លោកឧកញ៉ា គឹម សាវុធ អគ្គនាយកក្រុមហ៊ុន Khmer Food Group ដែលជាក្រុមហ៊ុននាំអង្ករចេញដ៏ធំមួយ នៅកម្ពុជា បានគូសបញ្ជាក់ថា បើតាមការសង្កេតស្រាវជ្រាវរបស់លោកឃើញថា មានហេតុផលសំខាន់ៗមួយចំនួន ដែលនឹងធ្វើឲ្យតម្លៃស្រូវអង្ករឡើងថ្លៃ ដូចជា៖
១, ស្រូវអង្ករដែលសល់ក្នុងស្តុករបស់ប្រទេសថៃ តាំងពីជំនាន់ដឹកនាំរបស់អតីតនាយករដ្ឋមន្ត្រីថៃ លោកស្រី យីងឡាក់ នោះ បានលក់ឡៃឡុងអស់ហើយ។
២, ភ្លើងសង្គ្រាមនៅមជ្ឈិមបូព៌ា ចាប់ផ្ដើមអន់ថយ ដូច្នេះតម្រូវការស្បៀងដើម្បីជួយសង្គ្រោះជនរងគ្រោះនៅទីនោះចាប់ផ្ដើមមានតម្រូវការឡើងវិញ។
៣, ប្រាក់ដុល្លារអាមេរិកចាប់ផ្ដើមចុះថោកជាងមុន។
៤, ឆ្នាំនេះ ប្រទេសឥណ្ឌូនេស៊ីក៏បានចាប់ផ្ដើមបញ្ជាទិញអង្ករដែរ ដោយសារតែការដាំដុះក្នុងប្រទេសនេះកាលពីឆ្នាំទៅមិញ ហាក់មិនសូវទទួលបានផល។
បើតាមការគូសបញ្ជាក់ពីឧកញ៉ាអគ្គនាយកក្រុមហ៊ុន Khmer Food Group ដដែល បានបង្ហើបឲ្យដឹងទៀតថា ទីផ្សារអង្កររបស់កម្ពុជាបច្ចុប្បន្ន និងអនាគត នឹងងាកទៅរកទីផ្សារអាស៊ីវិញម្ដង ពិសេស គឺប្រទេសមហាមិត្តចិនតែម្ដង ខណៈដែលទីផ្សារអឺរ៉ុបអាចនឹងមានកំណើនតិចតួច។
តើអ្នកបានអានអត្ថបទនេះ ឬនៅ?
ទីផ្សារអង្ករកម្ពុជាត្រូវងាកទៅរកអាស៊ីជាធំ ព្រោះថា ប្រជាជននៅតំបន់អាស៊ីមានការទទួលទានបាយជាអាហារប្រចាំថ្ងៃ ខុសពីប្រជាជននៅប៉ែកអឺរ៉ុប។ ជាក់ស្ដែង នៅឆ្នាំចុងក្រោយនេះ ចិនបានក្លាយជាទីផ្សារនាំចេញអង្ករដ៏ធំជាងគេរបស់កម្ពុជា ហើយអនាគត ក៏នៅតែចិនដដែល។
យ៉ាងណាក៏ដោយចុះ បើតាមការគូសបញ្ជាក់ពីលោកឧកញ៉ា គឹម សាវុធ រដ្ឋាភិបាលគួរតែមានវិធានការមួយចំនួនលើការនាំចេញស្រូវទៅក្រៅប្រទេសរបស់ឈ្មួញធំៗ ព្រោះនៅបណ្ដាប្រទេសផ្សេង ដូចជា ថៃ ឬវៀតណាម ជាដើម គេមិនត្រូវឲ្យលក់ស្រូវចេញទៅក្រៅប្រទេសនោះទេ តែបើលក់អង្ករបាន។
ប៉ុន្ដែ កម្ពុជា ហាក់បានបើកចំហឬធូររលុងសម្រាប់ផ្សារនាំស្រូវចេញនេះ ខុសពីការនាំអង្ករចេញ ដែលវាគឺជារឿងមួយដែលធ្វើឲ្យក្រុមហ៊ុននាំអង្ករចេញស្របច្បាប់ត្រូវប្រឈមនឹងការប្រកួតប្រជែង ឬកង្វះស្រូវកិន ហើយវាក៏ធ្វើឲ្យខាតបង់ដល់ផ្នែកសេដ្ឋកិច្ចក្នុងប្រទេសផងដែរ។ លោកឧកញ៉ា គឹម សាវុធ សង្ឃឹមថា រដ្ឋាភិបាលនឹងចាត់វិធានការរឹតត្បិតផ្លូវច្បាប់ លើឈ្មួញនាំស្រូវចេញ ឲ្យដូចក្រុមហ៊ុន ឬឈ្មួញនាំអង្ករចេញដែរ។
សូមជ្រាបដែរថា ការនាំអង្ករចេញពេញ១ខែមករា ឆ្នាំ២០១៨នេះ មានប្រមាណជាង ៦២ពាន់តោន ខណៈដែលការនាំចេញអង្ករពេញ១ឆ្នាំ២០១៧ កន្លងទៅ មានជាង ៦៣ម៉ឺនតោន ពោលគឺកើនឡើងជាង ១១ម៉ឺនតោន បើធៀបនឹងឆ្នាំ២០១៦៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
