ទុរេនកំពត

ហេតុអ្វីអ្នកដាំទុរេននៅកំពតគួរចងក្រងជាសហគមន៍?


អ្នកជំនាញ និងជាម្ចាស់ចម្ការទុរេននៅខេត្តកំពតបានផ្តល់គំនិតថា អ្នកដាំទុរេនទាំងអស់គួរតែសហការគ្នាចងជាសហគមន៍ ដើម្បីការពារគុណភាព និងកេរ្តិ៍ឈ្មោះទុរេនកំពត ក៏ដូចជាការពារការបន្លំឈ្មោះទុរេនកំពតពីឈ្មួញខិលខូច ដែលតែងតែកើតមានជារឿយៗ។ អ្នកជំនាញជឿជាក់ថា ការឈានទៅដល់ចងគ្នាជាសហគមន៍ ក៏អាចជាផ្ដល់នូវលទ្ធភាព ក្នុងការឈានទៅរកការជំរុញការនាំចេញទុរេនកំពតទៅកាន់ទីផ្សារក្រៅប្រទេសផងដែរ។
ចម្ការទុរេនខេត្តកំពត

យ៉ាងណាមិញ សម្រាប់​ឆ្នាំ​នេះ បើ​តាម​អ្នក​ដាំ​ទុរេន​កំពត​អះអាង​ថា អះអាង​ថា ទិន្នផល និង​តម្លៃ​ទុរេន​ឆ្នាំ​នេះ​មិន​មានការ​ប្រែប្រួល​គួរ​ឲ្យ​កត់សម្គាល់​នោះ​ទេ បើ​ធៀប​នឹង​ឆ្នាំ​មុន ទោះបី​បច្ចុប្បន្ន​កសិករ​ជា​ច្រើន​បាន​ងាក​មក​ដាំ​ទុន​ច្រើន​ជាង​មុន​ក៏​ដោយ​។

ឧកញ៉ា ចាន់ ស៊ី​ថា ម្ចាស់​ចម្ការ​ទុរេន​ដ៏​ធំ​ម្នាក់​នៅ​ខេត្តកំពត ស្នើ​ឲ្យ​អ្នក​ដាំ​ទុរេន​នៅ​ខេត្តកំពត​ទាំងអស់​ត្រូវ​ចេះ​សហការ​គ្នា​តាម​រយៈ​ការ​ចង​ជា​សហគមន៍ ដើម្បី​បង្កើត​សញ្ញា​សម្គាល់​ផលិតផល​ទុរេន​កំពត ដែល​ជា​រឿយ​ៗ​ត្រូវ​បាន​ឈ្មួញ​ខិលខូច​ប្រើ​ឈ្មោះ​បន្លំ​ឲ្យ​ទុរេន​នាំ​ចូល​ពី​ប្រទេស​ជិតខាង សម្រាប់​ដាក់​លក់​បន្លំ​នៅ​លើ​ទីផ្សារ​។ គោលបំណង​នៃ​ការ​ស្នើ​ឲ្យ​ចង​ជា​សហគមន៍​នេះ​គឺ​ដើម្បី​ការពារ​គុណភាព​និង​កេរ្តិ៍ឈ្មោះ​ទុរេន​កំពត និង​ចូលរួម​កាត់​បន្ថយ និង​ទប់ស្កាត់​ការ​ក្លែងបន្លំ​ពី​សំណាក់​ឈ្មួញ​ខិលខូច​មួយ​ចំនួន​។ ជាមួយ​គ្នា​នេះ ឧកញ៉ា ចាន់ ស៊ី​ថា ក៏​បាន​បង្ហាញ​ចំណុច​ពិសេស​មួយ​ចំនួន​ក្នុង​ការ​មើល​ទុរេន​កំពត​ដល់​អតិថិជន​ផង​ដែរ ដូច​ជា​ទុរេន​កំពត​មាន​សំបក​ខៀវខ្ចី បន្លា​ស្រួច និង​មាន​ក្លិនក្រអូប​ឈ្ងុយ​ឈ្ងប់​ជាដើម​។

