នៅក្នុងកិច្ចប្រជុំកំពូលខ្សែក្រវ៉ាត់និងផ្លូវ តាមប្រព័ន្ធវីដេអូអនឡាញនៅក្នុងសប្តាហ៍នេះ រដ្ឋមន្ត្រីអាស៊ានបាននិយាយថា តំបន់អាស៊ានទាំងមូលទទួលបានអត្ថប្រយោជន៍ជាច្រើនពីហេដ្ឋារចនាសម្ព័ន្ធ និងការតភ្ជាប់បែបឌីជីថល ប៉ុន្តែរដ្ឋមន្ត្រីអាស៊ាននៅតែសង្កត់ធ្ងន់ថា ប្រទេសទាំង១០ ត្រូវការឱកាសវិនិយោគច្រើនជាងមុនបន្ថែមទៀតពីគម្រោងផ្លូវមួយខ្សែក្រវ៉ាត់មួយ ដើម្បីយកមកប៉ះប៉ូវ និងកាត់បន្ថយការខូចខាតដល់សេដ្ឋកិច្ចដែលបង្កឡើងដោយវិបត្តិកូវីដ១៩។
ក្នុងនោះអនុរដ្ឋមន្ត្រីពាណិជ្ជកម្មថៃ លោក សានសឺន សាម៉ាឡាប (Sansern Samalap) បាននិយាយចំៗថា ៖ លោកបានមើលឃើញពីទិដ្ឋភាពជាក់ស្តែងជាច្រើន និង ភាពដែលអាចទៅរួច សម្រាប់ចិន ក្នុងការបន្ថែមការវិនិយោគ និងជំរុញដំណើរការវិនិយោគដែលមានស្រាប់ឲ្យបានលឿនផងដែរ។
មន្ត្រីជាន់ខ្ពស់ថៃរូបនេះបានបង្ហាញ ស្តីពីគម្រោងផ្លូវដែកល្បឿនលឿនតម្លៃជិត ៦ពាន់លានដុល្លារ តភ្ជាប់ប្រទេសចិន និងប្រទេសថៃ ដែលត្រូវបានពន្យាពេលម្តងហើយម្តងទៀតចាប់តាំងពីខែតុលាមក ហើយមកទល់នឹងពេលនេះ គម្រោងខាងលើទើបចាប់ផ្តើមសាងសង់ក្នុងដំណាក់កាលទី១ ដោយគ្រោងនឹងបញ្ចប់ការសាងសង់នៅឆ្នាំ២០២៦។
ភាគីថៃបានស្នើសុំឲ្យចិនជួយពន្លឿនការសាងសង់គម្រោងខាងលើនេះ ដោយបានអះអាងថាវាជាគម្រោងផ្លូវរថភ្លើងល្បឿនលឿនដែលនឹងជួយសម្រួលដល់ការដឹកជញ្ជូនក្នុងតំបន់ និងជាច្រកទ្វាតភ្ជាប់កាន់តែជិតស្និទ្ធរវាងចិននិងតំបន់អាស៊ានទាំងមូល។
អត្ថបទគួរអាន
ក្រៅពីភាគីថៃ ក៏មានដែររដ្ឋមន្ត្រីមកពីសិង្ហបុរី និង ឥណ្ឌានេស៊ីជាដើម បានគូសបញ្ជាក់ថា គំនិតផ្តួចផ្តើមផ្លូវមួយខ្សៃក្រវ៉ាត់របស់ចិនពិតជាមានសារៈសំខាន់សម្រាប់ការអភិវឌ្ឍសេដ្ឋកិច្ចរបស់អាស៊ាន និងជាពិសេសជួយជ្រុមជ្រែងការងើបឡើងវិញនៃសេដ្ឋកិច្ចតំបន់បន្ទាប់ពីកូវីដ១៩។
សូមជម្រាបថា សម្រាប់ភាគីអាស៊ាន គំនិតផ្តួចផ្តើមផ្លូវមួយខ្សែក្រវ៉ាត់ជាកាដូ និងជាផលប្រយោជន៍ជាតិដ៏ធំ ប៉ុន្តែសម្រាប់លោកខាងលិច គម្រោងនេះត្រូវបានគេមើលឃើញថាជាការព្យាយាមពង្រីកឥទ្ធិពលទាំងសេដ្ឋកិច្ច និងនយោបាយរបស់មហាអំណាចចិន។ ជាក់ស្តែងដើម្បីទប់ទល់ និងគម្រោងនេះក្រុមប្រទេស G7 បានបង្កើតឡើងនូវគម្រោងមួយស្រដៀងគ្នានេះដែរ មានឈ្មោះថា «B3W» ឬ «Build Back Better World Initiative» មានន័យថា គំនិតផ្តួចផ្តើមកសាងពិភពលោកឲ្យប្រសើរឡើងវិញ» ដើម្បីប្រកួតប្រជែងនឹងគម្រោងមួយរបស់ចិន៕
None
