មន្រ្តីជាន់ខ្ពស់ អាកាសចរណ៍ស៊ីវិល ជឿជាក់ថា តាមរយៈទស្សនទាន និងយុទ្ធសាស្រ្តថ្មីរបស់ក្រុមហ៊ុននេះ វានឹងធ្វើឱ្យទីផ្សារក្នុងស្រុកមានភាពប្រសើរឡើងជាងមុន ហើយអ្នកដំណើរកាន់តែមានទំនុកចិត្តលើការផ្ដល់សេវាផងដែរ។
ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល បានគូសបញ្ជាក់ថា ការផ្លាស់ប្ដូរឈ្មោះ ក្រុមហ៊ុន កម្ពុជា អង្គរអ៊ែរ មកជា អាកាសចរណ៍ជាតិ កម្ពុជា ក៏ដោយសារតែក្រុមហ៊ុន មានទស្សនទាន និងយុទ្ធសាស្រ្តដើម្បីពង្រឹង និងពង្រីកនូវសេវារបស់ខ្លួនដើម្បីធ្វើឱ្យមានភាពប្រសើរឡើងនូវអ្វីដែលមានស្រាប់ និងឆ្ពោះទៅបើកទីផ្សារថ្មីៗនៅក្នុងតំបន់។ តាមមន្រ្តីជាន់ខ្ពស់រូបនេះ អាកាសចរណ៍ជាតិ កម្ពុជា មានទិសដៅទិញយន្តហោះ ប្រភេទ ATR ៧២-៦០០ ចំនួន៣គ្រឿងថែមទៀត។ យន្តហោះដែលគ្រោងធ្វើការបញ្ជាទិញនេះ ត្រូវបានរៀបចំឡើងដោយមានកន្លែងអង្គុយពីរចំណាត់ថ្នាក់ ដូចជា ចំណាត់ថ្នាក់ Business និងចំណាត់ថ្នាក់ Economics។ តាមរយៈទស្សនទាន និងយុទ្ធសាស្រ្តថ្មីនេះ ត្រូវបានឯកឧត្តម ស៊ីន ចាន់សិរីវុត្ថា ជឿជាក់ថា វានឹងធ្វើឱ្យទីផ្សារក្នុងស្រុកមានភាពប្រសើរឡើងជាងមុន ហើយអ្នកដំណើរកាន់តែមានទំនុកចិត្តលើការផ្ដល់សេវាផងដែរ។
បើតាមអ្នកនាំពាក្យរដ្ឋលេខាធិការដ្ឋាន អាកាសចរណ៍ស៊ីវិល យន្តហោះថ្មីដែលមានការបញ្ជាទិញទាំង៣គ្រឿង ត្រូវបានគេរំពឹងថា នឹងដាក់ប្រើប្រាស់នាពេលឆាប់ៗខាងមុខ។ ការដាក់ឱ្យប្រើប្រាស់យន្តហោះថ្មីនេះ គឺដើម្បីអនុវត្តយុទ្ធសាស្ត្រ អភិវឌ្ឍន៍របស់រាជរដ្ឋាភិបាលកម្ពុជា បម្រើឱ្យការហោះហើរក្នុងស្រុកប្រកបដោយវិជ្ជាជីវៈ បម្រើប្រជាជនកម្ពុជា ឱ្យកាន់តែប្រសើរឡើង និងបង្កើនការហោះហើរក្នុងតំបន់បន្ថែមទៀត ដូចជាទៅកាន់ប្រទេសថៃ និង វៀតណាម ផងដែរ៕
អត្ថបទ៖ បូ ដូឡា
