនៅក្នុងភាពមិនច្បាស់លាស់ដោយសារកូវីដ១៩ និងវិបត្តិសង្គ្រាមនៅអ៊ុយក្រែនផងដែរ បានធ្វើឲ្យតម្លៃប្រេងសាំងនៅវៀតណាមបានកើនឡើងដល់កម្រិតខ្ពស់បំផុតដល់ ១ ដុល្លារ ៣៩ សេន ក្នុង ១ លីត្រ គិតត្រឹមពាក់កណ្ដាលខមិថុនា ហើយបើគិតបើគិតចាប់តាំងពីដើមឆ្នាំមកឃើញថា បានកើនឡើងជិត ៣៩%ឯណោះ។
ក្រុមហ៊ុនដឹកជញ្ចួនជាច្រើនបានបង្កើនតម្លៃសេវាកម្ម ប៉ុន្តែម្ចាស់អាជីវកម្មមានការព្រួយបារម្ភអំពីឥទ្ធិពលធ្លាក់ចុះនៃតម្រូវការ។ ក្រុមហ៊ុនរថយន្តក្រុង Viet Tan Phatរបស់វៀតណាមនៅសប្តាហ៍នេះ បានដំឡើងថ្លៃសំបុត្រធ្វើដំណើរជាង ២៩% បើធៀបនឹងតម្លៃពីមុន ខណៈក្រុមហ៊ុនដឹកជញ្ជូនមួយផ្សេងទៀតគឺ Vintrans បានព្យាយាមលក់ឡានក្រុងមួយចំនួនរបស់ខ្លួនដែលស៊ីប្រេងច្រើនជាបណ្ដើរៗ ហើយទិញរថយន្តថ្មីដែលសន្សំសំចៃប្រេងវិញ។
អត្ថបទគួរអាន
លើសពីនេះទៅទៀត ក្រុមហ៊ុនអាកាសចរណ៍ក៏កំពុងប្រឈមមុខនឹងការលំបាកបន្តដោយសារការកើនឡើងតម្លៃប្រេងឥន្ធនៈនេះផងដែរ។ ប្រធានផ្នែកទំនាក់ទំនងរបស់ក្រុមហ៊ុន Vietnam Airlines បាននិយាយនៅក្នុងព្រឹត្តិការណ៍មួយថ្មីៗនេះថា តម្លៃប្រេងពិភពលោកបានកើនឡើងដល់ ១២០ ដុល្លារ ទៅ ១៦០ ដុល្លារក្នុងមួយបារ៉ែល ធៀបនឹងកាលពីមុនមានតម្លៃត្រឹម ៨០ ដុល្លារ ប៉ុណ្ណោះ ខណៈពេលនេះក្រុមហ៊ុនកំពុងខិតខំប្រឹងប្រែងរកវិធីសាស្ត្រ ដើម្បីធានាបាននូវប្រតិបត្តិការរលូនចំពេលមានសម្ពាធអតិផរណា។
គួរកត់សម្គាល់ថា អ្នកវិនិយោគវិស័យឧស្សាហកម្មដឹកជញ្ជូនកំពុងស្វែងរកការកាត់បន្ថយពន្ធបន្ថែមទៀត ដើម្បីជួយកាត់បន្ថយការចំណាយរបស់ពួកគេ។ អនុប្រធានសមាគមដឹកជញ្ជូនទីក្រុងហាណូយ បាននិយាយថា នៅពេលដែលតម្លៃប្រងឥន្ធនៈកើនឡើងខ្ពស់ដល់ជិត ៥០% នៃការចំណាយនោះ ម្ចាស់អាជីវកម្មដឹកជញ្ជួនគ្មានជម្រើសអ្វីផ្សេងក្រៅពីការឡើងថ្លៃសេវាកម្មនោះទេ ប៉ុន្តែជម្រើសនេះ ចង់ឬមិនចង់ វានឹងធ្វើឲ្យបាត់បង់អ្នកដំណើរ។ អនុប្រធានសមាគមដឹកជញ្ជូនរូបនេះបានទទួចឱ្យរដ្ឋាភិបាលវៀតណាមគួរកាត់បន្ថយពន្ធបន្ថែមទៀត ដូចជាពន្ធលើការនាំចូលជាដើម ដើម្បីធ្វើឲ្យតម្លៃប្រេងធ្លាក់ចុះ។ ទន្ទឹមនឹងនោះ នាយករងនៃមជ្ឈមណ្ឌលគាំទ្រសហគ្រាសធុនតូច និងមធ្យមរបស់សមាគមធុរកិច្ច វៀតណាម បានស្នើឱ្យមានការបន្ធូរបន្ថយពន្ធលើប្រេងសាំងរយៈពេលពី ៣ ទៅ ៦ ខែផងដែរ។
ក៏ប៉ុន្តែ រដ្ឋាភិបាលប្រទេសវៀតណាមបាននិយាយថា ការកើនឡើងនៃតម្លៃសាំងនៅប្រទេសវៀតណាមគឺទាបជាងប្រទេសដទៃទៀត ដែលអាចកើនឡើងត្រឹមតែ ២៤% ដល់ ៦២ % ប៉ុណ្ណោះ ចាប់តាំងពីដើមឆ្នាំនេះ ខណៈដែលនៅប្រទេសសិង្ហបុរីបានឡើងថ្លៃពី ៤១% ដល់ ៨៤%ឯណោះ៕
None
