ការធ្វើដូច្នេះ គឺដើម្បីអាចធ្វើឲ្យក្រុមហ៊ុន Ant Group ដែលស្ថិតនៅក្នុងផ្ទាំងស៊ីបរបស់រដ្ឋាភិបាលក្រុងប៉េកាំង អាចនឹងរំកិលខ្លួនចេញពីវិបត្តិ ក៏ដូចជាផ្ទាំងស៊ីបនេះបាន។ នេះបើតាមការរាយការណ៍ទីភ្នាក់ងារព័ត៌មាន Reuters ដែលបានសម្ភាសន៍ប្រភពជិតស្និទជាមួយនឹងក្រុមហ៊ុន Ant Group នេះ។
The Wall Street Journal បានឲ្យដឹងថា លោក Jack Ma កាលពីខែវិច្ឆិកា បានជួបប្រជុំជាមួយនឹងនិយ័តករចិន ក្នុងការផ្ដល់ជូនផ្នែកខ្លះនៃក្រុមហ៊ុន Ant Group ទៅឲ្យរដ្ឋាភិបាលចិន។
ដោយឡែកភ្នាក់ងារសារព័ត៌មាន Reuters បានឲ្យដឹងដែរថា មន្ត្រីមកពីធនាគារកណ្ដាលប្រជាជនចិន PBOC និងគណៈកម្មាធិការនិយ័តករធនាគារ និងហិរញ្ញវត្ថុ និងនិយ័តករធានារ៉ាប់រងចិន (CBIRC) បានជជែកពិភាក្សាគ្នានៅអំឡុងខែមករា ដល់ ខែមីនា ដោយការជជែកគ្នានោះ ក៏មានលើកឡើងពីបញ្ហាទាក់ទងនឹងការកាត់ផ្ដាច់ទំនាក់ទំនងរវាងលោក Jack Ma និង ក្រុមហ៊ុន Ant Group ផងដែរ។
អត្ថបទទាក់ទង
ទោះយ៉ាងណា អ្នកនាំពាក្យរបស់ក្រុមហ៊ុន Ant Group បានបដិសេធចំពោះដំណឹងលេចឭថា នឹងមានការតម្រូវឲ្យលោក Jack Ma លក់ភាគហ៊ុនរបស់ខ្លួនចេញនេះ និងបានបញ្ជាក់ថា ការលក់ភាគហ៊ុនរបស់លោក Ma មិនបានពិភាក្សាជាមួយនឹងភាគីណាមួយនោះទេ។
ទោះបែបនេះក្ដី ប្រភពជិតស្និទ្ធជាមួយនឹងក្រុមហ៊ុន Ant Group បានប្រាប់ Reuters ថា ក្រុមហ៊ុននេះ សង្ឃឹមថាភាគហ៊ុនរបស់លោក Jack Ma ដែលមានតម្លៃរាប់ពាន់លានដុល្លារ អាចនឹងលក់ទៅឲ្យអ្នកវិនិយោគដែលបានវិនិយោគស្រាប់នៅក្នុងក្រុមហ៊ុន Ant Group បច្ចុប្បន្ន ឬ ក៏ជាអ្នកវិនិយោគមកពីក្រុមហ៊ុន Alibaba Group ដែលជាក្រុមហ៊ុនមេ។
ទោះយ៉ាងណា Reuters បានគូសបញ្ជាក់ថា លោក Ma មិនត្រូវបានអនុញ្ញាតឲ្យលក់ភាគហ៊ុនរបស់ខ្លួនទៅឲ្យអ្នកដែលជិតស្និទ្ធនឹងលោកនោះទេ បើមិនដូច្នេះទេ លោកនឹងត្រូវដកចេញពីក្រុមហ៊ុនទាំងស្រុង ដោយគ្មានតវ៉ាតែម្ដង។ ជម្រើសមួយទៀតនោះ គឺលោកអាចផ្ទេរភាគហ៊ុនរបស់លោកទៅឲ្យអ្នកវិនិយោគជនជាតិចិន ដែលមានទំនាក់ទំនងជាមួយនឹងរដ្ឋាភិបាលចិន។
បើទោះបីជាកន្លងមក លោក Jack Ma បានលាលែងតំណែងជានាយកប្រតិបត្តិក្រុមហ៊ុនយក្ស Alibaba ក៏ដោយ ប៉ុន្ដែលោកនៅតែបន្ដគ្រប់គ្រងលើក្រុមហ៊ុន Ant Group ដែលជាក្រុមហ៊ុនបុត្រសម្ព័ន្ធរបស់ Alibaba តែក្រុមហ៊ុន Ant គ្រុប នេះ មានឥទ្ធិពលខ្លាំងលើប្រតិបត្តិការរបស់ Alibaba ខណៈដែលលោក មានចំណែកភាគហ៊ុននៅក្នុង Ant Group ចំនួន ១០%។
សូមបញ្ជាក់ថា ថ្មីៗនេះ ក្រុមហ៊ុនយក្ស Alibaba របស់លោក Jack Ma ក៏ទើបត្រូវបានរដ្ឋាភិបាលចិនផាកពិន័យជាទឹកប្រាក់ជិត៣ពាន់លានដុល្លារ ពីបទរំលោភលើច្បាប់ពាណិជ្ជកម្ម ហើយកាលពីប៉ុន្មានខែមុននេះដែរ លោក Ma ក៏ត្រូវបានអាជ្ញាធរចិនដាក់សម្ពាធឲ្យលក់ភាគហ៊ុន ក៏ដូចជាទ្រព្យសម្បត្តិរបស់ខ្លួនចេញពីក្រុមហ៊ុនប្រព័ន្ធផ្សព្វផ្សាយមួយចំនួន ដោយក្នុងនោះ ក៏មានភាគហ៊ុនរបស់លោកនៅក្នុងក្រុមហ៊ុនកាសែត South China Morning Post ផងដែរ៕
ទស្សនាវីដេអូ៖
ចុច Like Facebook Page របស់ខេមបូណូមីស និងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
