ការវិនិយាគផ្ទាល់ពីជប៉ុននៅកម្ពុជាសរុប ១ឆ្នាំពេញ ឆ្នាំ២០១៦ ជប៉ុននៅតែរក្សាបានតំណែងជាប្រទេសទី៣ ដែលបានបោះទុនវិនិយោគច្រើនជាងគេនៅកម្ពុជា ជាមួយនឹងទឹកប្រាក់វិនិយោគផ្ទាល់ពីជប៉ុន ជាង ៨០០លានដុល្លារ។ ខណៈវិនិយោគិនម្ចាស់ស្រុកខ្មែរយើងវិនិយោគធំជាងគេលេខ១ ចិនឈរចំណាត់ថ្នាក់លេខ២ កូរ៉េខាងត្បូងលេខ៤។
ជប៉ុនវិនិយោគអ្វីខ្លះនៅកម្ពុជា ហើយនាំចេញនាំចូលអ្វីខ្លះ?
វិនិយោគិនជប៉ុនភាគច្រើនបានវិនិយោគនៅក្នុងវិស័យឧស្សាហកម្ម សណ្ឋាគារ និង ទេសចរណ៍ ធនាគារ សំណង់ និងអចលនទ្រព្យ និង ជាពិសេស វិស័យសេវាកម្ម និង ភោជនីយដ្ឋាន ជាដើម។
ចំណែកការនាំចេញវិញ ផលិតផលសំខាន់ៗដែលកម្ពុជាបាននំាចេញទៅជប៉ុន មានដូចជា សម្លៀកបំពាក់ ស្បែកជើង និងគ្រឿងបង្គុំអគ្គិសនី និងអេឡិចត្រូនិក ខណៈដែលកម្ពុជាបាននាំចូលទំនិញពីជប៉ុនវិញ ដូចជា គ្រឿងចក្រ ម៉ាស៊ីន និង រថយន្ត ជាដើម។
និន្នាការនៃការនាំចេញរបស់កម្ពុជាទៅជប៉ុននឹងនៅតែបន្តកើនឡើង ហើយភាពចម្រុះនៃផលិតផលនាំចេញនឹងនៅតែបន្តមាន ព្រោះថា រោងចក្រជប៉ុនថ្មីៗដែលចូលមកវិនិយោគនៅកម្ពុជានឹងធ្វើឲ្យផលិតផលនាំចេញរបស់កម្ពុជាកាន់តែចម្រុះឡើងថែមទៀត។
ការវិនិយោគរបស់ជប៉ុនកាន់តែច្រើននៅកម្ពុជាក៏កំពុងជំរុញឲ្យមានការនាំចេញកាន់តែច្រើនពីកម្ពុជាទៅប្រទេសជប៉ុន ផងដែរ។
លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) បានមានប្រសាសន៍ថា រយៈពេលបីឆ្នាំចុងក្រោយនេះវិនិយោគិនជប៉ុនបានចូលមកបណ្តាក់ទុននៅកម្ពុជាជាច្រើនដោយសារតែស្ថិរភាពនយោបាយ រួមទាំងកំណើនសេដ្ឋកិច្ចល្អ។
លោកបានលើកឡើងថា កំណើនទំនាក់ទំនងពាណិជ្ជកម្ម រវាងកម្ពុជា ជប៉ុន គឺជាសញ្ញាល្អសម្រាប់សេដ្ឋកិច្ចកម្ពុជា ដែលជាទូទៅបណ្តាប្រទេសដែលមានកំណើននៃការធ្វើពាណិជ្ជកម្មជាមួយជប៉ុនតែងមានសេដ្ឋកិច្ចលូតលាស់។ កំណើនវិនិយោគជប៉ុនមកកម្ពុជា បានជំរុញឲ្យមានជើងហោះហើរត្រង់របស់ក្រុមហ៊ុនអាកាសចរណ៍ជប៉ុនដ៏ធំមួយ ដែលមានឈ្មោះថា ANA កាលដើមឆ្នាំ២០១៦កន្លង។
ក្រុមហ៊ុនអាកាសចរណ៍ជប៉ុន ANA បើកការហោះហើរត្រង់មកកម្ពុជា
(ហេង ភារម្យ)
“កម្ពុជាត្រូវដើរគោះទ្វារទាក់ទាញវិនិយោគបរទេស មិនត្រូវអង្គុយរង់ចាំទេ”
អ្វីខ្លះជាឧបសគ្គរាំងស្ទះដល់ការវិនិយោគិនបរទេស ពិសេសជប៉ុន?
