រដ្ឋបាលគយចិន បានឲ្យដឹងថា ការនាំចេញរបស់ចិនក្នុងខែតុលាកន្លងទៅថ្មីៗនេះ មានទំហំទឹកប្រាក់សរុបជាង ៣០០ពាន់លានដុល្លារអាមេរិក។ ចំនួននេះមានកំណើន ២៧% បើធៀបនឹងខែតុលាឆ្នាំ២០២០។ ដោយឡែកការនាំចូលមកវិញ មានទឹកប្រាក់ជាង ២១៥ពាន់លានដុល្លារ កើនឡើងជិត ២១%។
ការនាំចេញ និងនាំចូលនេះ មានកំរិតខ្ពស់ជាងកាលពីឆ្នាំមុន គ្រាដែលពិភពលោក កំពុងដើរអូសជើងក្នុងវិបត្តិកូវីដ១៩។ យ៉ាងណាក៏ដោយ គេនៅតែមានក្តីបារម្ភថា សេដ្ឋកិច្ចចិនជារួមនឹងមានការធ្លាក់ចុះ ឬ អាចមានកំណើនយឺតជាងការរំពឹងទុក ទោះទំហំពាណិជ្ជកម្មរក្សាបានភាពធន់យ៉ាងណាក្តី។
ជាក់ស្តែង ក្នុងត្រីមាសទី៣ឆ្នាំ២០២១ ប្រទេសដែលមានសេដ្ឋកិច្ចធំលំដាប់ទី២ពិភពលោកមួយនេះ មានកំណើនសេដ្ឋកិច្ចតែ ៤,៩% ប៉ុណ្ណោះ ធ្លាក់ចុះពី ៧,៩%កាលពីត្រីមាសទី២។
អត្ថបទទាក់ទង
គួរជម្រាបថា អតិរេកពាណិជ្ជកម្មរបស់ចិនសរុប ក្នុងខែតុលាមានជាង ៨៤ពាន់លានដុល្លារ កើនឡើងពីជាង៦៦ពាន់លានដុល្លារកាលពីខែកញ្ញា។ ដោយឡែក បើគេមើលលើអតិរេកពាណិជ្ជកម្មជាមួយ សហរដ្ឋអាមេរិកវិញឃើញថាមានការថយចុះបន្តិចប៉ុណ្ណោះ ពី៤២ពាន់លានដុល្លារក្នុងខែកញ្ញា មកនៅត្រឹម៤០ពាន់លានដុល្លារក្នុងខែតុលា។
ការនេះបានបង្ហាញថា ទោះបីជាប្រទេសទាំងពីរនៅតែស្ថិតក្នុងជម្លោះពាណិជ្ជកម្ម ដែលបន្សល់ទុកតាំងពីជំនាន់ប្រធានាធិបតីត្រាំក្តី ប៉ុន្តែមហាអំណាចអាមេរិក និងចិនមិនអាចធ្វើពាណិជ្ជកម្មដោយខ្វះគ្នាបានឡើយ។
សេដ្ឋកិច្ចរបស់ប្រទេសចិន ត្រូវបានរងផលប៉ះពាល់ដោយការរឹតបន្តឹងដ៏តឹងរ៉ឹងជុំវិញបញ្ហាកូវីដ១៩ របស់រដ្ឋអំណាច ដែលប្រកាន់ខ្ជាប់គោលនយោបាយ «គ្មានកូវីដ» ដែលបានធ្វើឱ្យថយចុះការធ្វើដំណើរក្នុងស្រុក និងតម្រូវការអ្នកប្រើប្រាស់ ព្រមទាំងកង្វះថាមពលដែលបានជំរុញឱ្យផលិតកម្មរោងចក្រធ្លាក់ចុះផងដែរ៕
None
