បើតាមទិន្នន័យពីក្រុមប្រឹក្សាអភិវឌ្ឍន៍កម្ពុជា បានឲ្យដឹងថា បច្ចុប្បន្ន ក្រុងប៉ោយប៉ែត ដែលជាតំបន់ជាប់ព្រំដែនថៃនេះ មានតំបន់សេដ្ឋកិច្ចពិសេសចំនួន ៣ ហើយ ដែលមានមានរោងចក្រសរុបចំនួន ១៧ រោងចក្រ និងបានផ្ដល់ការងារដល់ពលរដ្ឋប្រមាណ ៧ពាន់៥០០ កន្លែង។
ជាក់ស្ដែង នាពេលថ្មីៗនេះ តំបន់សេដ្ឋកិច្ចពិសេសថ្មីមួយទៀត នៅក្រុងប៉ោយប៉ែត គឺតំបន់សេដ្ឋកិច្ចពិសេស ប៉ោយប៉ែត ភីភី ត្រូវបានសម្ពោធបើកឲ្យដំណើរការជាផ្លូវការហើយ ដែលវាមានផ្ទៃដីសរុប៧០ ហិកតា មានទីតាំងប្រមាណតែ៨គីឡូម៉ែត្រប៉ុណ្ណោះពីព្រំដែន និងប្រើពេលវេលាធ្វើដំណើរប្រហែលតែ៤ម៉ោងប៉ុណ្ណោះ ចេញពីទីក្រុងបាងកក មកកាន់តំបន់សេដ្ឋកិច្ចពិសេសមួយនេះ។
អត្ថបទទាក់ទង!
តំបន់សេដ្ឋកិច្ចពិសេសសប៉ោយប៉ែត ភីភី ត្រូវបានគេមើលឃើញថា គឺជាចំណុចការតភ្ជាប់ដ៏សំខាន់ នៅក្នុងច្រករបៀងសេដ្ឋកិច្ច ដែលពង្រីកចេញពីទីក្រុងបាងកកប្រទេសថៃ ឆ្ពោះទៅភាគខាងត្បូងកាត់ខេត្តសៀមរាប រាជធានីភ្នំពេញ របស់កម្ពុជា រហូតដល់ទីក្រុងហូជីមិញប្រទេសវៀតណាម។
ក្រុមហ៊ុន ជប៉ុន Sumitronics Manufacturing ដែលបានដែលមានផលិតគ្រឿងបរិក្ខាអេឡិចត្រូនិក ក៏បានបើកដំណើរការរោងចក្រថ្មី របស់ខ្លួននៅតំបន់សេដ្ឋកិច្ចពិសេសប៉ោយប៉ែតភីភីនេះផងដែរ។
ការចំណាយលើថ្លៃពលកម្មនៅកម្ពុជា ត្រូវបានគេមើលឃើញថា គឺមានតែប្រហែលពាក់កណ្ដាលនៃតម្លៃពលកម្មនៅក្នុងប្រទេសថៃប៉ុណ្ណោះ។ បន្ថែមពីនេះ ក្រុមហ៊ុនដែលមានគុណវុឌ្ឍិក៏នឹងរីករាយនឹងការដកពន្ធនិងអភ័យឯកសិទ្ធិផ្សេងទៀតនៅតំបន់សេដ្ឋកិច្ចប៉ោយប៉ែតនេះ។
ត្រូវបានស្រង់សម្ដី ដោយសារព័ត៌មាន Asian Nikkei Review លោក ហ៊ីរ៉ូហ្ស៊ី យូអ៊ីម៉ាហ្សូ នាយកប្រតិបត្តិតំបន់សេដ្ឋកិច្ចពិសេសភ្នំពេញ បានបញ្ជាក់ថា អ្វីដែលលោកចង់បង្ហាញនោះ គឺនៅកម្ពុជាមានតម្លៃផលិតកម្មថោក។
ការបង្កើតតំបន់សេដ្ឋកិច្ចពិសេស គឺជាទីតាំងវិនិយោគដែលបង្កើតឡើងសម្រាប់ទាក់ទាញវិនិយោគផ្ទាល់ពីបរទេស ដែលជាទូទៅ រដ្ឋាភិបាលបានផ្តល់លក្ខខណ្ឌលើកទឹកចិត្តផ្សេងៗ ដូចជា ការអនុគ្រោះពន្ធ ការបម្រើជូនសេវាច្រកចេញចូលតែមួយ ការសម្រួលបែបបទនាំចេញ នាំចូលទំនិញ ការសម្រួលបែបបទរដ្ឋបាលនានា និងលក្ខខណ្ឌផ្សេងៗទៀតជាច្រើន ដើម្បីជំរុញសកម្មភាពវិនិយោគ។
