Advertisement
Advertisement
Advertisement
នាំចេញនាំចូល

ឱនភាពពាណិជ្ជកម្មកម្ពុជា ឆ្នាំ២០១៨ កើនលើសឆ្នាំ ២០១៧ មួយពាន់លានដុល្លារអាមេរិក


ឱនភាពពាណិជ្ជកម្មរបស់កម្ពុជា នៅឆ្នាំ ២០១៨ កន្លងទៅនេះ ត្រូវបានរបាយការណ៍ របស់ធនាគារជាតិនៃកម្ពុជា បង្ហាញឲ្យដឹងថា មានជាង ៥.២០០លានដុល្លារអាមេរិក ដែលចំនួននេះ គឺមានខ្ពស់ជាងឆ្នាំ២០១៧ ប្រមាណ ១ពាន់លានដុល្លារអាមេរិក។ តែយ៉ាងណា បើពិនិត្យលើរបាយការណ៍ ឃើញថា អត្រា កំណើននៃការនាំចេញ និងការនាំចូលរបស់កម្ពុជា គឺមានមិនខ្ពស់ទាបជាងគ្នាណាស់ណានោះទេ ពោលគឺមានកំណើន ក្នុងរង្វង់ជាង ២០% ដូចគ្នា។
កំពង់ផែ​ទំនិញ​នៅ​កម្ពុជា
ដោយ
Advertisement

របាយការណ៍​ពីធនាគារ​ជាតិ បានបង្ហាញថា នៅឆ្នាំ២០១៨នេះ ការនាំចេញ​​របស់​កម្ពុជា សម្រេច​បានជាង ១៣.៥០០ លាន​ដុល្លារ​អាមេរិក ដែលមាន​កំណើន​ ២១% ធៀបនឹង​ឆ្នាំ​២០១៧ ខណៈការនាំ​ចូល​វិញ គឺមាន​ប្រមាណ​ជាង ១៨.៧០០ លាន​ដុល្លារ​អាមេរិក ដែលមាន​កំណើន​​ជាង ២១%។ តាម​តួលេខនេះ សបញ្ជាក់​​ឲ្យ​ឃើញថា ឱនភាព​ពាណិជ្ជកម្ម​ ឬការនាំចូល​របស់​កម្ពុជា​មានលើស​​ការ​នាំចេញ រហូតដល់ជាង ៥.២០០ លាន​ដុល្លារ​អាមេរិក ខ្ពស់ជាង​ឆ្នាំ​២០១៧ប្រមាណ ១ពាន់​លានដុល្លារអាមេរិក។  

ក្នុងនោះ កម្ពុជា បាននាំ​ចេញ​​ផលិតផល​ភាគច្រើន​បំផុត​ គឺសម្លៀកបំពាក់ និង​ស្បែកជើង ដែលមាន​តម្លៃជាទឹកប្រាក់​​ប្រមាណ ១០ពាន់​លាន​ដុល្លារអាមេរិក ផលិតផល​កសិកម្ម​​មាន​​ប្រមាណ ៦៣០​លានដុល្លារអាមេរិក និងផលិតផល​ផ្សេងៗ​ទៀត មាន​ជិត ​៣ពាន់​លាន​ដុល្លារ​អាមេរិក។ 

ដោយឡែក ក្នុងចំណោម​ការនាំចូល​ជាង ១៨ពាន់​លាន​ដុល្លារ​អាមេរិកវិញ កម្ពុជាបា​ននាំចូលភាគ​ច្រើន គឺជា​​វត្ថុធាតុដើម​​សម្រាប់​​វិស័យ​កាត់ដេរ ប្រេងឥន្ធនៈ សម្ភារ​សំណង់ យានយន្ដ អាហារ និងភេសជ្ជៈ និងផលិតផល​ផ្សេងៗ​ទៀត។

របាយការណ៍​​ដដែល បានឲ្យ​ដឹង​​ទៀតថា សហភាព​​អឺរ៉ុប​នៅ​តែ​ជា​​​ចំណែក​​ទីផ្សារ​​ធំ​សម្រាប់​​ការ​នាំ​ចេញ​​របស់កម្ពុជា ពោល​គឺមាន ​២៩% នៃចំណែក​ទីផ្សារ​នាំចេញ​សរុប​ ខណៈ​អាមេរិក​​មាន​​២៤% អង់គ្លេស​មាន​ ៩% និងជប៉ុន មាន​៨%។ រីឯប្រទេស​​ដែល​នាំចូល​មក​កម្ពុជា​ ឃើញថា​ ចិនឈរ​​លំដាប់​​មុខគេ​មានជិត​​៣០% នៃការនាំ​ចូល​សរុប​ ថៃ មានជាង​ ១៥% វៀតណាម មានជិត១២% និងជប៉ុន​​មាន ​៤%។ ​

