សមាគមមីក្រូហិរញ្ញវត្ថុកម្ពុជា បានអះអាងថា ខ្លួនកំពុងរង់ចាំការបង្ហាញព័ត៌មានលម្អិតបន្ថែមទៀតទាក់ទងនឹងការធ្វើរបាយការណ៍របស់ អង្គការចំនួនពីរ គឺ អង្គការលីកា ដូ និងសមាគមធាងត្នោត ដើម្បីឲ្យសមាគមមីក្រូហិរញ្ញវត្ថុកម្ពុជា អាចមានលទ្ធភាពបើកការស្រាវជ្រាវបន្ថែម រកការពិត ដើម្បីធ្វើឲ្យមានប្រសើរឡើងក្នុងវិស័យហិរញ្ញវត្ថុ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា បានលើកឡើងប្រាប់អ្នកសារព័តមាន នៅក្នុងកិច្ចពិភាក្សាតុមូល ស្ដីពី ដំណើរប្រព្រឹត្តទៅនិងភាពជាដៃគូនៃសេវាកម្មធនាគារ និងគ្រឹះស្ថានមីក្រូហិរញ្ញវត្ថុ កាលពីពេលថ្មីៗនេះថា ខាងសមាគកំពុងតែរង់ចាំ ការបង្ហាញព័ត៌មានបន្ថែមពី អង្គការលីកាដូ និងសមាគមធាងត្នោត ទាក់ទងនឹងរបាយការណ៍របស់អង្គការទាំងពីរនេះ ដើម្បីសមាគមមានលទ្ធភាពអាចបើកការស្រាវជ្រាវរកការពិត។
អត្ថបទទាក់ទង!
បើតាមលោកគា បូរាណ បានគូសបញ្ជាក់ទៀតថា មកទល់ពេលនេះ ខាងសមាគមមិនទាន់បានជួបផ្ទាល់ជាមួយនឹងអង្គការលី កាដូ និងសមាគមធាងត្នោត ដើម្បីជជែកពីបញ្ហារបាយការណ៍នេះនៅឡើយទេ ប៉ុន្ដែ សមាគមបានទាមទារឲ្យអង្គការទាំងពីរនេះ បង្ហាញព័ត៌មានបន្ថែមរួចហើយ ហើយក៏កំពុងរង់ចាំការឆ្លើយតបផងដែរ។
ប្រធានសមាគមមីក្រូហិរញ្ញវត្ថុរូបនេះ បានលើកឡើងទៀតថា បើសិនជាអង្គការដែលសរសេរ របាយការណ៍នេះ ពិតជាមានឆន្ទៈក្នុងការចូលរួមធ្វើឲ្យមានភាពប្រសើរឡើងក្នុងវិស័យហិរញ្ញវត្ថុកម្ពុជា តាមរយៈការផ្ដល់នូវធាតុចូលនានា អង្គការទាំងពីរនេះ គួរតែមកទាក់ទងនឹងធ្វើការងារជិតស្និទជាមួយនឹងសមាគមីក្រូហិរញ្ញវត្ថុកម្ពុជា ដើម្បីធ្វើការសិក្សាពីបញ្ហាទាំងអស់គ្នា។
លោក សឿង សារ៉ន នាយកប្រតិបត្តិនៃសមាគមធាងត្នោត បានឲ្យដឹងថា មកទល់ពេលនេះ លោកមិនទាន់បានទទួលលិខិតផ្លូវការណាមួយ ដែលស្នើសុំការបង្ហាញព័ត៌មាន ទាក់ទងនឹងរបាយការណ៍ ពីសមាគមមីក្រូហិរញ្ញវត្ថុកម្ពុជានៅឡើយទេ។ លោកបានបន្ថែមទៀតថា នៅក្នុងទម្រង់នៃការស្រាវជ្រាវ សមាគមធាងត្នោត គឺមានលក្ខខណ្ឌមួយតម្រូវឲ្យមានការរក្សាការសម្ងាត់របស់អ្នកចូលរួម។ ទោះយ៉ាងណា លោកថា វាមិនជាការលំបាកនោះទេ សម្រាប់ គ្រឹះស្ថានមីក្រូហិរញ្ញវត្ថុក្នុងការចុះទៅស្វែងរកព័ត៌មានជាក់លាក់ ដូចដែលរបាយការណ៍បានបង្ហាញនោះ។
