គ្រាន់តែការនាំចេញកសិផលសំខាន់ៗ៤មុខ កម្ពុជាកើបលុយបានជាង៨៣០លានដុល្លារ

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានគូសបញ្ជាក់ថា ក្រៅពីផលិតផលក្នុងវិស័យឧស្សាហកម្ម ផលិតផលកសិកម្ម បានរួមចំណែកដ៏ធំមួយក្នុងការជំរុញកំណើននាំចេញសរុបរបស់កម្ពុជានៅក្នុងរយៈពេល៣ខែកន្លងមកនេះ។ បើតាមមន្រ្តីជាន់ខ្ពស់រូបនេះ កម្ពុជាកំពុងប្រែក្លាយពីការធ្វើកសិកម្មតាមបែបប្រពៃណីទៅបែបទំនើប ព្រមជាមួយការវិនិយោគលើការកែច្នៃនៅក្នុងស្រុកកាន់តែច្រើន ដែលជំរុញឱ្យការនាំចេញកសិផលរបស់កម្ពុជាកាន់តែមានភាពសម្បូរបែប និងមានតម្លៃបន្ថែមខ្ពស់ ជាពិសេសផលិតផល ដែលជាគោលនយោបាយជាតិរបស់កម្ពុជាដូចជា ស្វាយចន្ទី និងដំឡូងមីជាដើម។

ជាមួយគ្នានេះអ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានវាយតម្លៃខ្ពស់ចំពោះសក្តានុពល នៃការនាំចេញផលិតផលកសិកម្មកម្ពុជា ដែលបានរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិនាពេលកន្លងមក។ យ៉ាងណាមិញ ស្ថិតក្នុងភាពមិនប្រាកដប្រជាខ្ពស់នៃការប្រែប្រួលសេដ្ឋកិច្ចសកល ដោយសារបញ្ហាសង្រ្គាមនៅតំបន់មជ្ឈិមបូព៌ា អ្នកជំនាញរូបនេះយល់ឃើញថា វាក៏ជាឱកាសសម្រាប់កម្ពុជាក្នុងការបង្កើនកានាំចេញកសិផលកម្ពុជាទៅកាន់ទីផ្សារអន្តរជាតិ ដ្បិតតម្រូវការស្បៀងនៅបណ្តាប្រទេសមួយចំនួនលើពិភពលោកនឹងមានកំណើនខ្ពស់ ស្របពេលដែលវត្ថុធាតុដើមយ៉ាងច្រើនបំផុតរបស់កម្ពុជា គឺផលិតផលកសិកម្ម។

បើយោងតាមស្ថិតិពាណិជ្ជកម្មរបស់ក្រសួងពាណិជ្ជកម្ម គ្រាន់តែនាំចេញកសិផលសំខាន់ៗចំនួន៤មុខរួមមានគ្រាប់ស្វាយចន្ទី ដំឡូងមី ស្វាយ និងចេកកម្ពុជាកើបលុយបានជាង៨៣០លានដុល្លារនៅត្រីមាសទី១ឆ្នាំនេះ។ ក្នុងនោះការនាំចេញដំឡូងមីរកចំណូលបានច្រើនជាងគេរហូតដល់ជាង៣៧៦ដុល្លារ បន្ទាប់មកគ្រាប់ស្វាយចន្ទីជាង៣៥៨លានដុល្លារ និងតាមពីក្រោយដោយការនាំចេញចេក និងស្វាយជាមួយចំនួន៤៨លានដុល្លារ និងជាង៤៧លានដុល្លាររៀងគ្នា៕

អត្ថបទ សោម ស្រីពេជ្រ និងរូបភាពឯកសារ