ទាក់ទង​ទៅនឹង​ទីផ្សារ​​នាំចេញ​នេះដែរ នៅក្នុងរបាយការណ៍​​ក៏បាន​គូសបញ្ជាក់​​ពីកត្តា​​ប្រឈម​មួយចំនួន​ ​ក្នុងការ​​អភិវឌ្ឍ​កំណើន​សេដ្ឋកិច្ច​​របស់​​កម្ពុជា​ផងដែរ ពិសេស គឺ​ការប្រឈម​នឹងការ​បាត់បង់​​ប្រព័ន្ធ​អនុគ្រោះពន្ធ​​ពីសហភាព​អឺរ៉ុប។ តែយ៉ាងណា បើតាម​ ឯកឧត្តម វង្សី វិស្សុត រដ្ឋលេខាធិការ​ប្រចាំ​ការ ​ក្រសួងសេដ្ឋកិច្ច​ និងហិរញ្ញវត្ថុ បានអះអាង​ថា កម្ពុជា​ត្រូវពង្រឹង​​ឯករាជ្យភាព​​ពាណិជ្ជកម្ម​របស់​ខ្លួន ជាជាងការ​រស់ដោយ​ការពឹងតែ​លើការ​អនុគ្រោះ​ពន្ធនេះ។ ឯកឧត្តម គូសបញ្ជាក់​ទៀត បើ​អត់​​ប្រព័ន្ធ​អនុគ្រោះពន្ធ​នេះ កម្ពុជា​​ក៏មិន​ស្លាប់​នោះដែរ គ្រាន់តែអាច​បាត់បង់​​នូវតម្លៃ​​បន្ថែម​​នៃការ​នាំចេញ​ខ្លះ​ប៉ុណ្ណោះ​។

ឯកឧត្តមថា បើ​សិន​សហគម​អឺរ៉ុប​បន្ត​អនុគ្រោះ កម្ពុជា​រឹតតែ​ចំណេញ តែបើ​គេដក​ចេញ ក៏យើង​នៅតែចំណេញ គ្រាន់តែ​ចំណេញ​តិចជាង​មុន​ប៉ុណ្ណោះ។   

ទោះយ៉ាងណា បើ​ពិនិត្យ​មើលទៅ​លើ​ទុន​បម្រុង​​អន្តរជាតិ​វិញ​ឃើញថា មានការកើន​ឡើង​​រហូត​ដល់ ១០ ពាន់​លាន​ដុល្លារ​អាមេរិក ដែលអាច​ធានា​នូវការ​នាំចូល​​បាន​រហូត​ដល់​​រយៈពេល ៦ខែ​ឯណោះ។

បើតាម​ការវាយ​តម្លៃ​របស់​ធនាគារ​ជាតិ បានឲ្យដឹងថា សេដ្ឋកិច្ចកម្ពុជា នៅឆ្នាំ២០១៨នេះ សម្រេច​បាន​​កំណើន​​ដល់ ៧,៣% ដែលជា​កម្រិត​មួយខ្ពស់​​ធៀប​នឹង​ប៉ុន្មាន​ឆ្នាំចុង​ក្រោយនេះ ខណៈដែល​នៅឆ្នាំ​២០១៩នេះ រំពឹងថា នឹង​នៅតែរក្សា​បានកំណើន​​ក្នុង​រង្វង់​​៧% ដដែល៕ 

Advertisement
© 2020 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


ឆ្នាំ២០១៨ ចំណូលពន្ធដារមាន ២,២ ពាន់លានដុល្លារ កើនឡើងជាង ១៣%

ព័ត៌មាន
នៅពេញមួយឆ្នាំ ២០១៨ កន្លងទៅនេះ អគ្គនាយកដ្ឋានពន្ធដារ បានប្រមូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាយ សរុបមានប្រមាណ ២,២...

ប្រទេសតំបន់អាស៊ីអាគ្នេយ៍ជា «កូនក្រមុំដ៏ស្រស់សោភា» ក្នុងក្រសែភ្នែកវិនិយោគិនចិន និងអាមេរិក

ព័ត៌មាន
គិតមកទល់ពេលនេះ ជម្លោះពាណិជ្ជកម្មរវាងចិន និងអាមេរិក នៅតែមិនទាន់បានដោះស្រាយនៅឡើយទេ ទោះបីជា កន្លងមកមានការចរចាគ្នាខ្លះៗទៅហើយក្ដី។ សម្ពា...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