ដើម្បីបង្ការ និងការពារការរាតត្បាតនៃជម្ងឺដ៏កាចសាហាវ កូរ៉ូណានេះ បណ្តាប្រទេសមួយចំនួនដូចជា អាមេរិក និងសិង្ហបុរី បានសម្រេចផ្អាកជើងហោះហើររបស់ខ្លួន ជាមួយនឹងប្រទេសចិន ដោយក្តីកង្វល់ពី កត្តាប្រឈមធំៗ ដែលអាចកើតមានមកសុខភាពរបស់ប្រជាជនពួកគេ។
សេដ្ឋកិច្ចប្រទេសចិន កំពុងតែជួបការលំបាកហើយ ដោយសារតែ តម្រូវការប្រើប្រាស់ធ្លាក់ចុះ ឧស្សាហកម្មផលិតកាន់តែថមថយ ហើយវិស័យដឹកជញ្ជូនក៏ជួបបញ្ហានូវបញ្ហាដ៏ស្មុគស្មាញ ពីព្រោះតែ មេរោគកូរ៉ូណានេះ ហើយបញ្ហាកាន់តែធំគឺ ចិន ប្រឈមនឹងការបាត់ទំនាក់ទំនងជាមួយបណ្តាប្រទេសជាដៃគូ ដោយពួកគេបានសម្រេចផ្អាកជើងហោះហើរ ដែលជាផលប៉ះពាល់ដល់សេដ្ឋកិច្ចយ៉ាងធ្ងន់ធ្ងរ។
អត្ថបទទាក់ទង!
សហរដ្ឋអាមេរិក អូស្ត្រាលី អង់គ្លេស និងសិង្ហបុរី បានហាមឃាត់ ជនជាតិបរទេស ដែលបានទៅប្រទេសចិន ក្នុងរយៈពេល ១៤ថ្ងៃចុងក្រោយ មិនអោយចូលមកកាន់ ប្រទេសទាំង ៣នេះឡើយ ខណៈ ជប៉ុន ក៏បានហាមឃាត់ភ្ញៀវទេសរបរទេស ដែលបានទៅកាន់ខេត្តហ៊ូប៉ី ប្រទេសចិន មិនអោយចូល ប្រទេសជប៉ុន ផងដែរ។
ផ្តើមដំបូង ក្រុមហ៊ុនអាកាសចរណ៍ British Airway របស់ អង់គ្លេស បានសម្រេចផ្អាកជើងហោះហើរទាំងអស់របស់ខ្លួនទៅកាន់ ចិន ពេញមួយខែកុម្ភៈតែម្តង ក្រោមហេតុផលថា កាត់បន្ថយសមត្ថភាពហោះហើរ ដោយសារតែមិនមានតម្រូវការជើងហោះហើរ តែយ៉ាងណាមិញ គ្រប់គ្នាសុទ្ធតែដឹងហើយថា គឺដោយសារការព្រួយបារម្ភពី ការឆ្លងមេរោគកូរ៉ូណា ចូលមកកាន់ប្រទេសរបស់ពួកគេ។
បន្ទាប់ពីនោះ ក្រុមហ៊ុនអាកាសចរណ៍របស់ អាមេរិកធំៗ ចំនួន ៣ បានសម្រេចផ្អាកជើងហោះហើររបស់ខ្លួន ជាមួយនឹងចិន រហូតដល់ចុងខែ មីនា ឬខែមេសា ទើបបើកដំណើរការឡើងវិញ ហើយរដ្ឋាភិបាលអាមេរិក ក៏បានសម្រេចហាមឃាត់ ជនជាតិបរទេស ដែលបានទៅប្រទេសចិន ក្នុងរយៈពេល ១៤ថ្ងៃចុងក្រោយ មិនអោយចូលមកកាន់ អាមេរិកឡើយ លើកលែងតែ សមាជិកគ្រួសារប្រជាជនអាមេរិក និងប្រជាជនរស់នៅអចិន្ត្រៃយ៍ តែយ៉ាងណា អាមេរិក ក៏កំណត់ឲ្យ ក្រុមហ៊ុនអាកាសចរណ៍មួយចំនួនតូច នៅអាចហោះហើរជាមួយ ចិន បាន។
