ការបត់បែនជំហាននយោបាយការបរទេសរបស់រដ្ឋបាលលោក ដូណាល់ ត្រាំ តាមរយៈការបង្រួមទំហំសមយុទ្ធយោធារួមគ្នាជាមួយកូរ៉េខាងត្បូង មិនត្រឹមតែបង្កើតជាកង្វល់ភ្លាមៗសម្រាប់ទីក្រុងសេអ៊ូល ប៉ុណ្ណោះទេ ប៉ុន្តែថែមទាំងផ្ញើរលកសញ្ញាព្រមានទៅកាន់ទីក្រុងតូក្យូ និងទីក្រុងកង់បេរ៉ា ផងដែរ។ អស់រយៈពេលជាង៧ទសវត្សរ៍កន្លងមកនេះ ពោលគឺគិតចាប់តាំងពីការចុះសន្ធិសញ្ញាសន្តិសុខរួមគ្នានៅឆ្នាំ១៩៥១ ប្រទេសជប៉ុន បានប្រតិបត្តិនយោបាយសន្តិភាពនិយមយ៉ាងហ្មត់ចត់ និងពឹងផ្អែកទាំងស្រុងលើខែលការពារជាតិអាម៉េរិក ជាផែនការ A តែមួយគត់របស់ខ្លួន។ ទោះជាយ៉ាងណាការកាត់បន្ថយការប្តេជ្ញាចិត្តផ្នែកយោធារបស់ទីក្រុងវ៉ាស៊ីនតោន ចំពោះកូរ៉េខាងត្បូង បានធ្វើឱ្យជប៉ុនភ្ញាក់រលឹកថា ការពឹងផ្អែកលើប្រទេសដទៃទាំងស្រុងអាចជាហានិភ័យធ្ងន់ធ្ងរនៅពេលដែលស្ថានការណ៍នយោបាយអាម៉េរិកផ្លាស់ប្តូរ។
យោងតាមសៀវភៅសស្តីពី ការពារជាតិរបស់ជប៉ុន រដ្ឋាភិបាលជប៉ុនបានកំណត់ទិសដៅយ៉ាងច្បាស់ថា ត្រឹមឆ្នាំសារពើពន្ធ២០២៧ ខ្លួនត្រូវតែបង្កើនកញ្ចប់ថវិកាការពារជាតិ ឱ្យដល់២% នៃ GDP ដើម្បីពង្រឹងសមត្ថភាពស្វ័យការពារ និងទប់ស្កាត់ការឈ្លានពានណាមួយដោយខ្លួនឯង ដោយមិនបាច់រង់ចាំតែការជួយសង្គ្រោះពីសហរដ្ឋអាម៉េរិកឡើយ។
ជំហរនេះកាន់តែច្បាស់លាស់ឡើងក្រោមការដឹកនាំរបស់នាយករដ្ឋមន្ត្រីស្ត្រីដំបូងបង្អស់របស់ជប៉ុន គឺលោកស្រី សាណាអិ តាកាអ៊ិឈិ (Sanae Takaichi) ដែលជាអ្នកនយោបាយសន្តិសុខនិយមដ៏តឹងរ៉ឹង។ លោកស្រី បានបន្តជំរុញយ៉ាងសកម្មនូវការកើនឡើងសមត្ថភាពយោធា ការអភិវឌ្ឍឧស្សាហកម្មការពារជាតិក្នុងស្រុក ព្រមទាំងការបន្ធូរបន្ថយច្បាប់នាំចេញអាវុធ ដើម្បីឆ្លើយតបនឹងការប្រែប្រួល នៃបរិយាកាសសន្តិសុខសកល។
មិនមែនមានតែជប៉ុននោះទេ ដែលកំពុងគិតគូរលើផែនការ B នេះ សូម្បីតែប្រទេសអូស្ត្រាលី និងកូរ៉េខាងត្បូង ក៏កំពុងរិះគិតពីលទ្ធភាពនៃការកសាងបណ្តាញសន្តិសុខជាតិផ្ទាល់ខ្លួនផងដែរ។ សារពញាក់អារម្មណ៍ពីលោក ត្រាំ អាចនឹងជំរុញឱ្យប្រទេសជប៉ុន អូស្ត្រាលី និងកូរ៉េខាងត្បូង បង្កើនកិច្ចសហប្រតិបត្តិការយុទ្ធសាស្ត្រ និងយោធាត្រីភាគីឱ្យកាន់តែស៊ីជម្រៅជាងមុន ដោយមិនចាំបាច់ឆ្លងកាត់ ឬពឹងផ្អែកលើមជ្ឈមណ្ឌលបញ្ជាការនៅទីក្រុងវ៉ាស៊ីនតោន ដូចមុនទៀតឡើយ។
ជារួមការកាត់បន្ថយសមយុទ្ធយោធារបស់លោក ត្រាំ អាចជាចំណុចរបត់ប្រវត្តិសាស្ត្រ ដែលរុញច្រានឱ្យតំបន់ឥណ្ឌូប៉ាស៊ីហ្វិក ឈានចូលដល់យុគសម័យស្វ័យការពារជាតិ។ ការប្រែប្រួលនេះ នឹងបង្ខំឱ្យជប៉ុន អូស្ត្រាលី និងកូរ៉េខាងត្បូង បោះបង់ចោលការរៀបចំគោលនយោបាយចាស់ ហើយប្រញាប់បង្កើតផែនការ B ឱ្យបានទាន់ពេលវេលា ដើម្បីធានាសន្តិសុខជាតិ និងស្ថិរភាពតំបន់ក្នុងរយៈពេលវែង៕
