តាមសេចក្ដីប្រកាសព័ត៌មានដដែលនេះ បានឲ្យដឹងទៀតថា ប្រភេទអង្ករដែល ភាគីចិនយល់ព្រមទិញពីកម្ពុជានោះ មានដូចជា អង្ករផ្កាម្លិះ អង្ករក្រអូប អង្ករស និងចុងអង្ករ ដែលសរុបទៅ មានបរិមាណ ៤០ ម៉ឺនតោន។ អនុស្សរណៈ ដែលត្រៀមនឹងចុះហត្ថលេខាផ្លូវការ នៅថ្ងៃទី ២៧ មេសានេះ នឹងចូលជាធរមានភ្លាម បន្ទាប់ពីគូភាគីទាំងពីរ អនុវត្តបញ្ចប់ដោយជោគជ័យ នូវអនុស្សរណៈដំបូង ដែលបានចុះហត្ថលេខា កាលពីថ្ងៃទី ១១ ខែមករា ឆ្នាំ២០១៨ ស្ដីពីការនាំចូលអង្ករទៅចិន ចំនួន ៣០ម៉ឺនតោន។
អត្ថបទទាក់ទង!
គួរបញ្ជាក់ដែរថា នៅក្នុងជំនួបនាពេលថ្មីៗនេះ ជាមួយនឹងលោក គ្រីស្ដូភឺ បាលតាសា មន្ដតឺរ៉ូ ឯកអគ្គរដ្ឋទូត នៃសាធារណរដ្ឋហ្វីលីពីន ប្រចាំនៅកម្ពុជាដែលបានផុតអណត្តិការងារនៅកម្ពុជា សម្ដេច តេជោ ហ៊ុន សែន បានលើកឡើងថា សម្ដេច សង្ឃឹមថា កម្ពុជានឹងនាំអង្ករទៅកាន់ទីផ្សារហ្វីលីពីននៅពេលដ៏ខ្លីខាងមុខនេះជាក់ជាមិនខាន។ ការលើកឡើងរបស់សម្ដេច តេជោ យ៉ាងដូច្នេះ គឺធ្វើឡើង បន្ទាប់ពីលោក មន្ដតឺរ៉ូ បានបង្ហើបឲ្យដឹងថា ពេលនេះច្បាប់នាំអង្ករចូលប្រទេសហ្វីលីពីនដែលតម្រូវឲ្យចូលដេញថ្លៃដាច់ខាតនោះ គឺអស់សុពលភាពហើយ។ ដូច្នេះ ពេលនេះ ប្រទេសណា ក៏អាចនាំអង្ករចូលហ្វីលីពីនបានដោយសេរី រួមទាំងប្រទេសកម្ពុជាផងដែរ។
របាយការណ៍ ពីក្រសួងកសិកម្ម បានបង្ហាញដែរថា នៅត្រីមាសទី១ ឆ្នាំ ២០១៩នេះ ការនាំចេញអង្ករតាមច្រកចេញចូលតែមួយ សម្រេចបាន ប្រមាណ ១៧ ម៉ឺនតោន កើនឡើងជិត១០ ម៉ឺនតោន ឬស្មើនឹងកំណើន៦% ធៀបនឹងត្រីមាសទី១ ឆ្នាំ២០១៨។ ក្នុងនោះ ការនាំចេញអង្ករកម្ពុជា មានទិសដៅចំនួន ៣៩ ប្រទេស ដែលក្នុងនោះ ចិន ឈរលំដាប់ជួរមុខគេបង្អស់ ដែលមាន ជាង ៧ម៉ឺន ៥ពាន់តោន បន្ទាប់មកគឺបារាំង មាន២ម៉ឺនតោន ប្រទេសហ្គាបុង មាន១២ពាន់តោន និងម៉ាឡេស៊ីមានជាង៩ពាន់តោន។ រីឯចំនួន ក្រុមហ៊ុនដែលបាននាំចេញអង្ករវិញ បច្ចុប្បន្ន មានរហូតដល់ ៦៧ ក្រុមហ៊ុន។
សូមរំឭកបន្ដិចដែរថា តាំងពីខែមករា ដើមឆ្នាំ២០១៩មក អង្ករកម្ពុជានាំទៅទីផ្សារអឺរ៉ុប ត្រូវបានអឺរ៉ុបសម្រេចដកហូតពន្ធនាំចូល ដែលការយកពន្ធនេះ គឺមានរយៈពេល ៣ឆ្នាំ។ ដ្បិតតែ មានការដកហូតពន្ធលើអង្ករកម្ពុជា ទៅកាន់ទីផ្សារអឺរ៉ុបក្ដី ប៉ុន្ដែ សហព័ន្ធស្រូវអង្ករកម្ពុជាធ្លាប់បានអះអាងថា នឹងមិនធ្វើឲ្យវិស័យស្រូវអង្ករកម្ពុជាត្រូវដួលរលំនោះឡើយ។ ជាក់ស្ដែង នាប៉ុន្មានខែមកនេះ ការនាំចេញអង្ករនៅតែរក្សាបានស្ថានភាពជាវិជ្ជមាន៕
None