លោកឧកញ៉ា សៀ ឫទ្ធី អគ្គនាយកក្រុមហ៊ុន WorldBridge Group និងជាម្ចាស់គម្រោងអភិវឌ្ឍន៍តំបន់សេដ្ឋកិច្ចពិសេស Kerry World Bridge មានប្រសាសន៍ថា ការបង្កើតតំបន់សេដ្ឋកិច្ចពិសេស គឺចាំបាច់ណាស់ដើម្បីក្លាយខ្លួនជាតួអង្គដ៏សំខាន់ក្នុងតំបន់ សម្រាប់តភ្ជាប់សេដ្ឋកិច្ច និងពាណិជ្ជកម្មកម្ពុជាក្នុងក្របខណ្ឌសហគមន៍សេដ្ឋកិច្ចអាស៊ាន។
លោកឧកញ៉ាបន្ថែមថា ការអភិវឌ្ឍតំបន់សេដ្ឋកិច្ចពិសេស នឹងជួយជំរុញការពង្រីកការធ្វើពាណិជ្ជកម្មនៅក្នុងតំបន់កាន់តែមានភាពមមាញឹក និងទាក់ទាញខ្លាំងសម្រាប់ការវិនិយោគ។
ជាមួយគ្នានេះដែរ បើតាមកាសែតបាងកកប៉ុស្ដិ៍របស់ថៃ បានឲ្យដឹងថា តាមការសិក្សារបស់ស្ថាប័នប្រឹក្សាយោបល់ Korn Fery បានឲ្យដឹងថា កំណើនប្រាក់បៀវត្សរ៍នៅឆ្នាំ២០២០ នៅក្នុងប្រទេសថៃ នឹងត្រូវកើនឡើង៥% ។ ហើយបន្ទាប់ពីគណនា សម្រាប់អត្រាអតិផរណា ១,៣%រួចមក ឃើញថា កំណើនប្រាក់ចំណូលពិតរបស់បុគ្គលិកនៅប្រទេសថៃ នឹងកើនឡើងជិត៣,៧%។
អត្ថបទគួរឲ្យចាប់អារម្មណ៍
ជាមួយគ្នានេះដែរ ឯកអគ្គរាជទូតជប៉ុនប្រចាំកម្ពុជា លោក ម៉ាសាហ៊ីរ៉ុ មីខាមី ក៏បានឲ្យដឹងដែរថា កំណើនសេដ្ឋកិច្ចខ្ពស់បរិយាកាសវិនិយោគល្អ និងទីតាំងយុទ្ធសាស្ត្ររបស់កម្ពុជា បានធ្វើឲ្យកម្ពុជាក្លាយជាគោលដៅវិនិយោគដ៏ទាក់ទាញសម្រាប់វិនិយោគជប៉ុន។ លោក ម៉ាសាហ៊ីរ៉ុ មីខាមី បានឲ្យដឹងទៀតថា តំបន់សេដ្ឋកិច្ចពិសេសប៉ោយប៉ែត ភីភី នឹងចូលរួមចំណែកដល់ការទាក់ទាញការវិនិយោគប្រភេទ «ថៃបូក១» បន្ថែមទៀតមកកាន់កម្ពុជា។
គួរបញ្ជាក់ថា បើតាមទិន្នន័យពី ក្រុមប្រឹក្សាអភីវឌ្ឍន៍កម្ពុជា បច្ចុប្បន្ននៅទូទាំងប្រទេសកម្ពុជា មានតំបន់សេដ្ឋកិច្ចពិសេស ដែលមានដំណើរការចំនួន២៣ កន្លែង ដែលមានរោងចក្រចំនួន៤៩០ និងបង្កើតការងារបានចំនួន ប្រមាណជាង១៣ម៉ឺនកន្លែង។ ដោយឡែក ទីក្រុងប៉ោយប៉ែតមានតំបន់សេដ្ឋកិច្ចពិសេសចំនួន៣កន្លែង ដែលមានរោងចក្រចំនួន១៧ និងបង្កើតការងារបានចំនួន ៧.៥០០ កន្លែង ក្នុងនោះ រោងចក្រ ដែលជាការវនិយោគមកពីប្រទេសជប៉ុនមានចំនួន៨ និងបង្កើតការងារបានចំនួនជាង ២ពាន់កន្លែង៕
None
