ធនាគារកណ្តាលអាម៉េរិកត្រូវបានព្យាករថា នឹងបញ្ចុះអត្រាការប្រាក់ ០,៧៥%មកវិញ នៅឆ្នាំ២០២៤

សារព័ត៌មានធំៗបានរាយការណ៍ អ្នកធ្វើការសម្រេចចិត្តនៅធនាគារកណ្តាលសហរដ្ឋអាម៉េរិក បានសម្រេចជាឯកច្ឆ័ន្ទថា នឹងបន្តអត្រាការប្រាក់ដដែលនៅក្នុងខែធ្នូនេះ ប៉ុន្តែបានបង្ហាញសញ្ញាកាន់តែសុទិដ្ឋិនិយមថា នឹងទម្លាក់អត្រាការប្រាក់មកវិញនៅក្នុងឆ្នាំ២០២៤ខាងមុខ ។

នៅក្នុងចំណោមសមាជិក ដែលត្រូវធ្វើការសម្រេចចិត្តលើបញ្ហានេះ គឺភាគច្រើននៅតែបន្តរក្សាអត្រាការប្រាក់ឲ្យនៅស្ថិតនៅក្នុងចន្លោះពី ៥,២៥ ទៅ ៥,៥ ភាគរយ ដដែល ទោះជាអត្រានេះ គឺជាអត្រាខ្ពស់បំផុតចាប់តាំងពីឆ្នាំ២០០១ មកក៏ដោយចុះ ប៉ុន្តែ អ្នកបង្កើតគោលនយោបាយសេដ្ឋកិច្ចទាំងនោះ បានគូសបញ្ជាក់ដោយភាពជឿជាក់ថា អាម៉េរិកនឹងមិនធ្វើការដំឡើងអត្រាការប្រាក់បន្ថែមទៀតឡើយ។

សេចក្តីរាយការណ៍ដដែលបាន ព្យាករថា តាមការរំពឹងទុកនៅចុងឆ្នាំ២០២៤ខាងមុខអត្រាការប្រាក់អាចនឹងទម្លាក់នៅសល់ត្រឹមប្រមាណជា ៤,៦ភាគរយប៉ុណ្ណោះ ។

លោក ជេរ៉ូម ផូវែល (Jerome Powell) ប្រធានធនាគារកណ្តាលអាម៉េរិក បានថ្លែងថា ការរឹតបន្តឹងជាប្រវត្តិសាស្ត្រនៃគោលនយោបាយរូបិយវត្ថុទំនងជានឹងបញ្ចប់ដោយសារតែអតិផរណាធ្លាក់ចុះលឿនជាងការរំពឹងទុក។

លោកបានមានប្រសាសន៍ថា នេះគឺជាលទ្ធផលដែលបានចេញមកពីការដាក់ចេញគោលនយោបាយមួយ ដែលមានប្រសិទ្ធភាពគ្រប់គ្រាន់ ដើម្បីកាន់បន្ថយអតិផរណា។ លោកបានបន្តថា ស្ថានភាពនៃហានិភ័យសេដ្ឋកិច្ចបានកំពុងតែថយចុះដល់កម្រិតសមតុល្យនៃការគ្រប់គ្រងបាន ហើយធនាគារកណ្ដាលអាម៉េរិក ក៏កំពុងតែខិតខំរុញច្រានអត្រាអតិផរណាឲ្យថយចុះមកនៅត្រឹមប្រមាណ ២ភាគរយ។

លោកបានអះអាងថា នៅពេលនេះយើងកំពុងតែឃើញស្ថានភាពវិជ្ជមានសឹងតែគ្រប់យ៉ាង ពោលគឺតាំងពីទីផ្សារការងារ និងសកម្មភាពសេដ្ឋកិច្ចផ្សេងៗ ។

លោក ឌៀន ស្វុន (Diane Swonk) អ្នកសេដ្ឋកិច្ចនៅក្រុមហ៊ុន KPMG US បានអះអាងថា ប្រសិនបើទិន្នន័យសេដ្ឋកិច្ចនៅតែបន្តវិវឌ្ឍដូចដែលវាកំពុងតែមាន ហើយស្ថានភាពនៃអតិផរណាថយចុះ វាពិតជាស្ថានភាពដ៏ប្រសើរ ដែលបញ្ជាក់ពីសុខភាពនៃវិស័យសេដ្ឋកិច្ចរបស់ប្រទេសមហាអំណាចសេដ្ឋកិច្ចមួយនេះ៕

ដោយៈ សរ សុជាតិ