បើតាម BBC របស់អង់គ្លេសដដែលនេះ បានឲ្យដឹងថា ករណីមានឡើងកំណកឈាមនៅក្នុងសសៃឈាមបានកើតឡើងជាបន្តបន្ទាប់លើអ្នកចាក់វ៉ាក់សាំងAstraZeneca រួច រាប់ចាប់តាំងពីអ្នកមានវ័យចំណាស់ រហូតដល់ក្រុមគ្រូពេទ្យជួរមុខ។ អ្នកខ្លះមានសម្ពាធឈាមទាប ខ្លះទៀតមានឈាមហូរចេញឥតឈប់។ ទាំងនេះបានបង្កឲ្យមានក្តីបារម្ភយ៉ាងខ្លាំង ដល់ប្រទេសដែលបាននិងកំពុងប្រើប្រាស់វ៉ាក់សាំង ដែលផលិតដោយចក្រភពអង់គ្លេសមួយនេះ។
ហេតុនេះហើយ ទើបអ្នកជំនាញពីអង្គការសុខភាពពិភពលោក រួមជាមួយភ្នាក់ងារឱសថអឺរ៉ុបនឹងមកជួបប្រជុំគ្នា ដើម្បីត្រួតពិនិត្យពីគុណភាពនៃវ៉ាក់សាំង AstraZeneca ឡើងវិញ ហើយគេរំពឹងថា អាចនឹងចេញសេចក្តីសម្រេចថ្មីមួយក្នុងសប្តាហ៍នេះ ថាគួរប្រើវ៉ាក់សាំង AstraZeneca បន្ត ឬត្រូវផ្អាកបណ្តោះអាសន្នសិន។
អត្ថបទទាក់ទង
មជ្ឈមណ្ឌលពិសោធន៍របស់ក្រុមហ៊ុនផលិតវ៉ាក់សាំង AstraZeneca នៅអង់គ្លេសក៏ធ្លាប់បានធ្វើការត្រួតពិនិត្យវ៉ាក់សាំងរបស់ខ្លួនឡើងវិញដែរ ថែមទាំងបានចេញមុខច្រានចោលនូវការលើកពីផលរំខានរបស់វ៉ាក់សាំង ដោយបញ្ជាក់ថា គ្មានភ័ស្ដុតាងណាមួយបញ្ជាក់ថាវ៉ាក់សាំងAstraZeneca ធ្វើឲ្យមានកំណកឈាមក្នុងសសៃនោះទេ។
បច្ចុប្បន្នមានប្រជាជនប្រមាណ ១៧ លាននាក់នៅសហគមន៍អ៊ឺរ៉ុប និងចក្រភពអង់គ្លេសបានទទួលវ៉ាក់សាំងAstraZeneca ដូសទី១រួចហើយ ក្នុងនោះមានករណីឈាមកកក្នុងសសៃតែ ៤០ ករណីប៉ុណ្ណោះគិតត្រឹមសប្តាហ៍មុននេះ។
សូមរំឭកផងដែរថា កាលពីថ្ងៃអង្គារទី១៦ មីនា ម្សិលមិញនេះ នាយករដ្ឋមន្ត្រីថៃ លោកប្រាយុទ្ធ ចាន់អូចា បានសម្រេចចាក់វ៉ាក់សាំង AstraZeneca វិញហើយ ជាមួយនឹងមន្ត្រីធំៗក្នុងជួររដ្ឋាភិបាលរបស់លោកឯទៀត ក្រោយពីលោកបានប្រកាសផ្អាកការចាក់វ៉ាក់សាំងនេះ កាលពីថ្ងៃសៅរ៍សប្តាហ៍មុន។
ដោយឡែក ប្រធានាធិបតីកូរ៉េខាងត្បូង លោក ម៉ូន ជេអ៊ីនឯណេះវិញ ទើបបានប្រកាសថា លោក និងភរិយារបស់លោក នឹងទទួលការចាក់វ៉ាក់សាំងកូវីដ-១៩ AstraZeneca នេះ នៅក្នុងសប្ដាហ៍ក្រោយនេះដែរ ពោលគឺនៅមុនពេលដែលលោក ធ្វើដំណើរទៅចក្រភពអង់គ្លេសសម្រាប់កិច្ចប្រជុំ ក្រុមប្រទេសឧស្សាហកម្មធំៗទាំង៧ ហៅកាត់ថា G7 នៅក្នុងខែមិថុនាខាងមុខនេះ។
ទោះយ៉ាងណា យើងនឹងចាំមើលបន្ដទៀតថា ក្រោយពីអ្នកជំនាញអង្គការសុខភាពពិភពលោកបានជួបពិភាក្សាគ្នាជុំវិញនឹងសុវត្ថិភាព និងប្រសិទ្ធភាពនៃវ៉ាក់សាំង AstraZeneca នេះហើយ តើនឹងមានការសម្រេចផ្លូវការបែបណាចំពោះវ៉ាក់សាំងនេះ ហើយបើមានអ្វីថ្មី ខេមបូណូមីសនឹងបន្ដជម្រាបជូនទូរទស្សនិកជនជាបន្ដទៀត៕
None
