រដ្ឋមន្ត្រីការពារជាតិអាម៉េរិកនឹងមកបំពេញទស្សនកិច្ចនៅថៃ ចំពេលមានការលេចលឺថា ភាគីទាំងពីរអាចបង្កើតរោងចក្រផលិតដ្រូនយោធារួមគ្នា

ក្រសួងការពារជាតិថៃ បានចាត់ទុកកិច្ចសហប្រតិបត្តិការសន្តិសុខជាតិ ជាមួយក្រុងវ៉ាស៊ីនតោន គឺជាអាទិភាពយុទ្ធសាស្ត្រដាច់ដោយឡែកពីការពាណិជ្ជកម្ម។ កាសែត The Nation របស់ថៃ បានស្រង់សម្តីអ្នកនាំពាក្យក្រសួងការពារជាតិថៃ លោក ស៊ុរ៉ាសាន់ ឃង់ស៊ិរិ (Surasant Kongsiri) ថា ទាំងរដ្ឋាភិបាលថៃ និងមន្ត្រីជាន់ខ្ពស់អាម៉េរិក បានឯកភាពគ្នារួចហើយថា បញ្ហាសន្តិសុខជាតិ អធិបតេយ្យភាព និងសុវត្ថិភាពសាធារណៈ នឹងមិនត្រូវយកទៅប្រកៀកប្រកិត ឬភ្ជាប់ជាលក្ខខណ្ឌដោះដូរក្នុងការចរចាពាណិជ្ជកម្ម និងពន្ធគយឡើយ។
ក្នុងដំណើរទស្សនកិច្ចនាពេលឆាប់ៗខាងមុខនេះ លោក ភីត ហេកសេត រដ្ឋមន្ត្រីការពារជាតិអាម៉េរិក ត្រូវបានគេរំពឹងថា នឹងជួបពិភាក្សាជាមួយលោក អាឌុល ប៊ុនថាំចារើន (Adul Boonthumjaroen) រដ្ឋមន្ត្រីក្រសួងការពារជាតិថៃ ហើយរបៀបវារៈនៃជំនួបនេះ គឺការឈានទៅចុះហត្ថលេខាលើសេចក្តីថ្លែងការណ៍ចក្ខុវិស័យរួមឆ្នាំ២០២៦ ដែលនឹងក្លាយជាសមាសភាគ និងជាក្របខណ្ឌយុទ្ធសាស្ត្រការពារជាតិថ្មីសន្លាងរវាងថៃ និងសហរដ្ឋអាម៉េរិក។
អ្វីដែលគួរឱ្យចាប់អារម្មណ៍នោះ ទីក្រុងបាងកក និងទីក្រុងវ៉ាស៊ីនតោន កំពុងរុញច្រានកិច្ចសហប្រតិបត្តិការឧស្សាហកម្មយោធាទៅកាន់កម្រិតស៊ីជម្រៅមួយទៀត តាមរយៈគំនិតផ្តួចផ្តើមបង្កើតរោងចក្រផលិតយន្តហោះដ្រូនយោធានៅលើទឹកដីថៃ។ បើតាមការបញ្ជាក់ពីអ្នកនាំពាក្យរូបនេះ គម្រោងដ្រូននេះកំពុងស្ថិតក្នុងដំណាក់កាលបច្ចេកទេសបឋម ប៉ុន្តែវាជាជំហានដ៏ធំមួយក្នុងការបំពាក់បច្ចេកវិទ្យាការពារជាតិទំនើប។ លើសពីនេះ ភាគីទាំងពីរ ក៏កំពុងពង្រីកសមរភូមិសន្តិសុខទប់ទល់នឹងការគំរាមកំហែងជំនាន់ថ្មី ដូចជាបច្ចេកវិទ្យាបញ្ញាសិប្បនិម្មិត សន្តិសុខសាយប៊ើ និងលំហអាកាស៕

អត្ថបទៈ សួន ឡង់ទី