តើថៃកំពុងប្រឈមបញ្ហាអ្វីខ្លះ ហើយថៃកំពុងដោះស្រាយបញ្ហាកូវីដ-១៩ដោយរបៀបណាខ្លះ?
១, កង្វះខាតមន្ទីរពេទ្យសម្រាកព្យាបាលអ្នកកូវីដ-១៩
អ្នកឆ្លងថ្មីឡើងកាន់តែច្រើនឡើងៗ កំពុងធ្វើឲ្យរដ្ឋាភិបាលថៃស្ថិតក្នុងស្ថានភាពកាន់តែយ៉ាប់យ៉ឺន ខណៈដែលមន្ទីរពេទ្យជាច្រើនទាំងរដ្ឋ និងឯកជន លែងមានកន្លែងសេសសល់សម្រាប់ការព្យាបាល ដោយបានតម្រូវឲ្យរដ្ឋរៀបចំកន្លែងផ្សេងទៀតសម្រាប់ព្យាបាលអ្នកវិជ្ជមានកូវីដ-១៩។ ដ្បិតថា ប្រទេសថៃ អនុញ្ញាតឲ្យពលរដ្ឋអាចធ្វើតេស្ដរកកូវីដ-១៩ នៅពេទ្យឯកជនបាន ហើយពេទ្យឯកជនក៏អាចទទួលយកអ្នកជំងឺព្យាបាលផងដែរ។ ដោយសារតែមួយរយៈនេះ ករណីឆ្លងកើនឡើងមានអ្នកអ្នកសម្រុកមកធ្វើតេស្ដកាន់តែច្រើនឡើង ពោលគឺក្នុងមួយថ្ងៃអាចមានអ្នកធ្វើតេស្ដប្រមាណ២ម៉ឺននាក់។
ក្នុងស្ថានភាពដ៏លំបាកនេះយោធាថៃនឹងបានបង្កើតកន្លែងសម្រាកព្យាបាលបណ្ដោះអាសន្នចំនួន ១០បន្ថែមទៀត ដែលមានគ្រែសម្រាប់អ្នកជំងឺដល់ទៅ ៣ពាន់គ្រែ ហើយថ្មីៗនេះថៃក៏បានយកអគារតាំងពិពណ័មកធ្វើជាកន្លែងសម្រាប់សម្រាកព្យាបាលអ្នកជំងឺកូវីដ-១៩ផងដែរ។
អត្ថបទទាក់ទង
២, ថៃបង្ហាញពីសេណារីយ៉ូចំនួន៥ ចំពោះករណីឆ្លងរីករាលនៃកូវីដ-១៩
តាមសារព័ត៌មានក្នុងស្រុកថៃ The Thaiger បានស្រង់សម្ដីមន្ត្រីជាន់ខ្ពស់ក្រសួងសុខាភិបាល បានឲ្យដឹងថា មានសេណារីយ៉ូចំនួន ៥ ដោយមានកម្រិតផ្សេងៗគ្នានៃការរឹតបន្ដឹងបានព្យាករពីចំនួនអ្នកឆ្លងកូវីដ-១៩ គិតជាមធ្យមនៅក្នុងប្រទេសថៃ។
សេណារីយ៉ូទី១៖ បើគ្មានវិធានការគ្រប់គ្រងជំងឺឆ្លងទេ ការឆ្លងកូវីដ-១៩ ក្នុងប្រទេសថៃគិតជាមធ្យមអាចមានជាង៩ពាន់នាក់ក្នុងមួយថ្ងៃ។
សេណារីយ៉ូទី២៖ ដោយសារតែកន្លែងកម្សាន្ដនៅតែត្រូវបានបិទនៅក្នុងខេត្តមានហានិភ័យ នោះការឆ្លងកូវីដ-១៩ គិតជាមធ្យមនឹងមានប្រមាណ ៣ពាន់នាក់ក្នុងមួយថ្ងៃ។
សេណារីយ៉ូទី៣៖ បើសិនជាទីតាំងកម្សាន្ដនៅតែបិទ និងមានការផ្លាស់ប្ដូរឥរិយាបថបុគ្គលម្នាក់ៗបង្កើនការការពារខ្លួន នោះករណីឆ្លងនឹងមានក្នុងកម្រិតជាង៩០០នាក់ក្នុងមួយថ្ងៃ។
សេណារីយ៉ូទី៤៖ បើសិនជាទីតាំងកម្សាន្ដត្រូវបានបិទ និងមានការផ្លាស់ប្ដូរឥរិយាបថបុគ្គលម្នាក់ រួមទាំងមានការកាត់បន្ថយការប្រមូលផ្ដុំជាសាធារណៈ នោះករណីឆ្លងជាមធ្យមនឹងមានក្នុងកម្រិតជិត៦០០នាក់ក្នុងមួយថ្ងៃ។
និងសេណារីយូទី៥៖ ដោយមានការបិទទីតាំងកម្សាន្ដ, បុគ្គលម្នាក់ៗមានការផ្លាស់ប្ដូរឥរិយាបថ, កាត់បន្ថយការជួបជុំជាសាធារណៈ និងធ្វើការងារពីផ្ទះ នោះ ចំនួនអ្នកឆ្លងជាមធ្យមនឹងមានប្រមាណជិត៤០០នាក់ក្នុងមួយថ្ងៃ។
៣, តើថៃមានគោលនយោបាយគាំទ្រអ្វីខ្លះទៀតចំពោះបញ្ហាកូវីដ-១៩កំពុងរីករាលដាលនេះ?