ទោះបីជាទំនាក់ទំនងពាណិជ្ជកម្ម និងការវិនិយោគរបស់ជប៉ុននៅកម្ពុជា ទទួលបាននូវភាពល្អប្រសើរយ៉ាងណាក៏ដោយ បើតាមអ្នកជំនាញបានអះអាងថា កម្ពុជាត្រូវតែខិតខំប្រឹងប្រែងជាបន្តសម្រាប់ការកែលម្អបរិយាកាសវិនិយោគឲ្យកាន់តែខ្លាំងខ្លាថែមទៀត ដើម្បីទាក់ទាញការវិនិយោគផ្ទាល់ពីប្រទេសជប៉ុនមកប្រទេសកម្ពុជា។
ក្រុមអ្នកជំនាញបានបញ្ជាក់ថា ជប៉ុននៅតែមើលឃើញថា កម្ពុជានៅមានចំណុចខ្សោយមួយចំនួនដែលត្រូវដោះស្រាយបន្ទាន់ មានដូចជា បញ្ហាការផ្គត់ផ្គង់អគ្គិសនីនៅមិនទាន់បានគ្រប់គ្រាន់ ហើយតម្លៃក៏នៅខ្ពស់ បើធៀបនឹងប្រទេសជិតខាង នីតិវិធីរដ្ឋបាលផ្សេងៗ មានភាពស្មុគស្មាញ និង ជួនកាល ប្រើពេលវេលាយូរ។
លោក សុខ ចិន្តាសោភា អគ្គលេខាធិការ ក្រុមប្រឹក្សាអភិវឌ្ឍន៍កម្ពុជាទទួលស្គាល់ថា កម្ពុជានូវមានរបាំងរំាងស្ទះបន្តិចដល់អ្នកវិនិយោគក្រៅប្រទេស ដូចជា ហេដ្ឋារចនាសម្ព័ន្ធ អគ្គិសនី មិនទាន់មានភាពល្អប្រសើរនៅឡើយទេ ដែលទាមទារឲ្យមានការអភិវឌ្ឍឲ្យបានល្អប្រសើរលើបញ្ហានេះ។
អ្វីជាដំណោះស្រាយក្នុងការទាក់ទាញវិនិយោគបរទេសមកកម្ពុជា?
កម្ពុជាត្រូវតែធ្វើកំណែទម្រង់ផ្នែករដ្ឋបាលសាធារណៈ អគ្គិសនី ហេដ្ឋារចនាសម្ព័ន្ធ នោះ វិនិយោគិនជប៉ុននឹងងាយស្រួលធ្វើការជាមួយកម្ពុជាណាស់។ ហើយវិនិយោគិនប្រទេសផ្សេងៗក៏មានភាពងាយស្រួលវិនិយោគនៅប្រទេសកម្ពុជាផងដែរ។
ដំណោះស្រាយទៅលើបញ្ហានេះដែរ កម្ពុជាមានតម្រូវការថវិកាហរិញ្ញប្បទានបន្ថែមចន្លោះ ពី ១២ពាន់លានដុល្លារ ទៅ ១៣ពាន់លានដុល្លារអាមេរិក សម្រាប់អភិវឌ្ឍន៍ហេដ្ឋារចនាសម្ព័ន្ធដើម្បីទ្រទ្រង់កំណើនសេដ្ឋកិច្ចជាតិនៅក្នុងរយៈពេល១០ឆ្នាំខាងមុខនេះ។
វិស័យហេដ្ឋារចនាសម្ព័ន្ធ ប្រព័ន្ធដឹកជញ្ជូន វិស័យអគ្គិសនី កម្លាំងជំនាញវិជ្ជាជីវៈ និង តំបន់សេដ្ឋកិច្ចពិសេស គឺជាតម្រូវការចាំបាច់សម្រាប់ការអភិវឌ្ឍជាអាទិភាព។
ការពង្រីកហេដ្ឋារចនាសម្ព័ន្ធដើម្បីឲ្យសេដ្ឋកិច្ចជាតិខ្លាំងក្លានេះដែរ ក៏ជាការឆ្លើយតបទៅនឹងគោលនយោបាយស្តីពីការអភិវឌ្ឍយន្តការភាពជាដៃគូរវាងរដ្ឋនិងឯកជន សម្រាប់គ្រប់គ្រងវិនិយោគសាធារណៈ និងគោលនយោបាយអភិវឌ្ឍន៍ឧស្សាហកម្មឆ្នាំ២០១៥-២០២៥។
បើតាម លោក សុខ ចិន្តាសោភា អគ្គលេខាធិការ ក្រុមប្រឹក្សាអភិវឌ្ឍន៍កម្ពុជា បានបញ្ជាក់អះអាងថា កម្ពុជាមិនត្រូវអង្គុយរង់ចំាអ្នកវិនិយោគចូលមកបណ្តាក់ទុននៅកម្ពុជានោះទេ យើងត្រូវតែធ្វើការផ្សព្វផ្សាយលក់ពីផលិតផល ពីគម្រោងដែលកម្ពុជាយើងមាន។ យើងត្រូវចេញលក់ ដើរគោះទ្វារស្វែងរកអ្នកវិនិយោគឲ្យចូលមកបណ្តាក់ទុននៅប្រទេសកម្ពុជាយើង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
