ថ្លែងក្នុងសិក្ខាសាលាពិគ្រោះយោបល់ថ្នាក់ជាតិគោលនយោបាយ និងទិសដៅនៃសេដ្ឋកិច្ចឌីជីថល កម្ពុជាកាលពីព្រឹកមិញនេះ ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា សេដ្ឋកិច្ច ឌីជីថលកម្ពុជា កំពុងស្ថិតនៅក្នុងដំណាក់កាលចាប់ផ្ដើមលូតលាស់នៅឡើយ ហើយកម្ពុជាអាចនឹងត្រូវការពេល៥ ឆ្នាំទៀត ដើម្បីបង្កើតនូវមូលដ្ឋានត្រឹមត្រូវ គ្រប់ជ្រុយជ្រោយមួយ ឬដើម្បីត្រៀមខ្លួនរួចរាល់នូវផ្នែកឌីជីថល និងត្រូវការពេល៥ ទៅ ១០ឆ្នាំបន្ទាប់ទៀត ឬអាចច្រើនជាងនេះ ដើម្បីបង្កើតសេដ្ឋកិច្ច ឌីជីថលមួយពេញលេញបាន។
ដូច្នេះ ចាប់ពីពេលនេះទៅ កម្ពុជាត្រូវការពេលប្រមាណជាង ១០ ឆ្នាំ ទើបអាចក្លាយជាប្រទេសមួយដែលមានសេដ្ឋកិច្ចឌីជីថល ពេញលេញ។
អត្ថបទទាក់ទង!
ឯកឧត្តម អូន ព័ន្ធមុនីរ័ត្ន បន្ថែមទៀតថា យុទ្ធសាស្ត្ររបស់កម្ពុជា ក្នុងការអភិវឌ្ឍសេដ្ឋកិច្ចឌីជីថលនេះ គឺបង្កើតបរិយាកាសឌីជីថលមួយ ប្រកបដោយភាពរីកចម្រើនលឿន និងមានមូលដ្ឋានគ្រឹះរឹងមាំ ដែលផ្ដល់លទ្ធភាព ឲ្យក្រុមហ៊ុនទាំងតូច ទាំងធំ នៅក្នុងស្រុកអាចភ្ជាប់ខ្លួនទៅនឹងខ្សែច្រវាក់ តម្លៃសាកលនៃសេដ្ឋកិច្ចឌីជីថល នៅក្នុងតំបន់ និងពិភពលោក។ តាមការគូសបញ្ជាក់របស់ឯកឧត្តម អូន ព័ន្ធមុនីរ័ត្ន ដើម្បីឲ្យសេដ្ឋកិច្ច ឌីជីថល ដំណើរការល្អ ការរៀបចំនូវប្រព័ន្ធឡូជីស្ទីក និងបញ្ញើររហ័ស ព្រមជាមួយនឹងប្រព័ន្ធទូទាត់សង់ប្រាក់អេឡិចត្រូនិក គឺជាកត្តាចាំបាច់បំផុត។
លោកស្រី សូ ផនណារីអនុប្រធានប្រតិបត្តិធនាគារអេស៊ីលីដា បានលើកឡើងដែរថា ធនាគារបានរៀបចំនូវយុទ្ធសាស្ត្ររយៈពេលខ្លី មធ្យម និងវែងសម្រាប់គាំទ្រដល់ការវិវត្តនៃវិស័យសេដ្ឋកិច្ចឌីជីថលនេះ។ ជាក់ស្ដែង ធនាគារធំៗមួយចំនួន រួមទាំង អេស៊ីលីដា ផង បានបង្កើតជាប្រព័ន្ធធនាគារឌីជីថល ដែលផ្ដល់នូវភាពងាយស្រួល លឿនរហ័ស សម្រាប់អ្នកប្រើប្រាស់។ លោកស្រីបន្ថែមថា ក្នុងនាមជាអេស៊ីលីដា ជាធនាគារឌីជីថលនាំមុខគេមួយនៅកម្ពុជា ពិតជាគាំទ្រដល់គោលនយោបាយរបស់រាជរដ្ឋាភិបាលក្នុងការកែប្រែសេដ្ឋកិច្ចកម្ពុជាទៅរកសេដ្ឋកិច្ចឌីជីថលនេះ។
គួរបញ្ជាក់ថា ដើម្បីកែប្រែសេដ្ឋកិច្ចកម្ពុជា ទៅរកសេដ្ឋកិច្ចឌីជីថលនេះ រាជរដ្ឋាភិបាលកម្ពុជា ក៏បាននិងកំពុងរៀបចំសេចក្ដីព្រាងក្របខ័ណ្ឌគោលនយោបាយសេដ្ឋកិច្ច ឌីជីថល កម្ពុជា ដោយគោលនយោបាយនេះ ជាគោលនយោបាយរយៈវែង ដែលមានរយៈពេលជាង១០ឆ្នាំ៕
None