ដោយឡែក រាជរដ្ឋាភិបាលថៃ ក៏ពង្រឹងការត្រួតពិនិត្យលើ អ្នកដំណើរ ជាពិសេសជនជាតិចិន ដែលចូលមកកម្សាន្តនៅក្នុងប្រទេសរបស់ខ្លួនដែរ តែមិនមានការហាមឃាត់ ឬលុបជើងហោះហើរនោះទេ ដោយសារតែ វិស័យទេសចរថៃ ត្រូវការភ្ញៀវទេសចរចិនជាចាំបាច់។
អាជ្ញាធរអាកាសចរណ៍ស៊ីវិលវៀតណាម ក៏បានសម្រេចផ្អាកជើងហោះហើរជាមួយ ចិន ភ្លាមៗតែម្តង ដោយចាត់ទុកជា ផ្អែកមួយនៃយុទ្ធសាស្ត្រការពារជម្ងឺឆ្លងកូរ៉ូណា។
យោងតាមគេហទំព័រ Simple Flying បានគូសបញ្ជាក់ថា បណ្តាប្រទេសជាច្រើនទៀត ដែលសម្រេចកាត់បន្ថយ និងផ្អាកជើងហោះហើរជាមួយនិង ចិន រួមមាន កាណាដា បារាំង ឥណ្ឌា មីយ៉ាន់ម៉ា កូរ៉េ ហ្វីលីពីន អេហ្ស៊ីប អារ៉ាប់រួម និងបណ្តាប្រទេសជាច្រើនទៀត ដែលធ្វើឲ្យមានការលុបចោលជើងហោះហើរជាង ១ម៉ឺនជើង ក្នុងរយៈពេលត្រឹមតែ ៦ថ្ងៃ ចាប់ពីថ្ងៃទី ២៣ ដល់ទី ២៨ ខែមករាកន្លងទៅនេះ។
អង្គការសុខភាពពិភពលោក ក៏បានប្រមានដែរថា ការហាមឃាត់ជើងហោះហើរ នឹងប៉ះពាល់ដល់សេដ្ឋកិច្ចសកល ហើយវាក៏មិនមានប្រសិទ្ធភាព ក្នុងការទប់ស្កាត់ការរីករាលដាលនៃ ជម្ងឺកូរ៉ូណា នេះដែរ គ្រប់ប្រទេសទាំងអស់ គួរតែធ្វើការស្កេនអ្នកដំណើរ ដើម្បីរកមើលអ្នកជម្ងឺឆ្លង គឺវាល្អជាង ការហាមឃាត់ទាំងស្រុង។
អង្គការសុខភាពពិភពលោក ក៏បានបញ្ជាក់ទៀតថា ចិន កំពុងតែដោះស្រាយយ៉ាងសកម្មហើយ នៅក្នុងបញ្ហានេះ ហើយ ចិន ក៏បានធ្វើការរឹតបន្តឹងលើ ការហោះហើរទៅក្រៅប្រទេសផងដែរ ដោយសារតែ ការផ្ទុះរីករាលដាលនៃមេរោគកូរ៉ូណា នៅក្នុងប្រទេសរបស់ខ្លួន។
សូមជ្រាបថា បើតាមគណៈកម្មាធិការសុខាភិបាលចិន គិតត្រឹមព្រឹកថ្ងៃទី ៣ ខែកុម្ភៈ ឆ្នាំ២០២០នេះ ករណីមនុស្សឆ្លងមេរោគ Corona បានកើនដល់ជាង ១ម៉ឺន ៧ពាន់នាក់ និងសម្លាប់មនុស្សអស់ជាង ៣៦០នាក់ នៅក្នុងប្រទេសចិន ក្រៅពីនោះក៏មាន ការព្យាបាលបានជាសះស្បើយ ប្រមាណ ៤៨០នាក់៕None
