អ្នកឧកញ៉ា សៀ ឫទ្ធី បង្ហើបពីផែនការវិនិយោគលើវិស័យថាមពលកកើតឡើងវិញនៅកម្ពុជា

កត្តាដែលជំរុញឲ្យអ្នកជំនួញល្បីឈ្មោះរូបនេះ ងាកមកចាប់អារម្មណ៍លើការវិនិយោគវិស័យនេះ ក្រោយសង្កេតមើលឃើញថា តម្រូវការថាមពលកកើតឡើងវិញលើសកលលោកកំពុងមានការកើនឡើង គួបផ្សំនិន្នាការវិនិយោគរបស់ក្រុមហ៊ុនធំៗលើពិភពលោកក៏កំពុងមានទំនោរកាន់តែខ្លាំងលើវិស័យមួយនេះផងដែរ។ ជាមួយគ្នានេះ អ្នកឧកញ៉ាសៀ ឫទ្ធី ក៏បានស្នើឲ្យវិនិយោគិន និងក្រុមហ៊ុនក្នុងស្រុកងាកមកផ្តោតសំខាន់លើវិស័យផលិតថាមពលកកើតឡើងវិញដើម្បីចាប់យកឱកាសទីផ្សារនាំចេញ ដែលកើតចេញពីកិច្ចព្រមព្រៀងពាណិជ្ជកម្មសេរីកម្ពុជា-ចិន និងកម្ពុជាកូរ៉េខាងត្បូងជាដើម។ 

ប្រធានក្រុមប្រឹក្សាភិបាលនៃក្រុមហ៊ុនវើលដ៍ប៊្រីដគ្រុបអ្នកឧកញ៉ា សៀ ឬទ្ធី បានបញ្ជាក់ក្នុងបទសម្ភាសន៍ផ្តាច់មុខជាមួយសារព័ត៌មានខេមបូណូមីសថា ជាទស្សនៈវែងឆ្ងាយរបស់ក្រុមហ៊ុនអ្នកឧកញ៉ា គ្រោងងាកទៅវិនិយោគលើវិស័យថាមពលកកើតឡើងវិញ ដើម្បីត្រៀមឆ្លើយតបនឹងតម្រូវការក្នុងស្រុក និងលើសកលលោកនាពេលអនាគត។ 

ការគ្រោងងាកមកវិនិយោគលើវិស័យថាមពលនេះ ធ្វើឡើងបន្ទាប់ពី អ្នកឧកញ៉ាសង្កេតឃើញតម្រូវការថាមពលកកើតឡើងវិញលើពិភពលោកកំពុងមានការកើនឡើង ជាមួយក្តីរំពឹងនឹងមានការកើនឡើងបន្ថែមទៀតនៅអនាគត។ 

ទន្ទឹមនឹងបង្ហាញពីផែនការអភិវឌ្ឍរយៈពេលវែង អ្នកឧកញ៉ា សៀ ឬទ្ធី ក៏បានបង្ហាញពីផែនការអភិវឌ្ឍរយៈពេលខ្លី និងមធ្យមផងដែរ ដែលផែនការទាំងនេះជាចំណុច ដែលអ្នកវិនិយោគត្រូវយកចិត្តទុកដាក់ក្នុងការអភិវឌ្ឍមុខជំនួញ និងដំណើរការអាជីវកម្ម។ ទោះបីវិបត្តិកូវីដ-១៩ ក្នុងឆ្នាំ២០២១ បានបង្កការរំខានដល់ការអភិវឌ្ឍគម្រោងអចលនទ្រព្យមួយចំនួនក៏ដោយ តែអ្នកជំនួញដ៏ល្បីល្បាញរូបនេះនៅតែបន្តពុះពារ និងជម្នះរហូតបញ្ចប់ការសាងសង់ដោយជោគជ័យជាមួយលទ្ធផលដ៏ល្អប្រសើរ។

អ្នកឧកញ៉ា សៀ ឬទ្ធី ត្រូវបានគេស្គាល់ថា គឺជាអ្នកជំនួញដ៏ល្បីល្បាញមួយរូបនៅកម្ពុជា ជាពិសេសលើវិស័យអចលនទ្រព្យ ដឹកជញ្ជូន និងឡូជីស្ទីក។ អ្នកជំនួញរូបនេះ កំពុងក្តោបក្តាប់លើមុខជំនួញជាច្រើនក្នុងដៃ ខណៈបច្ចុប្បន្នក្រុមហ៊ុនអ្នកឧកញ៉ា កំពុងអភិវឌ្ឍន៍គម្រោងបុរីខុនដូភូមិកីឡដ្ឋានវើលដ៍ប៊្រីដ ក្បែរពហុកីឡដ្ឋានជាតិមរតកតេជោ និង អគារ The Bridge The PEAK តំបន់សេដ្ឋកិច្ចពិសេស តំបន់បណ្តុំឧស្សាហកម្ម SME និងគម្រោងបុរីតម្លៃសមរម្យនៅទីក្រុងរណបសិរីមង្គលជាដើម៕