ឯកឧត្តម ប៉ែន សុវិជាតិ អ្នកនាំពាក្យឆ្លាស់វេននៃក្រសួងពាណិជ្ជកម្ម បានគូសបញ្ជាក់ថា ការរៀបចំនីតិវិធីផ្ទៃក្នុងសម្រាប់ការចូលធរមានកិច្ចព្រមព្រៀងពាណិជ្ជកម្មសេរីកម្ពុជា-ចិន ត្រូវបានបង្កការរំខានមួយចំនួនដោយសារការឆ្លងរាតត្បាតនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។ រំខាន ដោយសារាជរដ្ឋាភិបាលត្រូវយកពេលវេលាទៅដោះស្រាយបញ្ហាអាទិភាពពាក់ព័ន្ធបញ្ហាវិបត្តិជំងឺកូវីដ-១៩។
ឯកឧត្តមបានបញ្ជាក់ប្រាប់សារព័ត៌មានខេមបូណូមីសតាមតេឡេក្រាមដូច្នេះថា៖«កន្លងមកដោយសារតែកម្ពុជាជួបប្រទះការរំខានខ្លះដោយសារវិបត្តិកូវីត-១៩ ទាក់ទងព្រឹត្តិការណ៍២០កុម្ភៈ ដែលទាមទារឲ្យរាជរដ្ឋាភិបាលត្រូវប្រមូលផ្តុំការយកចិត្តទុកដាក់លើការងារអាទិភាពមួយចំនួន ដើម្បីដោះស្រាយវិបត្តិ»។
ទោះបីយ៉ាងនេះក្តី ឯកឧត្តម បានសង្កត់ធ្ងន់ថា FTA កម្ពុជា-ចិននឹងចូលជាធរមានក្នុងពេលឆាប់ៗខាងមុខនេះ នៅឆ្នាំ២០២១នេះតែម្តង ខណៈបច្ចុប្បន្នក្រសួងកំពុងពន្លឿនលើការងារនេះ ហើយវាកំពុងប្រព្រឹត្តទៅតាមលំដាប់លំដោយពាក់ព័ន្ធដំណើរការរៀបចំនីតិវិធីផ្ទៃក្នុង។
អត្ថបទទាក់ទង!
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មធ្លាប់បានបង្ហាញក្តីរំពឹងកន្លងមកថា ការនាំចេញផលិតផលរបស់កម្ពុជាទៅកាន់ទីផ្សារចិន នឹងកើនឡើង២៥% បន្ថែមទៀត ប្រសិនបើកិច្ចព្រមព្រៀងពាណិជ្ជកម្មសេរីកម្ពុជា-ចិនចូលជាធរមាន។ តាមរយៈកិច្ចព្រមព្រៀងនេះ ផលិតផលកម្ពុជាជាង ៣០០មុខនឹងអាចនាំចេញទៅទីផ្សារចិន ដោយមិនចាំបាច់បង់ពន្ធ។
គួររំលឹកថា កិច្ចព្រមព្រៀងពាណិជ្ជកម្មសេរីកម្ពុជា-ចិន បានចុះហត្ថលេខាតាំងពីថ្ងៃទី១២ ខែតុលា ឆ្នាំ២០២០ រវាងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជាមួយឯកឧត្តម ហ្សុង សាង រដ្ឋមន្ត្រីពាណិជ្ជកម្មចិនតាមរយៈប្រព័ន្ធវីដេអូអនឡាញ ដោយមានវត្តមានដ៏ខ្ពស់ខ្ពស់របស់សម្តេចតេជោ នាយករដ្ឋមន្ត្រី ហ៊ុន សែន និងឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្រ្តីក្រសួងការបរទេសចិន ជាសាក្សី៕
None
