សេចក្តីប្រកាសព័ត៌មានដដែល បានឲ្យដឹងថា ក្នុងរយៈពេល ៨ខែនេះ ភ្ញៀវទេសចរបរទេសជាង ១លាន ៥សែននាក់ បានទិញសំបុត្រចូលទស្សនារមណីយដ្ឋានអង្គរ ដែលតួលេខនេះមានការធ្លាក់ចុះប្រមាណ ១១ភាគរយ បើធៀបនឹងរយៈពេលដូចគ្នា កាលពីឆ្នាំ២០១៨។
ដោយឡែក សម្រាប់ខែសីហា ឆ្នាំ២០១៩នេះ ចំនួនភ្ញៀវទេសចរបរទេស ដែលចូលមកកម្សាន្តនៅរមណីយដ្ឋានអង្គរ មានចំនួនជាង ១សែន ៥ម៉ឺននាក់ និងផ្តល់ប្រាក់ចំណូលជាង ៧លានដុល្លារអាមេរិក ហើយក្នុងនោះ ភ្ញៀវទេសចរជនជាតិចិន ឈរលំដាប់លេខ១ មានចំនួនច្រើនជាងគេ គឺប្រមាណ ៥ម៉ឺននាក់ ស្មើនឹង ៣៦ភាគរយនៃចំនួនភ្ញៀវទេសចរសរុប។
អត្ថបទទាក់ទង
តាមការឲ្យដឹងពីក្រសួងទេសចរណ៍ គឺថា នាឆ្នាំ២០១៨ កម្ពុជាទទួលបានភ្ញៀវទេសចរអន្តរជាតិជាង ៦លាន ២សែននាក់ កើនឡើង ១០% និងនាំមកនូវប្រាក់ចំណូលប្រមាណ ៤ពាន់ ៣រយលានដុល្លារអាមេរិក ហើយនៅឆ្នាំ២០១៩ កម្ពុជា រំពឹងថា នឹងទទួលភ្ញៀវទេសចរអន្តរជាតិប្រមាណ ៦លាន ៧សែននាក់ ហើយនៅឆ្នាំ២០៣០ ប្រមាណ ១៥លាននាក់ ដោយរំពឹងរកចំណូលបានប្រមាណ ១០ពាន់លានដុល្លារអាមេរិក និងបង្កើតឱកាសការងារប្រមាណ ២លានកន្លែង។
លើសពីនេះទៅទៀត ភ្ញៀវទេសចរចិន គឺជាទីផ្សារដែលធំជាងគេលេខមួយរបស់កម្ពុជា ក្នុងរយៈពេលប៉ុន្មានឆ្នាំចុងក្រោយនេះ ដែលកាលពីឆ្នាំ២០១៨ កន្លងទៅ កម្ពុជាទទួលបានទេសចរចិនចំនួន ២លាននាក់ កើនឡើង ៣៣% ហើយនៅឆ្នាំ២០១៩នេះ រំពឹងថា ភ្ញៀវទេសចរចិននឹងកើនឡើងដល់ ២លាន ៦សែននាក់ និង ៣លាននាក់ នៅឆ្នាំ២០២០៕
