ការសិក្សាមួយបង្ហាញថា ប្រទេសថៃនឹងមិនអាចសម្រេចបាននូវគោលដៅកំណើនសេដ្ឋកិច្ចរបស់ខ្លួននៅឆ្នាំ២០២៥ នោះឡើយ ប្រសិនបើប្រធានាធិបតីទើបជាប់ឆ្នោតរបស់សហរដ្ឋអាម៉េរិក លោក ដូណាល់ ត្រាំ ចាត់វិធានការដំឡើងពន្ធតាមអ្វីដែលលោកបានគំរាមកន្លងមក ព្រោះការដំឡើងពន្ធនេះវាអាចជះផលប៉ះពាល់ដល់ការនាំចេញរបស់ថៃ និងធ្វើឱ្យលុយបាតរបស់ថៃធ្លាក់ថ្លៃ។
បើយោងតាមការសែត បាងកក ប៉ុស្ដិ៍ លោក ថាណាវ៉ាត់ ផុនវិឆៃ (Thanavath Phonvichai) សកលវិទ្យាធិការនៃសកលវិទ្យាល័យសភាពាណិជ្ជកម្មថៃ អះអាងថា សេដ្ឋកិច្ចថៃ អាចនឹងខាតបង់ធ្ងន់ធ្ងរក្នុងទំហំរហូតដល់ទៅ៤,៦ពាន់លានដុល្លារអាម៉េរិក ដែលធ្វើឱ្យគោលដៅកំណើនផលិតផលក្នុងស្រុកសរុប (GDP) ដែលត្រូវបានព្យាករក្នុងរង្វង់រ៣% នឹងធ្លាក់ចុះ០,៩%។
យោងលើការសិក្សាមួយរបស់សកលវិទ្យាល័យ ស្តីពីផែនការពន្ធគយរបស់លោក ដូណាល់ ត្រាំ លោក ថាណាវ៉ាត់ ផុនវិឆៃ បានលើកឡើងថា ការដំឡើងពន្ធគយរបស់លោក ដូណាល់ ត្រាំ ច្បាស់ណាសវានឹងជះផលប៉ះពាល់ខ្លាំងដល់សេដ្ឋកិច្ចថៃ ដោយចៀសមិនផុត ហើយគោលដៅកំណើន GDP ក្នុងរង្វង់៣% របស់ប្រទេសថៃ នៅក្នុងឆ្នាំ២០២៥ កំពុងប្រឈមហានិភ័យ។
ទោះជាយ៉ាងណា ទន្ទឹមនឹងការជួបគ្រោះធំនេះ ប្រទេសថៃ ក៏នឹងទទួលបានលាភធំផងដែរនៅឆ្នាំ២០២៥ ដោយសារគោលនយោបាយពន្ធគយរបស់លោក ដូណាល់ ត្រាំ នេះ។ នេះបើយោងតាមការចុះផ្សាយរបស់កាសែត ឌឹ ណេសិន។
ក្រុមហ៊ុនប្រឹក្សាអចលនទ្រព្យអង់គ្លេស JLL ប្រចាំប្រទេសថៃ បានលើកឡើងថា វិស័យអចលនទ្រព្យរបស់ប្រទេសថៃ នឹងទទួលបានអត្ថប្រយោជន៍ពីគោលនយោបាយចិន+១ របស់ប្រធានាធិបតីទើបជាប់ឆ្នោតរបស់សហរដ្ឋអាម៉េរិក លោក ដូណាល់ ត្រាំ ដែលនឹងជំរុញឱ្យបណ្ដាក្រុមហ៊ុនបរទេសផ្លាស់ប្ដូរមូលដ្ឋាន ឬទីតាំងផលិតកម្មរបស់ពួកគេមកកាន់តំបន់អាស៊ាន និងប្រទេសថៃ ដើម្បីគេចពន្ធគយ ហើយស្ថានភាពនេះនឹងជំរុញឱ្យការលក់ដីឧស្សាហកម្មក្នុងប្រទេសថៃ មានសន្ទុះកើនឡើងនៅឆ្នាំក្រោយ៕
ដោយ: តែម សុខុម
