យោងតាមសារព័ត៌មាន VN Expressក្រសួងសុខាភិបាលវៀតណាមបានស្នើឲ្យចេញបម្រាមចំពោះការលក់ស្រានិងស្រាបៀរ នៅក្នុងក្លិបខារ៉ាអូខ ដើម្បីកាត់បន្ថយការប្រើប្រាស់គ្រឿងស្រវឹង នៅក្នុងប្រទេសវៀតណាម។
បម្រាមដែលគ្រោងនឹងស្នើឡើងនេះ ជាផ្នែកមួយនៃសេចក្ដីព្រាងច្បាប់ដើម្បីកាត់បន្ថយផលប៉ះពាល់អវិជ្ជមាននៅការសេពគ្រឿងស្រវឹង។
អានអត្ថបទទាក់ទងផ្សេងទៀត
សេចក្ដីព្រាងច្បាប់ក៏ហាមផងដែរចំពោះការផ្សាយពាណិជ្ជកម្មស្រានិងស្រាបៀរដែលមានជាតិអាល់កុលលើស ១៥% ចំណែកឯផលិតផលគ្រឿងស្រវឹងដែលមានជាតិអាល់កុលតិចជាង ១៥% ផ្សាយពាណិជ្ជកម្មបានតែពេលយប់ គឺពីម៉ោង ១០យប់ រហូតដល់ ៦ភ្លឺប៉ុណ្ណោះ។
លើសពីនេះទៀត សេចក្ដីព្រាងច្បាប់ចែងថា ក្រុមហ៊ុនស្រានិងស្រាបៀរមិនអនុញ្ញាតឲ្យចូលរួមឧបត្ថម្ភកម្មវិធីក្នុងព្រឹត្តិការណ៍វប្បធម៌ សិល្បៈ គាំពារសុខភាព អប់រំ កីឡា ឬកម្សាន្តឡើយ។
សេចក្ដីព្រាងច្បាប់នេះគ្រោងនឹងដាក់ជូនរដ្ឋសភាវៀតណាម នៅឆ្នាំក្រោយ សម្រាប់ការឆ្លងនិងអនុម័តនៅឆ្នាំ២០១៩។
ការសិក្សាមួយរបស់ក្រសួងសុខាភិបាលវៀតណាម និងអង្គការសុខភាពពិភពលោក (WHO) កាលពីឆ្នាំទៅមិញ បានបង្ហាញថា បុរសវៀតណាម ៧៧% សេពគ្រឿងស្រវឹង ពោលគឺទទួលទានស្រា និងស្រាបៀរ ក្នុងនោះជិតពាក់កណ្ដាលទទួលទានក្នុងកម្រិតគ្រោះថ្នាក់។
យោងតួលេខឆ្នាំ២០១៦ ពលរដ្ឋវៀតណាមផឹកស្រានិងស្របៀរ ៣,៨ពាន់លីត្រកាលពីឆ្នាំទៅ ដែលបើគិតជាមធ្យម គឺស្មើនឹង ៤២លីត្រក្នុងមនុស្សម្នាក់។ នៅអាស៊ីអាគ្នេយ៍ ប្រទេសវៀតណាមប្រើប្រាស់ស្រានិងស្រាបៀរច្រើនជាងគេបំផុតទីពីរ បន្ទាប់ពីប្រទេសថៃ៕
