ការចំណាយប្រើប្រាស់នៅចិនកើនឡើងអំឡុងពេលសម្រាកចូលឆ្នាំចិន

ក្រសួងពាណិជ្ជកម្មចិនកាលពីពេលថ្មីៗនេះ បានបញ្ចេញស្ថិតិស្តីពីលំហូរសាច់ប្រាក់ដែលកើនឡើង ក្រោយពីមានការចំណាយប្រើប្រាស់ពីសំណាក់ពលរដ្ឋ ក្នុងឱកាសបុណ្យចូលឆ្នាំចិន បានកើនឡើងគួរឱ្យកត់សម្គាល់ ពោលគឺកើនខ្ពស់ជាងអំឡុងពេលចូលឆ្នាំប្រពៃណីចិនកាលពីឆ្នាំ២០២០។ នេះបើតាមការចុះផ្សាយរបស់សារព័ត៌មាន Xinhua ។

បើតាមស្ថិតិដដែលបានឲ្យដឹងថា ចំនួននៃការលក់ទាំងដុំ ទាំងរាយ និងជាពិសេសការលក់ដូរម្ហូបអាហារអំឡុងពេលឈប់សម្រាកបុណ្យចូលឆ្នាំប្រពៃណីចិន បានកើនឡើងជាង ២៨% ធៀបរយៈពេលដូចគ្នាកាលពីឆ្នាំ២០២០ ដែលគិតជាទំហំទឹកប្រាក់មានប្រមាណជាង ៨០០ពាន់លានយ័ន ឬស្មើនឹងប្រមាណ ១២០ពាន់លានដុល្លារអាមេរិក។

ចំណែកឯការលក់តាមប្រព័ន្ធ Online មានការហក់ឡើងយ៉ាងគំហុក ពោលគឺហក់ឡើង ១៣៥% ធៀបនឹងរយៈពេលដូចគ្នាកាលពីឆ្នាំ២០២០កន្លងទៅ ដែលគិតជាទំហំទឹកប្រាក់មានប្រមាណ ១២០ពាន់លានយ័ន ឬស្មើនឹង ១៨ពាន់លានដុល្លារអាមេរិក។

សូមបញ្ជាក់ថា ការកើនឡើងដ៏ខ្លាំងសម្បើមនូវការកុម្ម៉ង់អាហារតាមរយៈអ៊ីនធឺណែតដូចនេះ ទំនងដោយសារតែជនជាតិចិនភាគច្រើនមិនចង់ចេញទៅទិញទំនិញនៅខាងក្រៅ និងតបតាមការអំពាវនាវរបស់រដ្ឋាភិបាលចិន ដែលបានស្នើសុំឲ្យពលរដ្ឋ កាត់បន្ថយការដើរហើរណា ដែលមិនចាំបាច់ បូករួមនឹងការប្រមូលផ្តុំនានា ដើម្បីបង្ការខ្លួនពីការចម្លងជំងឺកូវីដ១៩៕

None