ស្របពេលមាសលក់ធ្លាក់ថ្លៃ ចរន្តទិញលក់មាសនៅកម្ពុជានៅតែបង្ហាញសញ្ញាអវិជ្ជមាននៅឡើយ ពោលគឺមិនសូវមានអ្នកទិញលក់មាសច្រើននោះទេ។ អ្នកជំនាញអះអាងថា ការធ្លាក់ចុះតម្លៃមាសនេះ គឺបន្ទាប់ពីទីផ្សារការងារនៅសហរដ្ឋអាមេរិកមានការកើនឡើង ដែលធ្វើឲ្យតម្លៃលុយដុល្លារមានការកើនឡើងផងដែរ។
លោកស្រី គង់ ពិសី ម្ចាស់ហាងមាសពេជ្រ ហេង ហេង បានអះអាងប្រាប់ខេមបូណូមីសថា តម្លៃមាសនៅកម្ពុជាមានការធ្លាក់ចុះជាបន្តបន្ទាប់នៅប៉ុន្មានថ្ងៃចុងក្រោយនេះ ពោលគឺត្រឹម១សប្តាហ៍កន្លងមកនេះ តម្លៃមាសនៅលើទីផ្សារមានការធ្លាក់ចុះចន្លោះពី៧០ដុល្លារទៅ១០០ដុល្លារអាមេរិកក្នុង១តម្លឹង។ ជាក់ស្តែង ហាងឆេងមាសនៅហាងមាសពេជ្រ ហេង ហេង នៅថ្ងៃទី៩ សីហា មាស១តម្លឹងលក់ចេញក្នុងតម្លៃ ២.១៥០ ដុល្លារអាមេរិក និងទិញចូលក្នុងតម្លៃ ២.០៥០ដុល្លារក្នុង១តម្លឹង ខណៈកាលពីសប្តាហ៍មុនមាស ១តម្លឹងលក់ចេញក្នុងតម្លៃ ២.៣០០ដុល្លារ។
ទោះបីតម្លៃមាសមានការធ្លាក់ក៏ដោយ តែម្ចាស់ហាងមាសពេជ្រ ហេង ហេង រូបនេះកត់សម្គាល់ឃើញថា ចរន្តទិញលក់មាសនៅហាងរបស់ លោកស្រី នៅតែមានការធ្លាក់ចុះ ពុំសូវមានអតិថិជនមកទិញ ឬលក់មាសដូចមុននោះទេ។ ពោលគឺភាពស្ងប់ស្ងាត់នេះ បានកើតឡើងតាំងពីកម្ពុជាទទួលរងនូវការឆ្លងរាលដាលនៃជំងឺកូវីដ-១៩ មកម្ល៉េះ។
ជាមួយគ្នានេះដែឬ ម្ចាស់ហាងមាសពេជ្រ ទី មង្គល ដែលសុំមិនបញ្ចេញឈ្មោះបានអះអាងដូចគ្នាថា តម្លៃមាសនៅហាងរបស់លោកបានធ្លាក់ចុះក្នុងរង្វង់ ៧០ដុល្លារអាមេរិកក្នុង១តម្លឹងនៅមួយសប្តាហ៍ចុងក្រោយនេះ។ ជាក់ស្តែង ហាងឆេងមាសនៅហាងរបស់លោកនៅថ្ងៃទី៩ ខែសីហា លក់ចេញក្នុងតម្លៃ ២.១៣០ ដុល្លារអាមេរិកក្នុង១តម្លឹង ខណៈកាលពីសប្តាហ៍មុនលក់ចេញក្នុងតម្លៃ ២.២០០ ដុល្លារអាមេរិក។
អត្ថបទគួរអាន
ម្ចាស់ហាងមាសពេជ្រ ទី មង្គល រូបនេះអះអាងទៀតថា ការធ្លាក់ចុះតម្លៃមាសយ៉ាងគំហុកនេះមិនបានជះឥទ្ធិពលធ្ងន់ធ្ងរដល់ការលក់ដូរមាសរបស់លោកនោះទេ ដ្បិតថា បច្ចុប្បន្នស្ថានភាពនៃការទិញលក់មាសកំពុងមានការធ្លាក់ចុះស្រាប់ទៅហើយ ដោយសារការរាតត្បាតនៃជំងឺកូវីដ-១៩។
ពាក់ព័ន្ធបញ្ហាតម្លៃមាសធ្លាក់ចុះនេះ លោក ឡុង សំណាង ប្រធានផ្នែកប្រឹក្សាយោបល់ ហិរញ្ញវត្ថុ នៃក្រុមហ៊ុន ហ្គោលដេន អេហ្វអិកស៍ លីងឃែភីថលបានអះអាងថា មូលហេតុដែលធ្វើឲ្យតម្លៃមាសនៅកម្ពុជាក៏ដូចជាលើសកលលោកមានការធ្លាក់ចុះ គឺបន្ទាប់ពីទីផ្សារការងារ និងប្រាក់ចំណូលរបស់ប្រជាពលរដ្ឋនៅសហរដ្ឋអាមេរិកមានការកើនឡើង ដែលនាំឲ្យតម្លៃលុយដុល្លារកើនឡើង។ ការកើនឡើងតម្លៃលុយដុល្លារនេះ បានទាញទម្លាក់តម្លៃមាសនៅលើទីផ្សារសកលឲ្យមានការធ្លាក់ចុះខ្លាំងកាលពីសប្តាហ៍មុន។
បើតាមអ្នកជំនាញវិភាគទីផ្សារមាសនេះបានគូសបញ្ជាក់ទៀតថា ការកើនឡើងប្រាក់ចំណូលរបស់សហរដ្ឋអាមេរិក តាមរយៈការលក់អាវុធឲ្យប្រទេសមួយចំនួន លើពិភពលោក ក៏ជាមូលហេតុមួយធ្វើតម្លៃលុយដុល្លារក្នុងប្រទេសនេះមានការកើនឡើងផងដែរ។
សូមបញ្ជាក់ថា តម្លៃមាសក្នុងទីផ្សារពិភពលោកគិតត្រឹមថ្ងៃចន្ទដើមសប្ដាហ៍នេះ មានតម្លៃជាង ១.៧០០ ដុល្លារអាមេរិកក្នុងមួយអោន ដោយ១អោន ស្មើនឹងជាង៨ជីមាស៕
None
