ប្រទេសចិនត្រូវបានគេដឹងថា កន្លងមកនេះ គឺមានការគ្រប់គ្រងកូវីដ១៩បានល្អជាងគេ ចាប់តាំងពីមេរោគនេះបានផ្ទុះរាលដាលកាលពីឆ្នាំ២០២០មក ប៉ុន្ដែ ចូលមដល់ចុងឆ្នាំ២០២១ ករណីឆ្លងកូវីដ១៩ក្នុងសហគមន៍នៅក្នុងប្រទេសចិនចាប់ផ្ដើមកម្រើកឡើងវិញ ជាមួយនឹងវត្តមានមេរោគបំប្លែងថ្មីប្រភេទ ឌែលតាផងដែរ។ ជាក់ស្ដែង យ៉ាងហោចណាស់ គិតចាប់ពីថ្ងៃទី ១៧ ដល់ថ្ងៃទី ២៩ ខែតុលាកន្លងទៅនេះ មានករណីឆ្លងកូវីដ១៩ក្នុងសហគមន៍ជិត៤០០ករណីត្រូវបានគណៈកម្មការសុខភាពជាតិរបស់ចិន បានប្រកាសរកឃើញ ខណៈដែលមន្ត្រីសុខាភិបាលចិន បាននិយាយថា បច្ចុប្បន្នករណីឆ្លងរីករាលដាលកំពុងមានសកម្មភាពលឿនរហ័ស ហើយខាងអាជ្ញាធរក៏កំពុងញាប់ដៃញាប់ជើងទប់ទល់នឹងបញ្ហានេះដែរ។
អ្នកនាំពាក្យគណៈកម្មការសុខភាពជាតិចិន លោក មី ហ្វាង (Mi Feng)បាននិយាយថា នៅក្នុងរយៈពេល១៤ថ្ងៃកន្លងទៅថ្មីៗនេះ មានការរាយការណ៍ថា មានតំបន់ក្នុងខេត្តចំនួន១៤ហើយនៅចិន ដែលមានករណីឆ្លងកូវីដ១៩ចូលក្នុងសហគមន៍។ លោកបន្ថែមថា ករណីផ្ទុះឆ្លងរីករាលដាលថ្មីៗនេះ គឺកំពុងកើនឡើងលឿន ហើយស្ថានភាពគ្រប់គ្រងមេរោគ គឺកំពុងមានស្ថានភាពធ្ងន់ធ្ងរ និងស្មុគស្មាញ។
យ៉ាងណាក៏ដោយចុះ ករណីឆ្លងក្នុងសហគមន៍នៅក្នុងប្រទេសចិន នាពេលបច្ចុប្បន្ន គឺនៅមានក្នុងកម្រិតតិចតួចនៅឡើយទេ បើធៀបនឹងចំនួនករណីដែលបាននាំចូលពីក្រៅប្រទេស ដែលបានរកឃើញជាបន្តបន្ទាប់នោះ។ ប្រទេសចិន ត្រូវបានគេមើលឃើញថា ហាក់មានគោលនយោបាយទប់ស្កាត់កូវីដ១៩យ៉ាងម៉ឺងម៉ាត់ ដោយថ្មីៗនេះ ចិនបានដាក់ចេញអនុវត្តនូវគោលនយោបាយគ្មានកូវីដ ឬZero Covid ដោយមានការប្រុងប្រយ័ត្នខ្ពស់ នៅតាមច្រកចេញចូលព្រំដែន ដើម្បីទប់ស្កាត់កូវីដ១៩ មិនឲ្យចម្លងចូលក្នុងស្រុក។ ស្របពេលដែលចិន ប្រុងប្រយ័ត្នខ្ពស់ជាមួយនឹងកូវីដ១៩ គេសង្កេតឃើញថា មានប្រទេសកាន់តែច្រើនឡើងៗនៅទូទាំងពិភពលោក រួមទាំងកម្ពុជាផង កំពុងតែចាប់ផ្ដើមបើកដំណើរការសេដ្ឋកិច្ច និងត្រៀមទទួលទេសចរអន្តរជាតិដែលបានចាក់វ៉ាក់សាំងរួចជាបណ្ដើរៗហើយ ក្នុងទិសដៅឈានទៅបើកប្រទេសឡើងវិញ និងដើម្បី រៀនរស់នៅជាមួយកូវីដ១៩។អត្ថបទគួរអាន
សូមបញ្ជាក់ថា ប្រទេសចិនមានគោលដៅ នឹងសម្រេចការចាក់វ៉ាក់សាំងជូនកុមារចាប់ពីអាយុ៣ឆ្នាំ ទៅដល់ ១១ឆ្នាំ នៅត្រឹមចុងឆ្នាំ២០២១ ខណៈដែលចិនបច្ចុប្បន្ននេះ សម្រេចបានការចាក់វ៉ាក់សាំងគ្រប់ចំនួន២ដូសសម្រាប់ប្រជាជនរបស់ខ្លួនប្រមាណ ៧៦%ហើយ នៃចំនួនប្រជាជនសរុបជាង១ពាន់៤រយលាននាក់ ហើយចិនក៏កំពុងតែចាក់ដូសជំរុញ ឬដូសទី៣សម្រាប់ពលរដ្ឋពេញវ័យរបស់ខ្លួនផងដែរ៕
None
