បើយោងតាមនាយកប្រតិបត្តិផ្នែកផ្សព្វផ្សាយពាណិជ្ជកម្ម និងទីផ្សារ នៅក្នុងព្រឹត្តិការណ៍កីឡាអូឡាំពិក បានអះអាងថា ក្រុមហ៊ុនធំៗ ម៉ាកយីហោមួយចំនួនកំពុងពិចារណា មិនធ្វើទីផ្សារ(Marketing) នៅក្នុងទីក្រុងប៉េកាំង ដែលជាកន្លែងម្ចាស់ផ្ទះបើកទទួលរៀបចំព្រឹត្តិការណ៍កីឡាកីឡាអូឡាំពិកនោះទេ។ ម៉ាកយីហោមួយចំនួនទៀត គ្រោងនឹងដកខ្លួនពីការផ្សាយពាណិជ្ជកម្មអំឡុងពេលប្រកួត មកផ្សាយនៅក្រោយការប្រកួតវិញ។
គួរកត់សម្គាល់ថា ព្រឹត្តិការណ៍កីឡាអូឡាំពិកជាឱកាសមួយសម្រាប់ក្រុមហ៊ុនម៉ាកយីហោធំៗ ជុំវិញពិភពលោក ក្នុងការផ្សព្វផ្សាយពាណិជ្ជកម្មពីផលិតផល និងសេវាកម្មរបស់ពួកគេ ទៅកាន់ទស្សនិកជនដ៏ច្រើន ជាលក្ខណៈអន្តរជាតិ។
គួរជម្រាបថា គេមិនទាន់មានទិន្នន័យពីតម្លៃផ្សាយពាណិជ្ជកម្មសម្រាប់ព្រឹត្តិការណ៍កីឡាអូឡាំពិករដូវរងារនៅប្រទេសចិននោះទេ ប៉ុន្តែគេនៅចាំបានថា ក្នុងព្រឹត្តិកាណ៍ដដែលនេះ កាលពីឆ្នាំ២០១៨ ដែលកូរ៉េខាងត្បូងទទួលធ្វើម្ចាស់ផ្ទះ ក្រុមហ៊ុននិងម៉ាកយីហោល្បីៗ បាន ចំណាយប្រាក់ប្រមាណ ៩០០លានដុល្លារសម្រាប់ការផ្សព្វផ្សាយនៅលើទូរទស្សន៍ជាតិ ពេញមួយព្រឹត្តិការណ៍កីឡានេះ។
អត្ថបទគួរអាន
សម្រាប់ព្រឹត្តិការណ៍កីឡាអូឡាំពិក ឆ្នាំ២០២២នេះទៀតសោត ក្រុមហ៊ុនម៉ាកយីហោធំៗ ពិសេសយីហោរបស់អាមេរិកតែម្តង កំពុងស្ថិតក្រោមការដាក់គំនាបពីអ្នកនយោបាយអាមេរិក និងក្រុមអ្នកការពារសិទ្ធិមនុស្ស ឲ្យដកខ្លួនពីព្រឹត្តិការណ៍កីឡាខាងលើ។
គួររំឭកថា រដ្ឋបាលលោកចូបៃឌិន កាលពីដើមខែធ្នូនេះ បានសម្រេចធ្វើពហិការ ដោយមិនបញ្ចូនអ្នកការទូតឲ្យទៅចូលរួមអូឡាំពិកឡើយ ក្រោមហេតុផលសិទ្ធិមនុស្សនៅស៊ីនជាំង។ បន្តបន្ទាប់មក មានប្រទេសសម្ព័ន្ធមិត្តរបស់អាមេរិកមួយចំនួន បានធ្វើដូចគ្នានេះដែរ ក្នុងនោះមានអង់គ្លេស អូស្ត្រាលី និង ជប៉ុន។
សូមជម្រាបដែរថា បច្ចុប្បន្នម៉ាកយីហោទាំងឡាយ កំពុងប្រឈមមុខនឹងភារកិច្ច២នៅក្នុងព្រឹត្តិការណ៍កីឡាអូឡាំពិកនៅទីក្រុងប៉េកាំងនៅឆ្នាំក្រោយនេះ គឺទី១ ធ្វើយ៉ាងណាព្យាយាមផ្គាប់ចិត្តអ្នកនយោបាយនិងក្រុមសិទ្ធិមនុស្ស និងទី២ គឺពួកគេក៏កំពុងព្យាយាមជៀសវាង ការប៉ះទង្គិចជាមួយប្រទេសចិនដែលជាទីផ្សារដ៏ធំ ហើយដែលជាប្រភពប្រាក់ចំណេញដ៏សំខាន់សម្រាប់អាជីវកម្មពួកគេ៕
None
