តាមរយៈការតភ្ជាប់ ដំណាក់កាលទី១៖ Weixin Pay ស្កេន KHQR នៅកម្ពុជា អ្នកប្រើប្រាស់កម្មវិធី Weixin Pay (WeChat Pay) ជាពិសេសភ្ញៀវទេសចរចិន ដែលមកទស្សនា និងកម្សាន្តនៅកម្ពុជា អាចស្កេន អេស៊ីលីដា KHQR ដើម្បីទូទាត់ថ្លៃទំនិញ និងសេវាកម្មនៅតាមហាង និងអាជីវកម្មរបស់ដៃគូអេស៊ីលីដា ដែលទទួលការទូទាត់តាម KHQR បានយ៉ាងងាយស្រួល រហ័ស និងសុវត្ថិភាពខ្ពស់។
សេវាទូទាត់ឆ្លងដែននេះ គឺជាផ្នែកមួយនៃការតភ្ជាប់ប្រព័ន្ធទូទាត់រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលត្រូវបានដាក់ឱ្យដំណើរការជាផ្លូវការ ដោយ ធនាគារជាតិនៃកម្ពុជា កាលពីថ្ងៃទី១៨ ខែសីហា ឆ្នាំ២០២៦។
សម្រាប់ពាណិជ្ជករដែលជាដៃគូអាជីវកម្មរបស់ធនាគារ អេស៊ីលីដា ការតភ្ជាប់នេះផ្តល់នូវភាពងាយស្រួលក្នុងការទទួលការទូទាត់ថ្លៃទំនិញ ឬសេវាកម្ម ពីសំណាក់ភ្ញៀវទេសចរបរទេស ពិសេសទេសចរចិន ដោយមិនចាំបាច់ឱ្យអតិថិជនប្រើក្រដាសប្រាក់ ឬស្វែងរកមធ្យោបាយទូទាត់ផ្សេងទៀតនោះឡើយ។ ភ្ញៀវទេសចរចិន អាចប្រើកម្មវិធី Weixin Pay របស់ខ្លួន ស្កេនអេស៊ីលីដា KHQR ដែលមាននៅតាមទីតាំងអាជីវកម្មទូទាំងប្រទេសកម្ពុជា ដើម្បីទូទាត់សម្រាប់ការទិញទំនិញ ទទួលទានអាហារ ការស្នាក់នៅ ការធ្វើដំណើរ និងសកម្មភាពកម្សាន្តផ្សេងៗ។
បច្ចុប្បន្ន ធនាគារ អេស៊ីលីដា មានអ្នកប្រើប្រាស់ អេស៊ីលីដា ស៊ូភើអេប ច្រើនជាង ៥,៩៧ លាននាក់ និងមានដៃគូអាជីវកម្មសរុបជាង ០,៨៦ លាននាក់ ដែលជាបណ្តាញដ៏ធំទូលាយសម្រាប់ការទូទាត់ឌីជីថលនៅកម្ពុជា។
តាមរយៈការពង្រីកការតភ្ជាប់ការទូទាត់ឆ្លងដែន អេស៊ីលីដា បន្តផ្តល់ជូនដំណោះស្រាយទូទាត់ឌីជីថល ដែលជួយឱ្យពាណិជ្ជករ និងដៃគូអាជីវកម្ម ទទួលការទូទាត់ពីអតិថិជនបានកាន់តែងាយស្រួល រហ័ស និងប្រកបដោយប្រសិទ្ធភាព ព្រមទាំងចូលរួមបើកឱកាសអាជីវកម្មថ្មីៗ និងជំរុញការទាក់ទាញភ្ញៀវទេសចរចិនមកកម្ពុជាកាន់តែច្រើនឡើងផងដែរ។
