ក្រុមហ៊ុនអចលនទ្រព្យដ៏ធំលំដាប់ទី២របស់ចិន Evergrande Group ចាំបាច់ត្រូវបង់ប្រាក់បណ្ណបំណុលប្រចាំត្រីមាស ដល់ម្ចាស់បំណុល៣ក្រុមផ្សេងគ្នានៅក្រៅប្រទេស សរុបជាទឹកប្រាក់ជិត ១៥០លានដុល្លារអាមេរិក ឲ្យបានមុនពេលកំណត់។ នេះបើយោងតាមទិន្នន័យដែលចងក្រងដោយក្រុមហ៊ុនហិរញ្ញវត្ថុអាមេរិក Refinitiv។
ដោយឡែក ក្រុមហ៊ុនដែលកំពុងមានបំណុលវណ្ឌកសរុបប្រមាណ ជាង៣០០ពាន់លានដុល្លារមួយនេះ ត្រូវលៃលកយ៉ាងណា រកប្រាក់ឲ្យបានសរុបជាង ៥៧០លានដុល្លារ ដើម្បីត្រៀមសងដល់ម្ចាស់បំណុលដទៃទៀត ឲ្យបានមុនដំណាច់ឆ្នាំ២០២១នេះ។
គួររំឭកថា ក្រៅតែពីប្រឈមមុខនឹងការយឺតយ៉ាវ បង់សងប្រាក់បណ្ណបំណុលដល់ម្ចាស់បំណុលនៅក្រៅប្រទេសត្រឹមដើមសប្តាហ៍នេះ Evergrande បានខកខានសងប្រាក់នៃបណ្ណបំណុលពីរលើករួចហើយដែរ កាលពីចុងខែកញ្ញា គិតជាទឹកប្រាក់ជិត ១៣០លានដុល្លារអាមេរិក។
មិនត្រឹមតែខកខានសងប្រាក់ដល់ម្ចាស់បំណុលធំៗ និងបណ្ណបំណុលនៅបរទេសនោះទេ ក្រុមហ៊ុនយក្សរបស់ចិនមួយនេះ ក៏បានខកខានក្នុងការទូទាត់ប្រាក់ទៅឱ្យធនាគារក្នុងស្រុក អ្នកផ្គត់ផ្គង់សម្ភារៈសំណង់ និងវិនិយោគិនខ្នាតតូចជាច្រើនទៀតផងដែរ។ ប្រការនេះ តម្រូវឲ្យក្រុមហ៊ុនបង្ខំចិត្ត ផ្អាក គម្រោងអភិវឌ្ឍន៍អចលនទ្រព្យជាង៤០០គម្រោងរបស់ខ្លួន នៅទូទាំងប្រទេសចិន។
អត្ថបទទាក់ទង
យ៉ាងណាក៏ដោយចុះ Evergrande សង្ឃឹមថា នឹងអាចលក់ទ្រព្យសម្បត្តិ ដែលខ្លួនមាន ហើយអាចទាក់ទាញវិនិយោគិនថ្មីៗ មកបណ្តាក់ទុនបន្ថែម ដើម្បីដោះស្រាយវិបត្តិហិរញ្ញវត្ថុរបស់ខ្លួននេះ។ បើតាមប្រព័ន្ធផ្សព្វផ្សាយក្នុងស្រុកចិន បានរាយការណ៍ថា ក្រុមហ៊ុន Evergrande ទំនងជានឹងលក់ភាគហ៊ុន ភាគច្រើននៅក្នុងអាជីវកម្មគ្រប់គ្រងអចលនទ្រព្យរបស់ខ្លួន ទៅឱ្យក្រុមហ៊ុនគូប្រជែងនៅក្នុងស្រុកមួយគឺក្រុមហ៊ុន Hopson Development Holdings។
សូមជម្រាបថា បើតាមការអះអាងដោយផ្ទាល់ពីក្រុមហ៊ុន Evergrande ចាប់ពីពេលនេះរហូតដល់ឆ្នាំក្រោយ ខ្លួនត្រូវត្រៀមប្រាក់ប្រមាណ ២៤០ពាន់លានយ័ន ឬស្មើនឹងជាង ៣៧ពាន់លានដុល្លារអាមេរិកទៀត សម្រាប់បង់សងបំណុលដែលខ្លួនបានជំពាក់៕
None
