សេដ្ឋកិច្ចប្រទេសជប៉ុនមានការធ្លាក់ចុះជិត១%គិតត្រឹមខែកក្កដាដល់ខែកញ្ញាឆ្នាំ២០២១ ត្រូវបានជំរុញដោយការធ្លាក់ចុះប្រមាណ ៣,៨% នៃការវិនិយោគមិនមែនលំនៅដ្ឋាន ខណៈដែលការចំណាយលើការប្រើប្រាស់ក្នុងគ្រួសារពលរដ្ឋជប៉ុនវិញបានធ្លាក់ចុះ ១,២% ក្នុងអំឡុងពេលជប៉ុនមានការដាក់ប្រទេសក្នុងភាពអាសន្ននៃជំងឺកូវីដ ១៩។
ទន្ទឹមនេះ ការនាំចេញដែលជាក្បាលម៉ាស៊ីនសំខាន់មួយទៀតក្នុងការជំរុញសេដ្ឋកិច្ចរបស់ប្រទេសជប៉ុនក៏បានធ្លាក់ចុះផងដែរ ក្នុងនោះការនាំចេញយានយន្តត្រូវបានជាប់គាំង ដោយសារកង្វះខាតសមាសធាតុវត្ថុធាតុដើមសម្រាប់ផលិតកម្ម។ ដោយឡែក ការនាំចូលទំនិញ និងសេវាកម្មវិញ ក៏មានការថមថយចុះស្ដួចស្ដើងដូចគ្នាដែរ ដែលកត្តាទាំងនេះ កំពុងធ្វើឲ្យការធ្វើណិជ្ជកម្មរបស់ជប៉ុន រក្សាបានភាពវិជ្ជមានបន្តិចបន្តួចប៉ុណ្ណោះ សម្រាប់កំណើន GDPជារួម។
ក្រុមអ្នកវិភាគសេដ្ឋកិច្ចជប៉ុនបាននិយាយថា ការធ្លាក់ចុះនេះ ទំនងជាមានរយៈពេលខ្លីប៉ុណ្ណោះ ដោយហេតុថា រដ្ឋាភិបាលទីក្រុងតូក្យូបានពន្លឿនល្បឿនចាក់វ៉ាក់សាំងជូនពលរដ្ឋ ហើយក៏បានលុបចោលការរឹតបន្តឹងវិធានការផ្សេងៗផងដែរ។ ក្រុមអ្នកវិភាគបានបញ្ជាក់បន្ថែមថា សម្រាប់ត្រីមាសទី ៤ ចំណាយលើការប្រើប្រាស់ប្រហែលជានឹងត្រលប់មកវិញ ប្រសិនបើករណីឆ្លងកូវីដ១៩ ត្រូវបានរក្សានៅកម្រិតទាប ខណៈក្រុមហ៊ុនឬរោងចក្រមួយចំនួនអាចបន្តរងប៉ះពាល់លើផលិតកម្ម និងបញ្ហាផ្គត់ផ្គង់រហូតដល់ខែធ្នូចុងឆ្នាំនេះ។
អត្ថបទគួរអាន
សូមជម្រាបថា នាយករដ្ឋមន្ត្រីថ្មីរបស់ជប៉ុន លោក ហ៊ូមីអូ គីហ្ស៊ីដា (Fumio Kishida) បានប្តេជ្ញាថានឹងជំរុញកំណើនសេដ្ឋកិច្ច បន្ទាប់ពីរងការរំខានដោយជំងឺរាតត្បាតសកល មិនតែប៉ុណ្ណោះ លោកត្រូវបានគេរំពឹងថា នឹងប្រកាសពីកញ្ចប់ថវិកាជំរុញកំណើនសេដ្ឋកិច្ចដែលមានតម្លៃរាប់រយពាន់លានដុល្លារក្នុងសប្តាហ៍នេះផងដែរ។
គួររំឮកថា ជំងឺកូវីដ១៩បានរីករាលដាលខ្លាំងនៅប្រទេសជប៉ុនកាលពីរដូវក្តៅ បន្ទាប់ពីភាពយឺតយ៉ាវក្នុងយុទ្ធនាការចាក់វ៉ាក់សាំងជូនពលរដ្ឋ។ យ៉ាងណាក៏ដោយចុះថ្មីៗនេះរដ្ឋាភិបាលជប៉ុន បានពន្លឿនយុទ្ធនាការចាក់វ៉ាក់សាំងជូនពលរដ្ឋកាន់តែខ្លាំងក្លាជាមុន ពោលគិតត្រឹមថ្ងៃទី ១២ វិច្ឆិកាកន្លងទៅ ពលរដ្ឋជប៉ុនប្រមាណ ៧៥% បានចាក់វ៉ាក់សាំងគ្រប់ចំនួនពីរដូស៕អត្ថបទ ស៊ើង និមល់
None
