បន្ទាប់ពីដាំក្បាលចុះ -៦,១% កាលពីឆ្នាំ២០២០ កំណើនសេដ្ឋកិច្ចថៃ នៅឆ្នាំ២០២១ ហាក់មិនសូវរំពឹងកើនឡើងខ្ពស់នោះទេ ដោយសារតែប្រទេសក្បែរខាងកម្ពុជាមួយនេះ កំពុងជាប់ដៃខ្លាំងមែនទែនក្នុងការប្រយុទ្ធទប់ទល់នឹងមេរោគកូវីដ១៩ ដែលកំពុងឆ្លងរីករាលដាលខ្លាំង។ ក្នុងនោះដែរ វិស័យទេសចរណ៍ថៃ គឺមានការប៉ះទង្គិចខ្លាំងជាងគេ ខណៈដែលកន្លងមកនេះ ថៃគឺពឹងផ្អែកខ្លាំងមែនទែន ទៅលើវិស័យទេសចរណ៍អន្តរជាតិសម្រាប់កំណើនសេដ្ឋកិច្ច។
សេចក្ដីថ្លែងការណ៍របស់ក្រុមប្រឹក្សាទេសចរណ៍ថៃ នៅថ្ងៃអង្គារសប្ដាហ៍នេះ បានឲ្យដឹថា ភ្ញៀវទេសចរអន្តរជាតិដែលចូលមកប្រទេសថៃនៅឆ្នាំនេះ ត្រូវបានរំពឹងនឹងទទួលបានត្រឹមតែប្រហែល ២៨ម៉ឺននាក់ប៉ុណ្ណោះ ដែលទាបជាងការបានព្យាករ កន្លះលាននាក់កាលពីកន្លងទៅថ្មីៗនេះ។ ការធ្លាក់ចុះ នៃចំនួនទេសចរអន្តរជាតិរបស់ថៃនេះ គឺគ្មានអ្វីក្រៅតែពីការរងឥទ្ធិពលនៃការអូសបន្លាយនៃវិបត្តិកូវីដ១៩នៅក្នុងប្រទេសនោះទេ បើទោះបីជាថៃ ខិតខំស្វះស្វែងបើកដំណើរការតំបន់ទេសចរណ៍មួយចំនួនទទួលភ្ញៀវទេសចរចាក់វ៉ាក់សាំងយ៉ាងណាក្ដី។
បើតាមក្រុមប្រឹក្សាទេសចរណ៍ថៃ វិស័យទេសចរណ៍ក្នុងប្រទេសនេះ គឺមានការបាត់បង់ការងារដល់ទៅ ៣លានកន្លែងឯណោះនៅក្នុងអំឡុងពេលមេរោគរាតត្បាតនេះ។
យ៉ាងណាមិញ ចំពោះសេដ្ឋកិច្ចថៃវិញ ត្រូវបានគេរំពឹងថា អាចនឹងវិលមករកស្ថានភាពដូចកាលពីមិនទាន់មានមេរោគរាតត្បាតវិញបាន គឺទាល់តែនៅឆ្នាំ២០២៣ឯណោះ។ នេះបើតាមការអះអាងរបស់សេដ្ឋវិទូជាន់ខ្ពស់របស់ធនាគារពិភពលោកប្រចាំប្រទេសថៃ។
សេដ្ឋវិទូរូបនេះបានព្រមានថា ការងើបឡើងវិញនៃសេដ្ឋកិច្ចថៃ នៅក្រោយវិបត្តិកូវីដ១៩ អាចនឹងមានដំណើរយឺតជាង១ឆ្នាំ ធៀបនឹងអ្វីដែលបានរំពឹងទុកនៅឆ្នាំ២០២២ ហើយការសន្និដ្ឋានបែបនេះ គឺផ្អែកទៅលើការសន្មតថា ថៃអាចនឹងចាក់វ៉ាក់សាំងជូនពលរដ្ឋបានដល់ ៧០% នៅក្នុងពាក់កណ្ដាលឆ្នាំដំបូងនៃឆ្នាំ២០២២។
អត្ថបទគួរអាន
ជាមួយគ្នានេះដែរ
សម្រាប់ឆ្នាំ២០២២ខាងមុខនេះដែរ អ្នកជំនាញក៏បានព្យាករថា
ប្រទេសថៃនឹងទទួលបានភ្ញៀវទេសចរអន្តរជាតិ ១លាន៧សែននាក់
នៅគ្រាដែលសេដ្ឋកិច្ចថៃ ត្រូវបានព្យាករថា នឹងកើនឡើង ៣,៦%ផងដែរ។
ការនាំចេញ និងវិធានការសារពើពន្ធ ក៏ត្រូវបានផ្ដល់ការគាំទ្រក្នុងពេលជាមួយគ្នា ហើយធនាគារពិភពលោក ក៏បានគាំទ្រដល់ការបង្កើនពិដានបំណុលសាធារណៈរបស់រាជរដ្ឋាភិបាលថៃផងដែរ ដើម្បីជួយដល់ការស្ដារសេដ្ឋកិច្ចឡើងវិញ។
ស្របពេលដែលធនាគារពិភពលោក ទម្លាក់ការព្យាករកំណើនសេដ្ឋកិច្ចថៃ នៅឆ្នាំ២០២១មកនៅត្រឹម ១% ក្រសួងហិរញ្ញវត្ថុរបស់ថៃឯណោះវិញ ក៏បានបន្ថយព្យាករបស់ខ្លួនផងដែរជាមួយនឹងអត្រាកំណើន១,៣% ខណៈធនាគារកណ្ដាលរបស់ថៃព្យាករថាសេដ្ឋកិច្ចថៃនឹងមានត្រឹមតែ ០,៧%តែប៉ុណ្ណោះ សម្រាប់ឆ្នាំ២០២១នេះ៕
None
