បើតាមទិន្នន័យពីភ្នាក់ងារអចលនទ្រព្យឈានមុខមួយនៅទីក្រុងឡុងដ៏ បានឲ្យដឹងថាក្នុងពេល៩ខែពោលគឺរាប់ចាប់ពីខែកក្កដាឆ្នាំមុនមកដល់ខែមីនាឆ្នាំ២០២១នេះ ពលរដ្ឋហុងកុងបានសម្រុកមកទិញផ្ទះនៅអង់គ្លេស ប្រមាណជិត ២ពាន់ខ្នង ដោយជាមធ្យមផ្ទះមួយខ្នងមានតម្លៃជិត ៥០ម៉ឺនផោន ឬស្មើនឹងជិត ៧០ម៉ឺនដុល្លារអាមេរិក។
ប្រការនេះបានធ្វើឲ្យពលរដ្ឋហុងកុង ក្លាយជាក្រុមអ្នកទិញផ្ទះច្រើនជាងគេលំដាប់ទី២ នៅទីក្រុងឡុងដ៏ ស្មើនឹង ៨,៥%នៃការទិញផ្ទះរបស់ជនបរទេសទាំងអស់កាលពីឆ្នាំ២០២០ ខណៈដែលប្រជាជនបារាំងឈរនៅកំពូលតារាងជាអ្នកទិញផ្ទះនៅក្រុងឡុងដ៏ច្រើនជាងគេ បន្ទាប់មកពលរដ្ឋហុងកុង, ជនជាតិចិន និងអាមេរិក។
គួររំឭកថា រដ្ឋាភិបាលអង់គ្លេសបានបើកភ្លើងបៃតងឲ្យពលរដ្ឋហុងកុងស្នើសុំទិដ្ឋាការស្នាក់នៅ និងអាចចូលសញ្ញាតិអង់គ្លេសបាន ហើយអង់គ្លេសរំពឹងថា នឹងមានពលរដ្ឋហុងកុងប្រហែល ៣០ម៉ឺននាក់ ឬស្មើនឹង៤% នៃចំនួនប្រជាជនក្នុងក្រុងហុងកុងសរុប អាចនឹងប្រើប្រាស់ទិដ្ឋាការថ្មី ដែលផ្ដល់ដោយអង់គ្លេសនៅរយៈពេល៥ឆ្នាំទៀត។ នាយករដ្ឋមន្ត្រីអង់គ្លេសធ្លាប់បានប្រកាសថា នឹងទទួលពលរដ្ឋហុងកុងឲ្យមករស់នៅអង់គ្លេសរហូតដល់ ៣លាននាក់។
អត្ថបទទាក់ទង
ការរឹតត្បិតតាមរយៈច្បាប់សន្ដិសុខជាតិ និងការកែប្រែច្បាប់បោះឆ្នោតថ្មីរបស់រដ្ឋាភិបាលលោកស៊ី ជីងពីង មកលើទីក្រុងហុងកុងបានក្លាយជាកត្តាចម្បង ធ្វើឲ្យពលរដ្ឋហុងកុងគិតចង់ភៀសខ្លួនមករស់នៅ ប្រទេសអតីតអាណានិគមរបស់ខ្លួនវិញ។
ឆ្លើយតបនឹងបញ្ហានេះ ប្រទេសចិនកាលធ្លាប់បានប្រកាសថា ខ្លួននឹងលែងទទួលស្គាល់លិខិតឆ្លងដែនរបស់អង់គ្លេសដែលកាន់កាប់ដោយប្រជាជនទីក្រុងហុងកុងទៀតហើយ ខណៈដែរអាជ្ញាធរហុងកុងក៏បានអំពាវនាវឲ្យរដ្ឋាភិបាលបរទេសឈប់ទទួលស្គាល់លិខិតឆ្លងដែនអង់គ្លេស ដែលកាន់កាប់ដោយពលរដ្ឋហុងកុងដូចគ្នាដែរ។
សូមបញ្ជាក់ថា អង់គ្លេសគឺជាប្រទេសដែលធ្លាប់បានដាក់អាណានិគមលើទីក្រុងហុងកុង ហើយអង់គ្លេសក៏បានផ្ដល់ហុងកុងទៅឲ្យចិនគ្រប់គ្រងវិញនៅឆ្នាំ១៩៩៧ ជាមួយនឹងការធានាការពារឲ្យបាននូវសេរីភាពជាកក្តាស្នូល, ស្វ័យភាពទូលំទូលាយ និងរបៀបរស់នៅបែបមូលធននិយម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
