តើវិបត្តិសង្គ្រាមនៅអ៊ុយក្រែន កំពុងបង្កភាពអាប់អួដល់កំណើនសកម្មភាពរោងចក្រនៅអាស៊ីយ៉ាងណាខ្លះ?

ប្រការនេះ កំពុងក្លាយជាភាពអាប់អួសម្រាប់វិស័យផលិត ក៏ដូចជារោងចក្រនៅអាស៊ីនៅពេលខាងមុខផងដែរ ពិសេសប្រសិនបើសង្គ្រាមអូសន្លាយយូរ និងរីករាលដាលកាន់តែធំនៅក្នុងតំបន់អឺរ៉ុប។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។

ការដាក់ទណ្ឌកម្មអន្តរជាតិយ៉ាងខ្លាំងក្លាប្រឆាំងនឹងរុស្ស៊ី នៅក្នុងការឆ្លើយតបនឹងការឈ្លានពានរបស់រុស្ស៊ីទៅលើអ៊ុយក្រែននោះ បានធ្វើឲ្យទីផ្សារមានការរង្គោះរង្គើ និងជំរុញឲ្យតម្លៃប្រេងឆៅពិភពលោកហក់ឡើងថ្លៃកាន់តែខ្ពស់ដែរ ហើយវាបានបង្កឲ្យមានបញ្ហាការឈឺក្បាលបន្ថែមទៀត សម្រាប់សេដ្ឋកិច្ចអាស៊ី និងធុរកិច្ចដែលកំពុងតែមានថ្លៃដើមផលិតកើនឡើងខ្ពស់ស្រាប់រួចទៅហើយនោះ។

ទោះបីយ៉ាងណាក៏ដោយ សម្រាប់សូចនាកររោងចក្រផលិតនៅក្នុងប្រទេសចិន ទាំងវិស័យរដ្ឋ និងឯកជន នៅតែបង្ហាញពីសកម្មភាពពង្រីកខ្លួន ដែលវាចង្អុលបង្ហាញឲ្យឃើញពីភាពធន់ នៅក្នុងសេដ្ឋកិច្ចរបស់ប្រទេសមហាយក្សសេដ្ឋកិច្ចលំដាប់ទី២ក្នុងលោកមួយនេះ បើទោះបីជាមានការរងសម្ពាធលើថ្លៃដើមផលិតក៏ដោយ។ នេះបើតាមការគូសបញ្ជាក់ដោយសារព័ត៌មានរ៉យទ័រ។

សកម្មភាពរោងចក្រផលិតរបស់ចិនមានការពង្រីកខ្លួន នៅម៉ាឡេស៊ី វៀតណាម និងហ្វីលីពីន ដោយសារតែប្រទេសទាំងបីនេះ ទើបតែបានបើកសេដ្ឋកិច្ចរបស់ខ្លួនឡើងវិញ បើទោះបីជា មេរោគកូវីដ១៩ អូមីក្រុងនៅបន្ដឆ្លងរាលដាលក្ដី។

ប៉ុន្ដែ សម្រាប់សកម្មភាពរោងចក្រនៅជប៉ុនឯណោះវិញ វាហាក់បីដូចជាមានកំណើនយឺត នៅក្នុងខែកុម្ភៈកន្លងទៅនេះ ដោយសារតែការបន្ដដាក់ចេញនូវវិធានការទប់ស្កាត់កូវីដ១៩ និង ការកើនឡើងនៃថ្លៃដើមផលិត។

ដោយឡែក សកម្មភាពពង្រីកការផលិតនៅតៃវ៉ាន់ និង ឥណ្ឌូនេស៊ី ឯណោះវិញលោកអ្នកនាង ក៏ហាក់ដូចជាមានកំណើនយឺតផងដែរ ដែលជាសញ្ញាមួយបង្ហាញពីផលប៉ះពាល់ដែលបានបង្កឡើងដោយកូវីដ១៩ រីករាលដាល ធ្វើឲ្យរំខានដល់ខ្សែចង្វាក់ផ្គត់ផ្គង់។

ការស្ទង់មតិរបស់រ៉យទ័របង្ហាញថា ការងើបឡើងវិញនៃសេដ្ឋកិច្ចរបស់អាស៊ីនៅតែមានភាពផុយស្រួយនៅឡើយ ហើយការស្ទង់មតិនេះ គឺធ្វើឡើងតាំងពីមិនទាន់មានវិបត្តិសង្គ្រាមអ៊ុយក្រែនផ្ទុះឡើងឯណោះ។ ដូច្នេះ ស្របពេលដែលវិបត្តិសង្គ្រាមផ្ទុះឡើង និងមានការរីករាលដាល និងអូសបន្លាយកាន់តែយូរ នោះផលប៉ះពាល់មកលើសេដ្ឋកិច្ចអាស៊ី ក៏ដូចជាពិភពលោកក៏អាចនឹងមានកាន់តែធ្ងន់ធ្ងរដែរ។

សូមបញ្ជាក់ថា ថ្មីៗនេះ ប្រធានធនាពិភពលោក និង ប្រធានអង្គការមូលធិនិរូបិយវត្ថុអន្តរជាតិ បានចេញមុខមកព្រមានថា វិបត្តិសង្គ្រាមនៅអ៊ុយក្រែន និងការដាក់ទណ្ឌកម្មសេដ្ឋកិច្ចពីលោកខាងលិច ទៅលើរុស្ស៊ី វាកំពុងធ្វើឲ្យប៉ះពាល់ការងើបឡើងនៃសេដ្ឋកិច្ចរបស់ពិភពលោក ហើយស្ថាប័នអន្តរជាតិធំៗទាំងពីរនេះ កំពុងតាមដានយ៉ាងដិតដល់ និងវាយតម្លៃបន្ដទៀតអំពីផលប៉ះពាល់មកពីបញ្ហាធំៗទាំងនេះ មកលើសេដ្ឋកិច្ចពិភពលោក៕