ពាក់ព័ន្ធ​ទិន្នផល និង​តម្លៃ​ទុរេន​កំពត​នៅ​ឆ្នាំ​នេះ លោក​ឧកញ៉ា ចាន់ ស៊ី​ថា បាន​គូសបញ្ជាក់​ថា តម្លៃ​ទុរេន​កំពត​ឆ្នាំ​នេះ​អាច​លក់​ចេញ​ចន្លោះ​ពី​២​ម៉ឺន​រៀល​ទៅ​៣​ម៉ឺន​រៀល​ក្នុង​១​គីឡូក្រាម​ពោល​គឺ​ប្រហាក់ប្រហែល​នឹង​ឆ្នាំ​មុន ហើយ​ទិន្នផល​ក៏​មិន​មានការ​ប្រែប្រួល​ផង​ដែរ​។ អ្នកជំនាញ​រូប​នេះ​ជឿជាក់​ថា ទិន្នផល​ទុរេន​កំពត​អាច​នឹង​មានការ​កើនឡើង​នៅ​ក្នុង​រយៈពេល​ពីរ​ទៅ​បី​ឆ្នាំ​ខាង​មុខ ដែល​ធ្វើ​ទីផ្សារ​ទុរេន​កំពត​កាន់តែ​មានការ​ប្រកួតប្រជែង ហើយ​ក៏​រំពឹង​ថា នឹង​អាច​ជំរុញ​ឈាន​ដល់​ការ​នាំ​ចេញ​នា​ពេល​ខាង​មុខ​ផង​ដែរ​។

គួរ​បញ្ជាក់​ថា ទុរេន​ក៏​ស្ថិត​នៅ​ក្នុង​ចំណោម​ផលិតផល​សក្ដានុពល​មួយ ដែល​រាជរដ្ឋាភិបាល​តាម​រយៈ​ក្រសួងកសិកម្ម កំពុង​ខិតខំ​ជំរុញ​ដើម្បី​នាំ​ចេញ​ទៅ​កាន់​ទីផ្សារ​ចិន​ផង​ដែរ ខណៈ​ដែល​កន្លង​មក​ផ្លែ​ចេក និង​ស្វាយ​របស់​កម្ពុជា​ត្រូវ​បាន​អនុញ្ញាត​ឲ្យ​នាំ​ចេញ​ទៅ​កាន់​ប្រទេស​ចិន​រួច​ហើយ​។

តួលេខ​ពី​មន្ទី​កសិកម្ម​ខេត្តកំពត​ធ្លាប់​បាន​បង្ហាញ​ថា កាលពី​ឆ្នាំ​២០១៩ ផ្ទៃដី​ដាំ​ដុះ​ទុរេន​នៅ​ក្នុង​ខេត្ត​នេះ​មាន​ប្រមាណ​ជាង ១​ពាន់​២​រយ​ហិ​កតា ក្នុង​នោះ​ផ្ទៃដី​ដែល​ទទួលផល​បាន​ប្រមាណ​តែ ៩៤៣​ហិ​កតា​ប៉ុណ្ណោះ ដោយ​ក្នុង​មួយ​ហិ​កតា​បាន​ផល​ប្រមាណ​ជិត ១៤​តោន នាំ​ឲ្យ​ទិន្នផល​ទុរេន​សរុប​ក្នុង​ឆ្នាំ​២០១៩ មាន​ប្រមាណ​ជិត ១៣​ម៉ឺន​តោន​៕

© 2023 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


ធនាគារ ប្រ៊ីដកម្ពុជា ឧបត្ថម្ភថវិកា និងគ្រឿងឧបភោគបរិភោគដល់កុមារកំព្រា

ព័ត៌មាន
ធនាគារប្រ៊ីដ កម្ពុជា ដែលជាបុត្រសម្ព័ន្ធរបស់ក្រុមហ៊ុន វើលដ៍ប្រ៊ីដ បានឧបត្ថម្ភគ្រឿងឧបភោគបរិភោគ និងថវិកា ដល់អង្គការ “ការអភិវឌ្ឍន៍កុមារកម្ពុជ…

ប្រមុខដឹកនាំកម្ពុជា និងឡាវ មានបំណងសាងសង់ស្ពានតភ្ជាប់គ្នារវាងប្រទេសទាំងពីរ

ព័ត៌មាន
នាយកដ្ឋមន្ត្រីឡាវ បានស្នើសុំចំៗនៅចំពោះមុខសម្តេចតេជោ ហ៊ុន សែននាយករដ្ឋមន្ត្រីនៃកម្ពុជា ដើម្បីសាងសង់ស្ពានតភ្ជាប់គ្នារវាងប្រទេសទាំងពីរ ដើម្បីធ្វ…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