តាមការបញ្ជាក់របស់លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី ទៅកាន់អ្នកសារព័ត៌មាននៅក្រោយជំនួបរវាង សម្តេចតេជោ ហ៊ុន សែន និងលោកមីន អ៊ុងឡាំង នៅថ្ងៃទី២៦ ខែមករា បានឲ្យដឹងថា សម្ដេចតេជោ នាយករដ្ឋមន្ត្រី ក្នុងនាមជាប្រធានអាស៊ានបានគូសបញ្ជាក់ច្បាស់ៗ នូវការអំពាវនាវរបស់សម្ដេចទៅកាន់លោក មីន អ៊ុងឡាំង មាន ៤ចំណុច ៖
ទី១ សម្តេចតេជោ ហ៊ុន សែន បានឲ្យលោកខិតខំអនុវត្តនូវកិច្ចព្រមព្រៀងដោយឯកច្ឆន្ទ ៥ចំណុចដែលប្រមុខរដ្ឋាភិបាលអាស៊ាន បានឯកភាពគ្នាកាលពីខែមេសា ឆ្នាំ ២០២១ កន្លងទៅនេះ។
ទី២ សម្ដេចតេជោ បានស្នើសុំឲ្យលោក បង្កលក្ខណៈធ្វើយ៉ាងណាឱ្យប្រេសិតពិសេសប្រធានអាស៊ាន ទៅទស្សនកិច្ចនៅមីយ៉ាន់ម៉ាជាលើកដំបូង នាពេលខាងមុខ។
ទី៣ សម្ដេចតេជោ ហ៊ុន សែន អំពាវនាវឲ្យលោក មីន អ៊ុងឡាំង និងភាគីទាំងអស់ពាក់ព័ន្ធត្រូបតែបញ្ឈប់អំពើហិង្សា និងឈានឆ្ពោះទៅដល់ចំណុចឲ្យមានបទឈប់បាញ់នៅពេលខាងមុខ។
ជាមួយគ្នានេះ សម្ដេចតេជោ ហ៊ុន សែន ក៏បានសម្ដែងនូវការបារម្ភចំពោះអំពើហិង្សា ក្រោយពីការទស្សនកិច្ចរបស់សម្ដេចទៅកាន់មីយ៉ាន់ម៉ា កាលពីថ្ងៃទី០៧ និងថ្ងៃទី០៨ ខែមករា ឆ្នាំ២០២២ កន្លងទៅ ដោយសម្ដេច បានស្នើសុំធ្វើយ៉ាងណាឱ្យភាគីទាំងអស់បង្ហាញ នូវភាពអត់ធ្មត់ដើម្បីធ្វើយ៉ាងណាឈានទៅដល់បទឈប់បាញ់។
អត្ថបទគួរអាន
និងទី៤ សម្ដេចតេជោ ហ៊ុន សែន បានអំពាវនាវដោយអញ្ជើញលោក មីន អ៊ុងឡាំង ចូលរួមជាមួយនឹងបណ្តាប្រទេសអាស៊ាន ដើម្បីផ្ដល់ជំនួយមនុស្សធម៌ទៅកាន់ប្រទេសមីយ៉ាន់ម៉ាដែលប្រជាជនកំពុងត្រូវការបំផុត។
សូមបញ្ជាក់ថា ក្នុងជំនូបជាមួយនាយករដ្ឋមន្ត្រីម៉ាឡេស៊ី កាលពីថ្ងទី ២៥ មករា ឆ្នាំ២០២២ សម្ដេចតេជោ ហ៊ុន សែន ក៏បានបញ្ជាក់ផងដែរថា ស្ថានភាពមីយ៉ាន់ម៉ា កំពុងតែស្មុគស្មាញដោយសារតែប្រទេសនេះ មានរដ្ឋាភិបាល២។ សម្តេចក៏បានបញ្ជាក់ផងដែរថា សម្ដេចនឹងអញ្ជើញលោក មីន អ៊ុងឡាំង ចូលរួមកិច្ចប្រជុំអាស៊ាន ប្រសិនបើមានវឌ្ឍនភាពនៅក្នុងការអនុវត្តចំណុចទាំង៥ ដែលបានឯកភាពជាឯកច្ឆ័ន្ទជាមួយប្រមុខរដ្ឋាភិបាលអាស៊ាន ប៉ុន្តែប្រសិនបើមិនបានអនុវត្តន៍ឲ្យមានវឌ្ឍនភាពទេនោះ លោក មីន អ៊ុងឡាំង ក៏ត្រូវត្រៀមអ្នកតំណាងចូលរួមប្រជុំអាស៊ាន ដែលមិនមែនជាអ្នកនយោបាយ៕
None