លោក សឿង សារ៉ន សង្កត់ធ្ងន់ថា ការសិក្សាស្រាវជ្រាវទៅលើប្រជាជនដែលបានខ្ចីបុលពីគ្រឹះស្ថានមីក្រូហិរញ្ញវត្ថុចំនួន ២៨គ្រួសារនេះ ពិតមែនតែ មិនមែនជាការស្រាវជ្រាវលក្ខណៈវិទ្យាសាស្ត្រ ប៉ុន្ដែ វាជាការស្រាវជ្រាវដែលមានលក្ខណៈគុណភាព។
នាយកប្រតិបត្តិសមាគធាងត្នោតរូបនេះ បានគូសបញ្ជាក់ពីហេតុផលដែលរបាយការណ៍ ជ្រើសយកការស្រាវជ្រាវទៅលើខេត្តចំនួន៤នេះ ថា គឺធ្វើឡើងដោយផ្អែកទៅលើរបាយការណ៍មួយ កាលពីឆ្នាំ២០១៨ ដែលសមាគមមីក្រូរហិរញ្ញវត្ថុកម្ពុជា បានធ្វើជាមួយនឹងភ្នាក់ងារអភិវឌ្ឍន៍មួយនៅកម្ពុជា ប៉ុន្ដែរបាយការណ៍នោះ មិនបានផ្សាយផ្លូវការជាសាធារណៈនោះទេ។
គួរបញ្ជាក់ថា របាយការណ៍ របស់អង្គការ លី កាដូ និងសមាគមធាងត្នោត ដែលបានចេញផ្សាយកាលពីថ្ងៃទី ៧ ខែសីហា បានបង្ហាញថា បច្ចុប្បន្ននេះ ប្រជាពលរដ្ឋកម្ពុជាជាង ២លាននាក់បានខ្ចីប្រាក់ពីគ្រឹះស្ថានមីក្រូហិរញ្ញវត្ថុ ហើយនាប៉ុន្មានឆ្នាំចុងក្រោយនេះ កម្រិតនៃបំណុលរបស់ប្រជាពលរដ្ឋបានកើនឡើងកាន់តែខ្លាំងឡើងៗ ដែលនេះបណ្តាលឱ្យអាចកើតមានការរំលោភបំពានសិទ្ធិមនុស្សជាច្រើន រួមមានការបង្ខំឱ្យលក់ដី ការកេងប្រវ័ញ្ចកំលាំងពលកម្មកុមារ ការធ្វើចំណាកស្រុកដោយសារបំណុល និងការបញ្ចាំខ្លួនដើម្បីដោះបំណុល។
ជាការឆ្លើយតបភ្លាមៗ ចំពោះរបាយការណ៍ខាងលើនេះ ខាងសមាគមមីក្រូហិរញ្ញវត្ថុក៏បានចេញសេចក្ដីប្រកាសព៍ត៌មានរបស់ខ្លួនផងដែរ ដោយបានចាត់ទុករបាយការណ៍ របស់អង្គការ លីកាដូ និងសមាគម ធាងត្នោតថា ជាការមួលបង្កាច់ លើការផ្ដល់កម្ចី បង្ហាញពីរូបភាពផ្ទុយស្រឡះ និងមើលរំលងតួនាទីដ៏សំខាន់របស់គ្រឹះស្ថានមីក្រូហិរញ្ញវត្ថុទៅលើការកាត់បន្ថយភាពក្រីក្រ និងបរិយាប័នហិរញ្ញវត្ថុនៅកម្ពុជា។
សូមបញ្ជាក់ថា របាយការណ៍ពីធនាគារជាតិនៃកម្ពុជាបង្ហាញថា គិតត្រឹមដំណាច់ខែមិថុនា ឆ្នាំ២០១៩ ទំហំប្រាក់កម្ចីសរុបមានប្រមាណ ជាង ៦ ពាន់ដុល្លារអាមេរិក ផ្តល់ឲ្យអតិថិជនខ្ចីចំនួនជិត ២លាននាក់។ ក្នុងនោះសម្រាប់បា្រក់បញ្ញើមានជាង ៣,៣ ពាន់លានដុល្លារអាមេរិក ដែលបានមកពីអ្នកដាក់ប្រាក់បញ្ញើជាង ២លាន ៥សែនលាននាក់៕
None