ថ្មីនេះអាជ្ញាធរថៃបានសម្រេចអនុញ្ញាតឲ្យវិស័យឯកជនអាចមានសិទ្ធិនាំចូលវ៉ាក់សាំងកូវីដ-១៩ សម្រាប់លក់ជូនពលរដ្ឋ ហើយបើទោះបីជាមានការរិះគន់លើគោនយោបាយនេះយ៉ាងណាក្ដី ក៏អាជ្ញាធរថៃនៅតែមិនព្រមបញ្ឈប់នោះដែរ ដោយសារតែយល់ថា វាបានចូលរួមចំណែកនៅក្នុងយុទ្ធនាការចាក់វ៉ាក់សាំង ខណៈដែលអាជ្ញាធរថៃបានផ្ដល់សិទ្ធិឲ្យក្រុមហ៊ុនឯកជនទាំងនោះអាចនាំចូលវ៉ាក់សាំងឲ្យបានដល់ទៅ ១០លានដូស។
បច្ចុប្បន្ន ថៃបានទិញនឹងកំពុងចាក់វ៉ាក់សាំងចំនួន២ប្រភេទហើយសម្រាប់ពលរដ្ឋរបស់ខ្លួន រួមមាន Sinovac របស់ចិន និង AstraZeneca របស់អង់គ្លេស ហើយរដ្ឋាភិបាលថៃ នឹងបន្ដទិញវ៉ាក់សាំងនេះថែមទៀត ដើម្បីបន្ដចាក់ជូនពលរដ្ឋដល់ទៅរយៈពេល២ឆ្នាំទៀត។ ទោះយ៉ាងណា រដ្ឋាភិបាលថៃ គាំទ្រយ៉ាងពេញទំហឹងចំពោះវិស័យឯកជនដែលចង់នាំចូលវ៉ាក់សាំង ដែលផ្សេងពីវ៉ាក់សាំងទាំងពីរខាងលើនេះ ដោយអាចជាវ៉ាក់សាំងរបស់អាមេរិក Pfizer, Moderna និង Johnson &Johnson ដើម្បីជាការធ្វើពិធិធកម្មវ៉ាក់សាំង និងការបែងចែកហានិភ័យ។
គិតត្រឹមចុងខែកុម្ភៈដល់ថ្ងៃទី ១០ខែមេសា ប្រទេសថៃបានចាក់វ៉ាក់សាំងជូនពលរដ្ឋរបស់ខ្លួនសរុបជាង៥៥ម៉ឺនដូសហើយ។
៤, ចំណូលពីវិស័យទេសចរណ៍នៅអំឡុងថ្ងៃបុណ្យចូលឆ្នាំថ្មីអាចធ្លាក់ចុះ ៥០%
អាជ្ញាធរទេសចរណ៍ថៃ បានបញ្ជាក់ថ្មីៗនេះថា ដោយសារតែការផ្ទុះរលកឆ្លងរាលដាលនៃកូវីដ-១៩ វិស័យទេសចរថៃរំពឹងថា នឹងធ្លាក់ចុះប្រាក់ចំណូលពាក់កណ្ដាលនូវអំឡុងថ្ងៃឈប់សម្រាកបុណ្យចូលឆ្នាំថ្មីនេះ បន្ទាប់ពីមានខេត្តជាច្រើនបានដាក់ចេញនូវការធ្វើចត្តាឡីស័ករយៈពេល ១៤ថ្ងៃ ខណៈដែលមានកម្មវិធីជាច្រើនត្រូវបានលុបចោល ឬពន្យារពេល។
អាជ្ញាធរទេសចរណ៍ថៃ ធ្លាប់បានប៉ាន់ប្រមាណថា នៅអំឡុងថ្ងៃបុណ្យសង្ក្រាន្ដឆ្នាំថ្មីនេះ ថៃនឹងទទួលបានការធ្វើដំណើរក្នុងស្រុកចំនួនជាង ៣លាន២សែនការធ្វើដំណើរ ដោយនឹងផ្ដល់ចំណូលសម្រាប់សេដ្ឋកិច្ចជាង ៣៨០លានដុល្លារអាមេរិក ប៉ុន្ដែដោយសារតែបញ្ហាផ្ទុះរាលដាលកូវីដ-១៩ ជាថ្មីនេះ ចំណូលរំពឹងថាធ្លាក់ចុះ ៥០%។
ចំពោះសេដ្ឋកិច្ចថៃនៅឆ្នាំ២០២១នេះវិញ ក៏ត្រូវបានធនាគារកណ្ដាលព្យាករថានឹងអាចមានការធ្លាក់ចុះជាងកំណើនដែលបានព្យាករទុក៣%។ ជាក់ស្ដែងនៅត្រីមាសទី១នៃឆ្នាំនេះ សេដ្ឋកិច្ចថៃត្រូវបានរំពឹងថានឹងមិនមានតួលេខកំណើនវិជ្ជមាននោះទេ ពោលគឺអាចមាន-១% ទៅដល់ -៣%។
សូមបញ្ជាក់ថា គិតត្រឹមថ្ងៃទី ១២ ខែមេសាប្រទេសថៃរកឃើញអ្នកឆ្លងកូវីដ-១៩ ថ្មីជិត១ពាន់នាក់ ដែលធ្វើឲ្យចំនួនអ្នកឆ្លងសរុបកើនដល់ជាង៣ម៉ុន៣ពាន់នាក់ ខណៈអ្នកស្លាប់មាន៩៧នាក់៕
ចុច Like Facebook Page របស់ខេមបូណូមីស និងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
