អតីតនាយករដ្ឋមន្ត្រីអូស្ត្រាលី និងបច្ចុប្បន្នជាប្រេតសិតពិសេសផ្នែកពាណិជ្ជកម្ម លោក តូនី អាបាត់ (Tony Abbott) ក្នុងដំណើរទស្សនកិច្ចទៅកាន់រដ្ឋធានីញ៉ូដេលី ប្រទេសឥណ្ឌា បានគូសបញ្ជាក់ពីសារសំខាន់នៃចំណងការទូត សេដ្ឋកិច្ច និងពាណិជ្ជកម្មរវាងប្រទេសទាំងពីរ ដែលសុទ្ធសឹងជាប្រទេសប្រជាធិបតេយ្យធំៗក្នុងពិភពលោក ដើម្បីងាកចេញពីប្រទេសចិន។
លោក តូនី បានគូសបញ្ជាក់ប្រាប់កាសែតក្នុងស្រុកអូស្ត្រាលីបន្ថែមទៀតថា ឥណ្ឌានឹងក្លាយជាដៃគូរពាណិជ្ជកម្មទ្វេភាគីដ៏ធំមួយរបស់អូស្ត្រាលី ជំនួសប្រទេសចិន ដែលកំពុងតែពាក់មុខយក្សដាក់គ្នាយ៉ាងខ្លាំង ជាពិសេសភាពប្រេះឆាផ្នែកពាណិជ្ជកម្ម។
គួរជម្រាបថា តូនី អាបាត់ អតីតនាយករដ្ឋមន្ត្រីអូស្ត្រាលីរូបនេះ ធ្លាប់បានដឹកនាំឲ្យអូស្ត្រាលី សម្រេចបានកិច្ចព្រមព្រៀងពាណិជ្ជកម្មទ្វេភាគីជាមួយចិនលើកដំបូងបំផុត កាលពីឆ្នាំ ២០១៥ គ្រាដែលលោកនៅកាន់តំណែង។ លោកយល់ច្បាស់ពីសកម្មភាព និងគោលនយោបាយការបរទេស និងពាណិជ្ជកម្មរបស់ចិន ហេតុនេះហើយទើបបច្ចុប្បន្ន ក្នុងនាមជាប្រេសិតពិសេសផ្នែកពាណិជ្ជកម្ម លោកបានងាកទៅរកប្រទេសឥណ្ឌា ដែលជាទីផ្សារដ៏ធំមួយផងដែរនៅអាស៊ី ជំនួសឲ្យអ្វីដែលបានខូចខាត ក្នុងទំនាក់ទំនងពាណិជ្ជកម្មជាមួយចិន។
អត្ថបទគួរចាប់អារម្មណ៏
យ៉ាងណាមិញ ពាណិជ្ជកម្មរវាងប្រទេសទាំងពីរត្រូវបានគេមើលឃើញថា ភាគីឥណ្ឌារមែងជាអ្នកទទួលបានផលចំណេញច្រើនជាង ក្នុងការនាំចេញផលិតផលកសិកម្មរបស់ខ្លួនមកក្នុងទីផ្សារអូស្ត្រាលី ជាជាងការនាំចេញផលិតផលអូស្ត្រាលីមកក្នុងទីផ្សារឥណ្ឌា។
គួររំឭកថា ចំណងមិត្តភាពទ្វេភាគីនៃប្រទេសអូស្ត្រាលី និងចិន បានផ្តើមតានតឹងនៅឆ្នាំ២០១៨នៅពេលប្រទេសអូស្ត្រាលីបានក្លាយជាប្រទេសដំបូងគេ ដែលបានហាមជាសាធារណៈពីការប្រើប្រាស់បច្ចេកវិទ្យាយក្សរបស់ចិនគឺ បណ្តាញ 5G របស់ក្រុមហ៊ុន Huawei។ ក្រោយមក ប្រទេសទាំងពីរកាន់តែមើលមុខគ្នាលែងចំ នៅពេលដែលអូស្ត្រាលីបានទទូចឲ្យមានការស៊ើបអង្កេតឯករាជ្យមួយ ពីប្រភពដើមនៃការឆ្លងរីករាលដាលនៃជំងឺកូវីដ១៩ ហើយជាការសងសឹកចិនបានបង្កជម្លោះពាណិជ្ជកម្មជាមួយអូស្ត្រាលីវិញ តាមរយៈការតម្លើងពន្ធកប់ពពកលើទំនិញរបស់អូស្រាលី ជាពិសេសលើទំនិញស្រាក្រហម៕
None
