អេស៊ីលីដាទាន់ចិត្តបន្ថែមមុខងារថ្មី បង់ប្រាក់ថ្លៃសំរាម និងសំណល់រឹង ក្នុងរាជធានីភ្នំពេញ

ឥឡូវនេះ​អេ​ស៊ី​លី​ដា​ទាន់​ចិត្តបាន​បន្ថែម​មុខងារ​ថ្មី​មួយទៀត​ដើម្បី​សម្រួល​ដល់​អតិថិជន​ឲ្យ​កាន់ តែ​ងាយស្រួល និង​សន្សំ​សំចៃ​ពេលវេលា គឺ​បង់ប្រាក់​ថ្លៃ​សំរាម និង​សំណល់​រឹង នៅ​រាជធានី​ភ្នំពេញ នៅ​ក្នុង App របស់​ខ្លួន​។ សម្រាប់​ការ​បង់ប្រាក់​ថ្លៃ​សំរាម និង​សំណល់​រឹង តាម​អេ​ស៊ី​លី​ដា​ទាន់ចិត្ត​ផ្ទាល់ខ្លួន មិន​គិត​កម្រៃ​សេវា​ចាប់ពី​ខែកុម្ភៈ រហូត​ដល់​ខែមិថុនា ឆ្នាំ​២០២០  ផុ​តពីនេះទៅ​នឹង​ត្រូវ​បង់​ថ្លែ​សេវា​ជា​ធម្មតា​ទៅ​តាម​តម្លៃ​កំណត់​គឺ ៥០០​រៀល​ក្នុង​មួយ​ដង ។

តាម​ការ​អះអាង​របស់​លោកស្រី សុខ សោភា បាន​ឲ្យ​ដឹង​ទៀត​ថា ដើម្បី​បង់ប្រាក់​ថ្លៃ​សំរាម និង​សំណ​ល់​រឹង​នៅ​រាជធានី​ភ្នំពេញ​បាន ចំពោះ​អតិថិជន​ដែល​បាន​ភ្ជាប់​សេវា​អេ​ស៊ី​លី​ដា​ទាន់ចិត្ត​នេះ ហើយ​ត្រូវធ្វើ​បច្ចុប្បន្នភាព (Update) សេវា​នេះ​ជា​ថ្មី ទើប​ឃើញ​មាន​ប៊ូ​តុង​មួយ​ដែល​មាន​មុខងារ​សម្រាប់​បង់ថ្លៃ​សំរាម និង​សំណល់​រឹង នៅ​រាជធានី​ភ្នំពេញ ចំពោះ​អតិថិជន​ដែល​ពុំ​ទាន់​បាន​ភ្ជាប់ សូម​ទាញ​យក​កម្មវិធី​នេះ​បញ្ចូល​ក្នុង​ទូរស័ព្ទ​ដៃ​ពី App Store ឬ Google Play ។ រហូត​មក​ដល់​ពេល​នេះ អតិថិជន​ដែល​បាន​ភ្ជាប់​សេវា​ដ៏​ទំនើប​នេះ​ប្រើប្រាស់​មាន​រហូត​ដល់​ជាង ១,៣ លាន​នាក់​ហើយ ។

ខាងក្រោម​នេះ​ជា​របៀប​បង់ថ្លៃ​សំរាម និង​សំណល់​រឹង ក្នុង​រាជធានី​ភ្នំពេញ តាម​រយៈ​អេ​ស៊ី​លី​ដា​ទាន់ចិត្ត​ដូច​ខាងក្រោម​៖

១. ចូល​ប្រើ​សេវា (Login) ២. ជ្រើសរើស​ម៉ឺ​នុយ “​ទូទាត់​វិក្កយបត្រ​” ៣. ជ្រើសរើស “​រដ្ឋាករ​ស្វ័​យ​ត​គ្រប់គ្រង​សំរាម និង​សំណល់​រឹង​” ៤. ជ្រើសរើស​គណនី​ផ្ទេរ​ចេញ ៥. បញ្ចូល​លេខ​សំគាល់​អតិថិជន (ID) ដែល​មាននៅ​ក្នុង​វិក្កយបត្រ​អគ្គិសនី​របស់​លោក​អ្នក ៦. ជ្រើសរើស​ប៊ូ​តុង “​យល់ព្រម​” ៧. ផ្ទៀងផ្ទាត់​ប្រតិបត្តិការ (​លេខ​គណនី លេខ​សំគាល់​អតិថិជន ចំនួន​ទឹកប្រាក់​ត្រូវ​ទូទាត់ ។​ល​។​)​និង ៨. ជ្រើសរើស​ប៊ូ​តុង “​ទូទាត់​”៕