លោក លី ឈាង នាយករដ្ឋមន្ត្រីថ្មីរបស់ចិន បាននិយាយអះអាងថា មិនថាស្ថានភាពពិភពលោកមានការវិវឌ្ឍទៅជាយ៉ាងណានោះទេ គឺប្រទេសចិននឹងនៅតែប្តេជ្ញាចិត្តចំពោះកំណែទម្រង់ និងការបើកចំហរទៅមុខជានិច្ច ដើម្បីជួយជំរុញកំណើនសេដ្ឋកិច្ច។ ទន្ទឹមនឹងនេះ លោកក៏បានអះអាងទៀតថា ភាពតានឹងនៃភូមិសាស្ត្រនយោបាយ គឺបានត្រឹមតែធ្វើឲ្យការអភិវឌ្ឍនៅទូទាំងពិភពលោកដើរថយក្រោយតែប៉ុណ្ណោះ។
ថ្លែងនៅលើវេទិកាជាមួយនាយករដ្ឋមន្ត្រីម៉ាឡេស៊ី សិង្ហបុរី និងអេស្ប៉ាញដែលមានទំនាក់ទំនងពាណិជ្ជកម្មនិងការទូតជិតស្និទ្ធិជាមួយទីក្រុងប៉េកាំងនោះ លោកលី ឈាង បានលើកឡើងពីវឌ្ឍនភាពនៃសេដ្ឋកិច្ចចិននៅដើមឆ្នាំនេះថា ខែមីនាមានភាពល្អប្រសើរជាងខែមករា និងខែកុម្ភៈ ជាពិសេសសន្ទុះសេដ្ឋកិច្ចសំខាន់ៗដូចជាការប្រើប្រាស់ និងការវិនិយោគបានបន្តមានភាពប្រសើរឡើងខណៈដែលវិស័យការងារ និងតម្លៃជាទូទៅនៅមានស្ថិរភាពនៅឡើយ។
លោក ឈាង បានបន្ថែមទៀតថា នៅក្នុងជំហានបន្ទាប់ ចិននឹងបន្តប្រកាន់ខ្ជាប់នូវគោលការណ៍ស្ថិរភាព និងស្វែងរកវឌ្ឍនភាព ខណៈដែលចិនកំពុងរក្សាបាននូវស្ថិរភាព បង្រួបបង្រួម និងពង្រីកសន្ទុះនៃការងើបសេដ្ឋកិច្ចឡើងវិញ និងជំរុញភាពល្អប្រសើរឡើងនៃដំណើរការសេដ្ឋកិច្ចរបស់ប្រទេសចិនឱ្យកើនឡើងជាលំដាប់។
នាយករដ្ឋមន្ត្រីថ្មីរបស់ចិនរូបនេះក៏បាននិយាយដែរថា ចិននឹងបង្កើតវិធានការថ្មីជាបន្តបន្ទាប់នៅក្នុងការពង្រីកការចូលទៅដល់ទីផ្សារ និងការធ្វើឱ្យប្រសើរឡើងនូវបរិយាកាសអាជីវកម្ម ហើយសន្តិភាពគឺជារឿងសំខាន់បំផុតសម្រាប់ការអភិវឌ្ឍ។
អត្ថបទគួរអាន
ប្រទេសចិនដែលជាមហាអំណាចសេដ្ឋកិច្ចទី២នៅក្នុងពិភពលោកនោះ កំពុងងើបឡើងវិញបន្តិចម្តងៗក្រោយពីប្រទេសនេះបានទម្លាក់ចោលនូវវិធានការទប់ស្កាត់ជំងឺរាតត្បាតកូវីដ១៩ភ្លាមៗនៅក្នុងខែធ្នូឆ្នាំមុន ប៉ុន្តែការស្ទុះងើបសេដ្ឋកិច្ចឡើងវិញ គឺនៅមិនទាន់មានស្ថិរភាពនៅឡើយទេ។ ទោះយ៉ាងណាលោក លី ឈាង បាននិយាយថា ឥឡូវនេះមានសញ្ញានៃការស្ទុះងើបឡើងវិញជាបណ្ដើរៗហើយ។
ប្រទេសចិនបានកំណត់គោលដៅសម្រាប់កំណើនផលិតផលក្នុងស្រុកតិចតួច គឺអត្រាកំណើនត្រឹម ៥% ប៉ុណ្ណោះនៅឆ្នាំនេះ បន្ទាប់ពីនៅឆ្នាំមុន កំណើនសេដ្ឋកិច្ចចិនគឺសម្រេចបានក្នុងកម្រិតទាបជាងអ្វីដែលរំពឹងទុក។ ប៉ុន្តែតួលេខកំណត់គោលដៅនៅឆ្នាំ២០២៣នេះ គឺនៅទាបជាងតួលេខ ដែលមូលនិធិរូបិយវត្ថុអន្តរជាតិ និងស្ថាប័នព្យាករមួយចំនួនទៀតបានប៉ាន់ស្មានទុក។
លោកនាយករដ្ឋមន្ត្រី លី ឈាង ក៏បាននិយាយដែរថា ភាពវឹកវរ និងជម្លោះ មិនត្រូវកើតមានឡើងនៅតំបន់អាស៊ីនោះទេ បើមិនដូច្នេះទេអនាគតនៃតំបន់នេះ នឹងត្រូវខាតបង់ជាមិនខាន ហើយលោក ឈាង បានបន្ថែមថា ប្រទេសចិននឹងដើរតួជា «យុថ្កា» សម្រាប់សន្តិភាពពិភពលោក៕
