ការស្ទុះងើបឡើងនៃសេដ្ឋកិច្ចចិន ត្រូវបានគេរំពឹងថា នឹងជួយដល់សាជីវកម្មធំៗ ក៏ដូចជាក្រុមហ៊ុននៅប្រទេសចិនជាច្រើនទៀត នឹងកើនឡើងទ្រព្យសម្បត្តិកាន់តែច្រើន ដែលជំរុញឲ្យទ្រព្យសម្បត្តិមហាសេដ្ឋីក្នុងប្រទេសនេះក៏កើនខ្ពស់ដែរ។
របាយការណ៍ពីស្ថាប័ន ក្រេឌីត ស្វីស បានបង្ហាញថា ចំនួនសេដ្ឋីប្រាក់លានដុល្លារនៅក្នុងប្រទេសចិន នឹងកើនឡើងជិត ៩៣% ទៅដល់ចំនួនជាង១០លាននាក់ នៅត្រឹមឆ្នាំ២០២៥ខាងមុខ ធៀបនឹងសហរដ្ឋអាមេរិក គឺមានកំណើនត្រឹមតែជិត៣០%ប៉ុណ្ណោះ ដោយចំនួនសេដ្ឋីប្រាក់លានដុល្លារនឹងមានជាង២៨លាននាក់។ ដូច្នេះ បើធៀបពីអត្រាកំណើន ឃើញថា សេដ្ឋីប្រាក់លានដុល្លារនៅចិននឹងកើនឡើងខ្ពស់ជាងសហរដ្ឋអាមេរិកដល់ទៅ៣ដង គិតត្រឹម៥ឆ្នាំខាងមុខនេះ។
អ្នកជំនាញសេដ្ឋកិច្ច និងជាអ្នករៀបរៀងរបាយការណ៍នៃស្ថាប័ន ក្រេឌីតស្វីស បានរំពឹងទុកថា មិនមែនតែកំណើនទ្រព្យសម្បត្តិរបស់អ្នកមាននៅក្នុងប្រទេសចិន និងអាមេរិកនោះទេ នឹងកើនខ្លាំងនៅឆ្នាំខាងមុខនេះ នៅឥណ្ឌាវិញក៏នឹងមានកំណើនដូចគ្នាដែរ។
របាយការណ៍ពីស្ថាប័នជំនាញមួយនេះ ក៏បានលើកឡើងទៀតថា ប្រទេសចិននឹងនៅតែគ្រប់គ្រងតំណែងជាប្រទេសដែលមានអ្នកមានទ្រព្យសម្បត្តិច្រើនជាងគេលំដាប់ទី២ក្នុងលោក បន្ទាប់ពីសហរដ្ឋអាមេរិក និងត្រូវបានតាមពីក្រោយដោយប្រទេសជប៉ុន បារាំង និងកាណាដា។
គិតត្រឹមឆ្នាំ២០២០ សរុបទ្រព្យសម្បត្តិរបស់សេដ្ឋីៗទូទាំងសកលោកមានដល់ទៅប្រមាណជិត២៩ទ្រីលានដុល្លារអាមេរិក ក្នុងនោះ ប្រទេសចិនមានប្រមាណជាង៤ទ្រីលានដុល្លារ។
អត្ថបទគួរអាន
នៅឆ្នាំ២០២០ សហរដ្ឋអាមេរិកឈរលេខរៀងទី១ មានសេដ្ឋីប្រាក់លានដុល្លារប្រមាណ២២លាននាក់ ឬស្មើ ៣៩%នៃចំនួនសេដ្ឋីប្រាក់លានដុល្លារទូទាំងសកលលោក ខណៈដែលចិនឈរលេខពីរ មានសេដ្ឋីប្រាក់លានដុល្លារប្រមាណ៥លាននាក់ ស្មើនឹងជាង៩% នៃចំនួនសេដ្ឋីប្រាក់លានដុល្លារទូទាំងពិភពលោក ខណៈដែលជប៉ុនឈរលេខ៣ មានជាង៦%។
សូមបញ្ជាក់ដែរថា កាលពីឆ្នាំមុន របាយការណ៍របស់ស្ថាប័ន Hurun Global របស់អង់គ្លេស ក៏បានបង្ហាញឲ្យដឹងដែរថា ប្រទេសចិនបាននាំមុខអាមេរិក ក្លាយជាប្រទេសមានមហាសេដ្ឋីប្រាក់ពាន់លានដុល្លារច្រើនជាងគេបំផុតក្នុងពិភពលោក ដោយមានច្រើនជាង១ពាន់នាក់ ខណៈដែលនៅអាមេរិកមានតែប្រមាណជិត៧០០នាក់ប៉ុណ្ណោះ៕
None
