ឥឡូវនេះ ការស៊ើបអង្កេតបានរាលដាលទៅដល់អតីតមន្ត្រីជាន់ខ្ពស់នៃធនាគាររដ្ឋវៀតណាមហើយ។ អាជ្ញាធរប្រទេសវៀតណាមបានបើកការស៊ើបអង្កេតព្រហ្មទណ្ឌទៅលើរូបលោក Dang Thanh Binh អាយុ ៦៣ឆ្នាំ ដែលជាអតីតទេសាភិបាលរងនៃធនាគាររដ្ឋវៀតណាម ដើម្បីរកភ័ស្តុតាងជុំវិញតួនាទីរបស់រូបលោកនៅក្នុងករណីអំពើពុករលួយដល់ធំ ដែលធ្វើឲ្យវិស័យធនាគារវៀតណាមបាត់បង់ថវិកាអស់ប្រមាណ ៤០០លានដុល្លារ។
នេះបើតាមការចុះផ្សាយរបស់សារព័ត៌មានអេឡិចត្រូនិកភាសាអង់គ្លេសរបស់វៀតណាម VN Express។
លោក Binh ឥឡូវនេះ បានស្ថិតក្រោមការឃុំឃាំងនៅក្នុងផ្ទះ និងត្រូវប្រឈមនឹងការចោទប្រកាន់ពីបទធ្វេសប្រហែសនឹងការងារ បណ្ដាលឲ្យមានផលវិបាកធ្ងន់ធ្ងរ។ លោក Binh កាន់តំណែងជាទេសាភិបាលរងធនាគាររដ្ឋវៀតណាម ចាប់តាំងពីឆ្នាំ២០០៥ រហូតដល់ពេលដែលលោកចូលនិវត្តន៍ នាខែសីហា ឆ្នាំ២០១៤។
តើអ្នកបានអានអត្ថបទនេះ ឬនៅ?
ការចោទប្រកាន់លើរូបលោក Binh ធ្វើឡើងបន្ទាប់ពីក្រុមអធិការកិច្ចរដ្ឋាភិបាលវៀតណាមបានចេញរបាយការណ៍មួយ បង្ហាញពីអំពើរំលោភច្បាប់មួយចំនួនដែលបានកើតឡើងនៅក្នុងធនាគារកណ្ដាល ចន្លោះឆ្នាំ២០១០ និងឆ្នាំ២០១៥។
គួររំឭកថា កាលពីមួយខែមុន នគរបាលវៀតណាមបានចាប់ខ្លួនមនុស្ស ១៦នាក់ ក្នុងនោះមានទាំងមហាសេដ្ឋីធនាគារ និងបុគ្គលិកធនាគារ និងក្រុមហ៊ុនមួយចំនួន ពីបទបានជួយដល់អតីតប្រធានក្រុមប្រឹក្សាភិបាលនៃធនាគារសំណង់វៀតណាម ឈ្មោះ ផាម កុង ដាញ់ លួចយកលុយធនាគារ។
លោក ដាញ់ ត្រូវបានកាត់ឲ្យជាប់ពន្ធនាគារ ៣០ឆ្នាំ ខណៈដែលអតីតបុគ្គលិកធនាគារ ៣៥នាក់ផ្សេងទៀតជាប់ទោសដាក់ពន្ធនាគារម្នាក់ៗ ដល់ទៅ ២២ឆ្នាំ៕
