ចិនមានការនាំចូលអគ្គិសនីពីកូរ៉េខាងជើងបានកើនឡើងជាង ៦០% ស្មើនឹងជាង ៣ម៉ឺន៥ពាន់ មេហ្គាវ៉ាត់ម៉ោង ក្នុងខែកញ្ញា បើធៀបនឹងរយៈពេលដូចគ្នាកាលពីឆ្នាំមុន។
ចិនបាននាំចូលអគ្គិសនីពីប្រទេសកូរ៉េខាងជើងក្នុងខែកញ្ញាមានតម្លៃ១លាន៥សែនដុល្លារអាមេរិក ខណៈដែលសរុបនៅ៩ខែដំបូងឆ្នាំនេះចំណាយជិត ១២លានដុល្លារអាមេរិក។
ទណ្ឌកម្មរបស់អង្គការសហប្រជាជាតិ ដែលបានដាក់លើប្រទេសកូរ៉េខាងជើងក្នុងឆ្នាំ ២០១៧ បានដាក់កម្រិតការនាំចេញពីប្រទេសនេះ រួមមានធ្យូងថ្ម រ៉ែដែក អាហារ និង ផលិតផលកសិកម្ម ប៉ុន្តែពាណិជ្ជកម្មអគ្គិសនីមិនត្រូវបានរឹតបន្តឹងទេ។
អត្ថបទទាក់ទង
ទន្ទឹមនឹងនេះដែរ ប្រទេសរុស្ស៊ីក៏បាននាំចេញថាមពលអគ្គិសនីចំនួនជាង ២ពាន់ជីហ្គាវ៉ាត់ម៉ោង ដែលមានតម្លៃប្រមាណ ១០០លានដុល្លារអាមេរិក ទៅកាន់ប្រទេសចិន ក្នុងរយៈពេល៩ខែដំបូងនៃឆ្នាំ២០២១ ដែលជាការកើនឡើង ជិត២%ធៀបនឹងរយៈពេលដូចគ្នាកាលពីឆ្នាំមុនផងដែរ។
ដោយឡែក ការនាំចូលថាមពលរបស់ប្រទេសចិនពីប្រទេសមីយ៉ាន់ម៉ា បានកើនឡើងចំនួន ៤៤% ដល់ជាង១ពាន់ជីហ្គាវ៉ាត់ម៉ោង នៅក្នុង៩ខែដំបូងឆ្នាំនេះ បើធៀបនឹងរយៈពេលដូចគ្នាក្នុងឆ្នាំ ២០២០ ជាមួយនឹងទំហំទឹកប្រាក់តម្លៃ ៣៤លានដុល្លារអាមេរិក។
គួរជម្រាបថា ទោះបីជាមានការនាំចូលាថាមពលរបស់ចិនពីប្រទេសជិតខាងកើនឡើងក៏ដោយ ក៏ប្រទេសចិននៅតែត្រូវដោះស្រាយតម្រូវការផលិតថាមពលដោយខ្លួនឯងដដែល ពោលគឺបរិមាណនាំចូលមិនអាចផ្គត់ផ្គង់បានច្រើននោះទេ ព្រោះទំហំនេះតំណាងឲ្យផ្នែកតិចតួច ប៉ុណ្ណោះ នៃការតម្រូវការប្រើប្រាស់អគ្គិសនីយ៉ាងសម្បើមនៅក្នុងប្រទេសចិន។
ជាក់ស្តែងកាលពីខែកញ្ញា ប្រទេសចិនបានផលិតអគ្គិសនីក្នុងស្រុកដល់ទៅជាង ៧០ម៉ឺនជីហ្គាវ៉ាត់ម៉ោងឯណោះ បើប្រៀបធៀបទៅនឹងអគ្គិសនីដែលខ្លួនបាននាំចូលជិត៧០០ជីហ្គាវ៉ាត់ម៉ោង៕
None
