ជាមួយគ្នានេះ ឯកអគ្គរដ្ឋទូតចិនដដែលនេះ ក៏បានបង្ហាញក្តីសង្ឃឹមថា កាណាដានឹងយកករណីលោកស្រី ម៉េង វ៉ាន់ចូវ ប្រធានផ្នែកហិរញ្ញវត្ថុនៃក្រុមហ៊ុន Huawei ទុកជាមេរៀន ផងដែរ។ នេះបើតាមការចុះផ្សាយពីសារព័ត៌មាន South China Morning Post។
លោក ខុង ភ័យហ្វូ ឯកអគ្គរដ្ឋទូតចិនប្រចាំនៅប្រទេសកាណាដា ថ្លែងក្នុងសិក្ខាសាលាមួយតាមប្រព័ន្ធអនឡាញកាលពីថ្ងៃអង្គារ បានអះអាងថា ការព្រួយបារម្ភផ្នែកសន្តិសុខជាតិ ដែលចោទថា ជាការបង្កើតឡើងដោយក្រុមហ៊ុន Huawei គឺជារឿងប្រឌិតរបស់សហរដ្ឋអាមេរិក ហើយគោលបំណងសំខាន់គឺដើម្បីបង្ក្រាបក្រុមហ៊ុន Huawei ប៉ុណ្ណោះ។
ផ្ទុយទៅវិញ តំណាងក្រុងប៉េកាំងរូបនេះ បន្តលើកឡើងថា វត្តមានប្រព័ន្ធ 5G របស់ក្រុមហ៊ុន Huawei ក្នុងប្រទេសកាណាដា គួរតែត្រូវបានគេចាត់ទុកជាផលប្រយោជន៍ដល់ការធ្វើអាជីវកមម្ម និងពាណិជ្ជកម្មទៅវិញទេ នៅក្នុងវិស័យបច្ចេកវិទ្យាដូចបច្ចុប្បន្ន។
ដោយមិននិយាយចំឈ្មោះថាជាអាមេរិក លោក ហ្វូបានចោទថា អ្នកខ្លះព្យាយាមកេងចំណេញនយោបាយលើបញ្ហានេះ ហើយបានព្យាយាមរំលោភបំពានជ្រុលហួសហេតុ ដោយយកបញ្ហាសន្តិសុខជាតិមកធ្វើជាលេស។ ប៉េកាំងសង្ឃឹមថា កាណាដា នឹងទទួលបានមេរៀនថ្មី និងលែងធ្វើដូចពេលមុន បន្ទាប់ពីបញ្ហារបស់លោកស្រីម៉េង វ៉ាន់ចូវ ប្រធានផ្នែកហិរញ្ញវត្ថុនៃក្រុមហ៊ុន Huawei ត្រូវដោះស្រាយ។
គួររំឭកថា ប្រធានផ្នែកហិរញ្ញវត្ថុនៃក្រុមហ៊ុន Huawei លោកស្រី ម៉េង វ៉ាន់ចូវ ត្រូវបានអាជ្ញាធរកាណាដាដោះលែង កាលពីចុងខែកញ្ញាឆ្នាំនេះ ក្រោយចំណាយពេលប្រមាណជា ៣ ឆ្នាំ ជាប់ឃុំខ្លួននៅក្នុងផ្ទះឯប្រទេសកាណាដា។ ការដោះលែងនេះបានកើតឡើង នៅបន្ទាប់ពីរដ្ឋអាជ្ញា អាមេរិកបានប្រកាសពីកិច្ចព្រមព្រៀងមួយដែលថា ការចោទប្រកាន់ប្រឆាំងនឹងលោកស្រី ម៉េង វ៉ាន់ចូវពីបទឆបោក នឹងត្រូវព្យួរ។
អត្ថបទគួរអាន
សូមជម្រាបថា ទំនាក់ទំនងរវាងប្រទេសចិន ជាមួយកាណាដា និងសហរដ្ឋអាមេរិក ត្រូវបានបំពុលអស់រយៈពេលប្រមាណជាង៣ឆ្នាំមកហើយដោយសារតែសំណុំរឿងក្រុមហ៊ុនទូរគមនាគមន៍យក្សចិន Huawei។ ដំបូងឡើយ វាកើតចេញពីការចាប់ខ្លួនលោក ស្រី ម៉េង វ៉ាន់ចូវ ពីសំណាក់អាជ្ញាធរកាដាណា ទៅតាមសំណើរបស់អាមេរិក។ អាមេរិកធ្លាប់បានចោទប្រកាន់ក្រុមហ៊ុន Huawei ពីបទលួចបច្ចេកវិទ្យាពីក្រុមហ៊ុនអាមេរិកដែលគម្រាមកំហែងដល់សន្តិសុខជាតិ។
បច្ចុប្បន្នរដ្ឋាភិបាលក្រុងអូតាវ៉ាប្រទេសកាណាដា កំពុងបន្តត្រួតពិនិត្យលើសំណើរបស់ Huawei ដើម្បីសុំអភិវឌ្ឍបណ្តាញ 5G នៅក្នុងប្រទេសរបស់ខ្លួននៅឡើយ។ ប៉ុន្តែ Huawei សង្ឃឹមថា កាណាដានឹងអនុម័តក្នុងពេលឆាប់ៗ ព្រោះសំណុំរឿងលោកស្រីម៉េង បានដោះស្រាយរួចហើយ៕
None
